დღეიდან საქართველოში შეზღუდვების ნაწილი იხსნება. ზოგ ქალაქში ამუშავდა ტრანსპორტი და სკოლებიც

დღეიდან თბილისის, ქუთაისისა და რუსთავის გარდა, მთელი ქვეყნის მასშტაბით სასწავლო პროცესი საკლასო ოთახებში განახლდა.

ასევე, პირველი თებერვლიდან, ბათუმში, თელავში, ზუგდიდში, ფოთსა და გორში მუშაობა დაიწყო მუნიციპალურმა ტრანსპორტმა.

მთელი ქვეყნის მასშტაბით, მათ შორის თბილისშიც, გაიხსნა მაღაზიები და სავაჭრო ობიექტები.

რა შეზღუდვები იხსნება

ბათუმში, ზუგდიდში, გორში, ფოთსა და თელავში:

● იწყებენ მუშაობას სკოლები, მუნიციპალური ტრანსპორტი, მაღაზიები და სავაჭრო ობიექტები. თუმცა, მაღაზიები და ტრანსპორტი მხოლოდ სამუშაო დღეებში იმუშავებს. შაბათ-კვირას – არა.

● იმ ქალაქებში, სადაც სკოლები ამუშავდა, მშობლებს არჩევანის საშუალება აქვთ – დისტანციურსა და დასწრებით სწავლებას შორის. ეს ეხება ზუგდიდის, თელავის, ზესტაფონის, გარდაბნის, ფოთის, მარნეულის, ბათუმის, ქობულეთის და გორის საჯარო სკოლებს. მშობელმა, რომელსაც სურს, რომ მისმა შვილმა სწავლება დისტანციურ ფორმატში გააგრძელოს, უნდა მიმართოს სკოლის ადმინისტრაციას და გაიაროს რეგისტრაცია სპეციალურად შექმნილ ვებგვერდზე:  www.Online.emis.ge. ყველა სკოლაში, სადაც სასწავლო პროცესი საკლასო ოთახში გაგრძელდება, მოხდება მასწავლებლების და სკოლის ადმინისტრაციის 20 პროცენტის სავალდებულო ტესტირება ყოველ ორ კვირაში ერთხელ.

● აჭარაში პირველი თებერვლიდან გაიხსნება კვების ობიექტების მხოლოდ გარე სივრცეები და ისიც მხოლოდ სამუშაო დღეებში.

● აკრძალული რჩება ქორწილები და სხვა დიდი სარიტუალო ღონისძიებები;

თბილისში, ქუთაისსა და რუსთავში:

● პირველი თებერვლიდან განაახლებენ მუშაობას მაღაზიები და სავაჭრო ცენტრები, თუმცა ამ შემთხვევაშიც მხოლოდ სამუშაო დღეებში. შაბათ-კვირას ეს ობიექტები დაიხურება.

● 1-ელი თებერვლიდან აღდგება რეგულარულ ფრენები.

რა შეზღუდვები რჩება ძალაში

● ეპიდემიოლოგები ამბობენ, რომ თბილისის, ქუთაისისა და რუსთავის სკოლებში სასწავლო პროცესის საკლასო ოთახში გაგრძელება დაგეგმილია 1 მარტიდან, თუმცა ეს საბოლოო გადაწყვეტილება არ არის: 15 თებერვალს კიდევ ერთხელ შეფასდება ეპიდემიოლოგიური სიტუაცია და იმ შემთხვევაში, თუ შვიდი დღის მაჩვენებელი ოთხ პროცენტამდე დაიწევს, შემდგომი შემსუბუქება განიხილება.

● იგივე ეხება მუნიციპალური ტრანსპორტის აღდგენას თბილისში, ქუთაისსა და რუსთავში.

● ყველა ქალაქში ღია და დახურული ბაზრები რჩება დაკეტილი და გაიხსნება, სავარაუდოდ, 15 თებერვლიდან;

● საბავშვო ბაღების მუშაობის აღდგენა, პროფსასწავლებლებისა და უმაღლესი სასწავლებლების სტუდენტების დაბრუნება დაგეგმილია პირველი მარტიდან;

● პირველ მარტამდე ძალაში დარჩება კომენდანტის საათი 21:00 საათიდან დილის 05:00 საათამდე;

● ძალაში რჩება სათხილამურო კურორტებზე დაწესებული შეზღუდვები;

● შეზღუდული იქნება საქალაქთაშორისო ტრანსპორტის გადაადგილება;

● ძალაში რჩება პირბადის ტარების წესი. 

აქციები “ქვეყნის გახსნის” მოთხოვნით

სხვადასხვა შეზღუდვების მოხსნის მოთხოვნით მთავრობის ადმინისტრაციასთან აქციები უკვე მეორე კვირაა იმართება.

გასულ კვირას თბილისში მცხოვრები ბავშვების მშობლებმა საპროტესტო აქციები მზიურში გამართეს და სახელმწიფოსგან მოითხოვეს გეგმა, თუ როგორ აპირებს ხელისუფლება ბავშვების და მშობლების ინტერესების დაცვას.

“გაიხსნას დახურული სახელმწიფო” – ამ სახელწოდებით მთავრობის ადმინისტრაციასთან აქცია რესტორატორებმა გამართეს.

“ქვეყანა გაიხსნას უსაფრთხოდ, ეკონომიკა გაიხსნას. მოგვცენ მუშაობის შესაძლებლობა და მოგვცენ იმ ადამიანების დასაქმების შესაძლებლობა, ვისაც ძალიან უჭირს”, – თქვა აქციის ერთ-ერთმა მონაწილემ.

მთავრობის კანცელარიასთან აქცია გაიმართა „მწვანეების“ ორგანიზებითაც. აქცია ტრანსპორტის აღდგენას ეხებოდა.

აქტივისტები ამბობენ, რომ პანდემიის გამო ისედაც მძიმე სოციალური მდგომარეობა ტრანსპორტის არარსებობის გამო კიდევ უფრო დამძიმდა.

“მოგვხედეთ, ჩვენც აქ ვართ” – ამ სლოგანით საქართველოს მთავრობას ფიტნეს-ცენტრებმა და ქორეოგრაფებმა მიმართავეს.

_____________________________________________

● საქართველოში კოვიდგადატანილ პაციენტებს გამოიკვლევენ

● როდის და რა ვაქცინით აცრიან საქართველოს მოქალაქეებს. რა ვიცით ამ დროისთვის

● რა არის ცნობილი კორონავირუსის ვაქცინებზე, დაამარცხებენ თუ არა ისინი პანდემიას და როდის?

________________________________________________