ოპოზიციამ ცესკოსთან შეკრებილ დემონსტრანტებს დაშლისკენ მოუწოდა. აქცია ხვალ განახლდება

მას შემდეგ, რაც ცესკოსთან საპროტესტო აქციაზე სამართალდამცველებმა კიდევ ერთხელ გამოიყენეს წყლის ჭავლი, ოპოზიციის ლიდერებმა საზოგადოებას ახალი გადაყვწტილების შესახებ ტელეკამერებთან ერთად მიმართეს და დაშლისკენ მოუწოდეს. აქცია ხვალ, 18:00-ზე, რუსთაველის გამზირზე განახლდება.

● მრავალათასიანი მიტინგი თბილისში – ოპოზიცია არჩევნების გაყალბებას აპროტესტებს

● ხელისუფლება ცესკოსთან აქციას შლის

„გვინდა ხალხი არ დაშავდეს, გვინდა მაქსიმალურად გამოვარიდოთ ხალხი იმიტომ რომ შეხედეთ სადამდე გამოვიდნენ სპეცრაზმელები, ურტყამენ, აკავებენ…გვინდა, ვითარება გავმუხტოთ, მიუხედავად იმისა, რომ თვითონ დავზიანდით ჯოჯოხეთური ჭავლიდან.

გვინდა, ყველას მოვუწოდოთ, იქნებ ნელნელა ეს პერიმეტრი გავათავისუფლოთ“, – განაცხადა პარტია “მოქალაქეების” დამფუძნებელმა ალეკო ელისაშვილმა.

ნიკა მელიამ და ალეკო ელისაშვილმა მოქალაქეებს ხვალ, 18:00-ზე, აქციაზე მოსვლისკენ მოუწოდეს.

„კლასიკური მაგალითი, უზურპატორი როგორ იქცევა. მტყუანია, გამყალბებელია, მოძალადეა და კიდევ ძალადობს.

გვინდა, ჩვენს შვილებს ჰქონდეს თავისუფალი საქართველო, აღარ დაჩაგრონ, აღარ იძალადონ, ამიტომ ხვალ, რუსთაველს გამზირზე, 6 საათზე მთელი ერი უნდა შევიკრიბოთ და არა ოპოზიცია. ერი, 6-ზე, ისევ რუსთაველის გამზირზე. ეს ადამიანი, ყველა დავრწმუნდით მე მგონი, აპირებს იქამდე ამ ძალადობას, სანამ გაუვა“, – განაცხადა ნიკა მელიამ.

დაშავდა რამდენიმე ადამიანი, მათ შორის ტელეკომპანია “პირველის” ოპერატორი.

“დამიზნებით მიუშვა წყლის ჭავლი ჟურნალისტების მიკროავტობუსზე არის ბარბაროსობა!!!!! დაშავდა ჩვენი ოპერატორი, დაზიანდა კამერები!!! ოდესმე ხო მაინც აგებთ ამის გამო პასუხს!!!” – წერს სოციალურ ქსელში ტელეკომპანია “პირველის” გენერალური პროდიუსერი ნოდარ მელაძე.

დაზიანება მიიღო მოძრაობა “სირცვილიას” აქტივისტმა სოფო კუჭავამ, რომელსაც, სავარაუდოდ, ხელი აქვს მოტეხილი.

ამჟამად თბილისის საავადმყოფოებში რამდენიმე ადამიანია გადაყვანილი.

პოლიციამ წყლის ჭავლი პირველად მაშინ გამოიყენა, როდესაც პარლამენტის შენობის წინ მიმდინარე აქციიდან მონაწილეთა მხოლოდ ნაწილი იყო მისული.

“დაუყოვნებლივ გადადგით პოლიტიკური ნაბიჯები სიტუაციის დეესკალაციისკენ!” – მიმართავს ხელისუფლებას სახალხო დამცველი ნინო ლომჯარია, რომელიც აქციის მონაწილეებთან ერთად ცესკოს შენობასთან იმყოფებოდა.

„მივმართავ თხოვნით ხელისუფლებას, დაუყოვნებლივ გადადგას პოლიტიკური ნაბიჯები სიტუაციის დეესკალაციისკენ, ეს თქვენი პასუხისმგებლობაა. მივმართავ თხოვნით ოპოზიციის ლიდერებს, მოუწოდონ მომხრეებს სიმშვიდისკენ და გააკეთონ ყველაფერი ვითარების განსამუხტავად. მივმართავ ცენტრალურ საარჩევნო კომისიას, გააკეტონ ის, რაც გასაკეთებელია“, – განაცხადა მან.

● ნინო ლომჯარია: ცალკეულ შემთხვევებში, რაც საარჩევნო უბნებზე მოხდა, არჩევნების გაყალბება ჰქვია

რაც შეეხება მმართველ პარტიას, მისმა აღმასრულებელმა მდივანმა ირაკლი კობახიძემ, მომხდარში ისევ ოპოზიცია, კერძოდ კი ნიკა მელია დაადანაშაულა, და ფაქტობრივად ოპოზიციის ლიდერების დაკავებები დააანონსა.

“სწორედ ნიკანორ მელიამ მისცა ნიშანი ნაციონალური მოძრაობის ზონდერ ჯგუფებს გასული წლის 20 ივნისს, როდესაც მათ მიიტანეს შტურმი პარლამენტის შენობაზე. ამ საქმესთან დაკავშირებით აღძრულია სისხლის სამართლის საქმე, რომელიც, დარწმუნებული ვარ, აუცილებლად იქნება ბოლომდე მიყვანილი.

ამჯერადაც შტურმის მოთავეები არიან ნიკანორ მელია და მისი ზონდერ ჯგუფები. ვაფრთხილებთ მათ, რომ თითოეული მათგანი კანონის მთელი სიმკაცრით აგებს პასუხს. ჩვენ ვაცხადებდით, რომ პოლარიზაციასა და აგრესიას იწვევს არა კრიმინალების ყოფნა ციხეში, არამედ მათი ყოფნა პოლიტიკაში. საქართველოში ძალიან მალე დადგება დრო, როდესაც პოლიტიკაში იქნებიან პოლიტიკოსები, ხოლო კრიმინალების კანონის სრული დაცვით იქნებიან ციხეში. მოვუწოდებთ კანონსაწინააღმდეგო შეკრების თითოეულ მონაწილეს, თავი შეიკავონ კანონსაწინააღმდეგო მოქმედებებისგან”, – განაცხადა ირაკლი კობახიძემ სპეციალურ ბრიფინგზე.