აზერბაიჯანისა და საქართველოს საგარეო მინისტრებს ე.წ. "სერბულ იარაღზე" არ უსაუბრიათ
სომხეთისთვის საქართველოს გავლით იარაღის მიწოდებასთან დაკავშირებული სკანდალის შემდეგ, საქართველოს პირველად ესტუმრა აზერბაიჯანის მთავრობის მაღალი რანგის წარმომადგენელი: საგარეო საქმეთა მინისტრი ჯეიჰუნ ბაირამოვი საქართველოს პირველ პირებს ხვდება.
აზერბაიჯანელ კოლეგასთან პირისპირ შეხვედრის შემდეგ, საქართველოს საგარეო საქმეთა მინისტრმა დავით ზალკალიანმა განაცხადა, რომ შეხვედრის მთავარი მიზანი საზღვრის დელიმიტაცია-დემარკაციის საკითხებზე პანდემიის გამო შეფერხებული თანამშრომლობის აღდგენა იყო.
დავით-გარეჯის სამონასტრო კომპლექსი დიდი ხანია ორ მხარეს შორის განხილვის საგანია, რამდენადაც საზღვარი ამ რაიონში არადელიმიტირებულია – მთლიანობაში ეს არის საქართველო-აზერბაიჯანის 446-კილომეტრიანი საზღვრის მესამედი. სახელმწიფო საზღვრის დელიმიტაცია-დემარკაციის ორმხრივი, საქართველო-აზერბაიჯანის მთავრობათაშორისი კომისია 1996 წელს შეიქმნა, მაგრამ მას შემდეგ პროცესი წინ არ წასულა.
დავით–გარეჯის გარშემო მორიგი დაძაბულობა 2019 აპრილში დაიწყო. მაშინ, ადგილზე საქართველოს პრეზიდენტის სალომე ზურაბიშვილის ჩასვლის შემდეგ, აზერბაიჯანულმა მხარემ კომპლექსამდე მისასვლელი გზა ჩაკეტა, რამაც ქართული მხარის აღშფოთება გამოიწვია.
ზალკალიანის თქმით, ქართულმა მხარემ მოიპოვა დავით–გარეჯის სამონასტრო კომპლექსზე ახალი კარტოგრაფიული მასალები, რის გამოც ქართულ–აზერბაიჯანული 2006–2007 წლების შეთანხმება შეიძლება გადაიხედოს. კონკრეტულად, რა მასალებზეა საუბარი, უცნობია.
ოფიციალური ინფორმაციით, მხარეებმა სატრანსპორტო, სავაჭრო და თანამშრომლობის სხვა საკითხები განიხილეს.
ოფიციალური ინფორმაციით, აზერბაიჯანისა და საქართველოს საგარეო მინისტრებს ე.წ. “სერბულ იარაღზე” არ უსაუბრიათ.
_______________________
12-16 ივლისს, აზერბაიჯან-სომხეთის საზღვარზე სიტუაციის გამწვავების შემდეგ, აზერბაიჯანულმა სამთავრობო გამოცემამ haqqin.az-მა გაავრცელა ინფორმაცია საქართველოს გავლით სერბეთიდან სომხეთისთვის იარაღის მიწოდების შესახებ.
სკანდალი იმდენად ღრმა აღმოჩნდა, რომ 17 აგვისტოს ბაქომ საქართველოსა და სერბეთიდან აზერბაიჯანის ელჩები გაიწვია.
საქართველოს საგარეო საქმეთა სამინისტრომ ამ ცნობებს დეზინფორმაცია უწოდა.
ორივე ქვეყნის საექსპერტო წრეებში ორმხრივ ურთიერთობებში სერიოზულ პრობლემებს წინასწარმეტყველებდენ.
თუმცა, 19 სექტემბერს, თავის ერთ-ერთ ბოლო ინტერვიუში, აზერბაიჯანის პრეზიდენტმა ილჰამ ალიევმა უარყო ეს ბრალდება და პირიქით, მადლობა გადაუხადა საქართველოს ხელისუფლებას იმის გამო, რომ მან არ გაატარა თავის ტერიტორიაზე სომხეთისთვის განკუთვნილი იარაღი.