ასლან ბჟანია: "აფხაზეთი მზად არის საქართველოსთან დიალოგისთვის"
აფხაზეთი მზად არის დიალოგისთვის
აფხაზეთის ე.წ. პრეზიდენტის, ასლან ბჟანიას განცხადებით, თუ საქართველოს ამჟამინდელ ხელისუფლებას სურს გრძელვადიანი მშვიდობა, “მაშინ აფხაზეთი მზად არის” დიალოგისთვის.
რუსულ ტელეარხ „ზვეზდასთან“ ინტერვიუში ასლან ბჟანიამ იმედი გამოთქვა, რომ საქართველოს ხელისუფლება “გაუძლებს დასავლეთის ზეწოლას” და ე.წ. მეორე ფრონტს არ გახსნის.
„ამ წლის აპრილში ძალიან მძიმე ვითარება იყო, იყო სახელმწიფო გადატრიალების მცდელობა თბილისში, მაგრამ საქართველოს ხელისუფლებამ წინააღმდეგობა გაუწია.“ – განაცხადა ბჟანიამ.
ბჟანიას თქმით, საქართველოდან სამხედრო შურისძიების საფრთხე კვლავ არსებობს. მისი განმარტებით, საქართველოში ყოველწლიურად ათამდე სამხედრო წვრთნა ტარდება ამა თუ იმ ფორმით, მათ შორის ნატოს ზოგიერთი ქვეყნის მონაწილეობით:
„დანამდვილებით ვიცით, რომ ამ წვრთნების შემდეგ, რომელიც ტარდება, ტექნიკის ნაწილი, მწყობრიდან გამოსვლის საბაბით, რჩება საქართველოს ტერიტორიაზე და ეს ყველაფერი გროვდება. ჩვენ ვიცით ამის შესახებ და ვგეგმავთ რეაგირებას“.
- არის თუ არა ქართულ-აფხაზური კონფლიქტის რისკი უკრაინის ომის ფონზე? გამოკითხვა აფხაზეთში
- ინტერვიუ გურამ ოდიშარიასთან: აფხაზი ქართულ და ქართველი აფხაზურ კულტურაში
- როდის ვიყავით ყველაზე ახლოს ქართულ-აფხაზური კონფლიქტის მოგვარებასთან. ინტერვიუ პაატა ზაქარეიშვილთან
ამავდროულად, ასლან ბჟანიას მიაჩნია, რომ თუ აფხაზეთის წინააღმდეგ ომი გაჩაღდება, საქართველო მას ვერ მოიგებს და ვერცერთ მიზანს სამხედრო გზით ვერ მიაღწევს:
„დროა გავიგოთ, რომ მშვიდობას ალტერნატივა არ აქვს, განსაკუთრებით კავკასიაში. ჩვენ არ გვინდა ომი, მაგრამ მზად ვართ მოვლენების ნებისმიერი შემობრუნებისთვის. ეს არ გვაშინებს, ჩვენ გვინდა ვიმოქმედოთ სამხრეთ კავკასიაში სტაბილური მშვიდობის პირობებში“.
ბჟანია ასევე ამბობს, რომ საქართველოში არ არსებობს კონსენსუსი აფხაზეთთან კონფლიქტისადმი დამოკიდებულების საკითხზე:
„ქართულ საზოგადოებაში არიან ადამიანები, რომლებსაც ესმით არსებული რეალობა და ყოველწლიურად მათი რიცხვი იზრდება. ამასთან, არიან ადამიანები, რომლებიც ვერასდროს შეეგუებიან რეალობას. ეს არის საქართველოში შიდაპოლიტიკური ბრძოლის ინსტრუმენტი. მაგრამ თუ საქართველოს ამჟამინდელ ლიდერებს სურთ უზრუნველყონ ხანგრძლივი მშვიდობა, მაშინ ჩვენ მზად ვართ ამ დიალოგისთვის.”
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
