ევროპის საპარლამენტო კომიტეტები არჩევნებზე შეშფოთებას გამოთქვამენ და ივანიშვილის სანქცირებას ითხოვენ
არჩევნები და სანქციები
ევროპის ქვეყნების საპარლამენტო კომიტეტების თავმჯდომარეები და ევროპარლამენტარები საქართველოში ჩატარებულ საპარლამენტო არჩევნებზე ერთობლივ განცხადებას ავრცელებენ და გამოხატავენ შეშფოთებას იმასთან დაკავშირებით, რომ საქართველოში 26 ოქტომბრის “საპარლამენტო არჩევნებზე აღინიშნა უპრეცედენტო რაოდენობის ინციდენტები და სისტემური დარღვევები.”
ასევე, ისინი ბიძინა ივანიშვილის დასანქცირებას ითხოვენ. განცხადებაში საუბარია ვიზალიბერალიზაციის გადახედვაზეც.
განცხადებას ხელს აწერენ ავსტრიის, ბელგიის, ჩეხეთის, ესტონეთის, ფინეთის, იტალიის, ირლანდიის, საფრანგეთის, გერმანის, ლიეტუვის, ლატვიის, პოლონეთის, მოლდოვის, უკრაინის პარლამენტების საგარეო და ევროპის კომიტეტების ხელმძღვანელები და ევროპარლამენტარები.
რა წერია განცხადებაში
“მტკიცედ სოლიდარულები ვართ ქვეყნების მიმართ, რომლებიც იცავენ დემოკრატიულ ღირებულებებს, ფუნდამენტურ თავისუფლებებს და კანონის უზენაესობას. მტკიცედ ვუჭერთ მხარს ქართველ ხალხს და მათ ევროპულ არჩევანს.
ღრმა სინანულით აღვნიშნავთ საქართველოს ბოლოდროინდელ დემოკრატიულ უკუსვლას, მათ შორის ანტიევროპული კანონმდებლობის მიღებას, რომელიც ზღუდავს სივრცეს დამოუკიდებელი სამოქალაქო საზოგადოების ორგანიზაციებისთვის და ზღუდავს ადამიანის უფლებებს.
ვიმეორებთ ჩვენს ღრმა შეშფოთებას იმ ფაქტთან დაკავშირებით, რომ საქართველოში 26 ოქტომბრის საპარლამენტო არჩევნებზე აღინიშნა უპრეცედენტო რაოდენობის ინციდენტები და სისტემური დარღვევები, რომელთა შესახებაც საერთაშორისო დამკვირვებლებმა განაცხადეს. აღვნიშნავთ, რომ არჩევნების სამართლიანობა და კანონის უზენაესობის დაცვა არის ევროპული ღირებულებების განუყოფელი ნაწილი, რომლის მიმართაც საქართველომ, როგორც EU-ის კანდიდატმა ქვეყანამ საკუთარი ერთგულება უნდა აჩვენოს.” – წერია განცხადებაში.
დეპუტატები არჩევნების დროს გამოვლენილი სისტემური დარღვევების საერთაშორისო გამოძიების აუცილებლობაზე საუბრობენ და ხელისუფლებას მოუწოდებენ, მათ შორის უზრუნველყოს ხმის მიცემის ოქმების საჯაროობა და გამჭვირვალობა. ისინი ითხოვენ საქართველოს ხელისუფლებისგან, რომ უზრუნველყოს:
- ყველა ბრალდება საარჩევნო მანიპულაციებზე (მათ შორის, წინასაარჩევნო პერიოდში), განსაკუთრებით ამომრჩევლის დაშინებისა და ხმების მოსყიდვის შესახებ გამჭვირვალედ იქნას გამოძიებული.
- ბრალდებები იმდენად სერიოზულია, რომ მხოლოდ დამოუკიდებელ საერთაშორისო გამოძიებას შეუძლია გადახედოს და გამოიძიოს ეს არჩევნები და ყველა გადმოცემული დარღვევა როგორც არჩევნების მიმდინარეობისას, ასევე წინასაარჩევნო პერიოდში.
- გახადოს საჯარო და გამჭვირვალე ხმის მიცემის ოქმები, რათა ყველა ამომრჩეველმა შეძლოს საკუთარი ხმის მიცემის დროის, ადგილის და ფაქტობრივი მისამართის გადამოწმება.
- გააუქმოს ყველა ის კანონმდებლობა, რომელიც ძირს უთხრის ძირითად უფლებებს და საქართველოს მოქალაქეების თავისუფლებებს და ეწინააღმდეგება იმ ღირებულებებსა და პრინციპებს, რომელზეც ევროკავშირია დაფუძნებული
ამასთან, ევროპელი დეპუტატები მოუწოდებენ ევროკავშირს და მის ტრანსატლანტიკურ მოკავშირეებს, სანქციები დაუწესოს საარჩევნო პროცესის დარღვევაზე პასუხისმგებელ პირებს – მათ შორის პოლიტიკურ ლიდერებს და უშუალოდ ბიძინა ივანიშვილს.
ასევე, განცხადებაში მოწოდებაა იმ ფონდების გაყინვაზე, რომლებიც ჩართულია საქართველოს სახელმწიფო და საჯარო ინსტიტუტების დახმარებისა და თანამშრომლობის პროექტებში. საუბარია ვიზალიბერალიზაციის შეჩერებაზეც.
მოვუწოდებთ ევროკავშირს და ტრანსატლანტიკურ მოკავშირეებს სანქციები დაუწესოს საქართველოს ოფიციალური პირებსა და პოლიტიკურ ლიდერებს, მათ შორის ბიძინა ივანიშვილს, ვინც პასუხისმგებელნი არიან საარჩევნო პროცესის დარღვევებზე, მათ შორის საარჩევნო პროცესის განმავლობაში სახელმწიფო ინსტიტუტებისა და ადმინისტრაციული რესურსების გამოყენებაზე.
მოვუწოდებთ EU-ის ყველა ფონდის გაყინვისკენ, რომელიც მოიცავს საქართველოს სახელმწიფო და საჯარო დაწესებულებებთან თანამშრომლობასა და მათ დახმარებას, გარდა იმ ფონდებისა, რომლებიც ეხება სამოქალაქო საზოგადოების მხარდაჭერას. ამავდროულად, მოვუწოდებთ საერთაშორისო პარტნიორებს, გაზარდოს სამოქალაქო საზოგადოებისა და დამოუკიდებელი მედიასაშუალებების ფინანსური მხარდაჭერა, დემოკრატიისა და კანონის უზენაესობის პატივისცემის საფუძველზე.
ჩვენ ვიცით, რამდენად მნიშვნელოვანია ვიზალიბერალიზაცია, განსაკუთრებით ახალგაზრდებისთვის. ჩვენ მოვუწოდებთ ევროკომისიას და ევროპულ საბჭოს, გადახედოს ვიზალიბერალიზაციის რეჟიმს საქართველოსთან, არ გამორიცხოს მისი ბოლომდე შეჩერების შესაძლებლობა, თუ ზემოხსენებული პირობები არ შესრულდება.
ჩვენ გავაგრძელებთ ქართველი ხალხისა და მათი ევროპული არჩევანის მხარდაჭერას. ჩვენ ასევე გავაგრძელებთ საქართველოს დამოუკიდებლობის, სუვერენიტეტისა და ტერიტორიული მთლიანობის მხარდაჭერას მის საერთაშორისოდ აღიარებულ საზღვრებში.”
26 ოქტომბრის საპარლამენტო არჩევნების შემდეგ საქართველო ახალი, სრულიად განსხვავებული რეალობის წინაშე აღმოჩნდა.
არჩევნებში ხმების უმრავლესობა – თითქმის 54 პროცენტი “ქართულმა ოცნებამ მიიღო. ეს 12 პროცენტით მეტია ეგზიტპოლის შედეგზე. ამ მონაცემების არ სჯერა არც ადგილობრივ დამკვირვებლებს და არც საერთაშორისო თანამეგობრობას. დამკვირვებლების და ექსპერტების მიერ აღმოჩენილმა ათასობით დარღვევამ და გაყალბების სისტემურმა სქემამ არჩევნების შედეგები კითხვის ნიშნის ქვეშ დააყენა როგორც ქვეყნის შიგნით, ასევე მის ფარგლებს გარეთაც.
საერთაშორისო თანამეგობრობა არ აღიარებს არჩევნების შედეგებს და მათ ლეგიტიმურობას ეჭვის ქვეშ აყენებს. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია. საქართველოში ევროკავშირის ელჩის, პაველ ჰერჩინსკის განცხადებით, მთავრობის კურსის გამო, ევროკავშირის ლიდერებმა ქვეყნის ევროკავშირში გაწევრების პროცესი შეაჩერეს, მწვავე განცხადებების ისმის აშშ-დანაც.
