აზერბაიჯანმა ყარაბაღში ანტიტერორისტული ოპერაცია დაიწყო

ანტიტერორისტული ოპერაცია ყარაბაღში

სომხურ ფორმირებებთან ბოლო დღეების შეტაკებების ფონზე, აზერბაიჯანის თავდაცვის სამინისტრო აცხადებს, რომ ყარაბაღში “ანტიტერორისტული” მოქმედებები დაიწყო მთიანი ყარაბაღის იმ ნაწილში, რომელიც რუსეთის სამშვიდობო კონტინგენტის კონტროლს ექვემდებარება.

განსაკუთრებით აღსანიშნავია, რომ საარტილერიო დარტყმები ხორციელდება მხოლოდ სომხური არმიის პოზიციებზე, დასახლებები და ინფრასტრუქტურული ობიექტები არ იბომბება.

• უკრაინის საგარეო უწყება უარყოფს საქართველოში აჯანყების მომზადებაში უკრაინული მხარის ჩართულობას

“სამმხრივი განცხადების დებულებების უზრუნველყოფის მიზნით, ყარაბაღის ეკონომიკურ რეგიონში ფართომასშტაბიანი პროვოკაციების აღსაკვეთად, ჩვენი ტერიტორიიდან სომხეთის შეიარაღებული ძალების ფორმირებების განიარაღებისა და გაყვანისთვის, გათავისუფლებულ ოკუპირებულ ტერიტორიაზე მცხოვრები მშვიდობიანი მოსახლეობის, სამშენებლო-აღდგენით სამუშაოებში ჩართული სამოქალაქო მოსამსახურეებისა და სამხედრო მოსამსახურეების უსაფრთხოების უზრუნველსაყოფად, ასევე აზერბაიჯანის რესპუბლიკაში კონსტიტუციური წესრიგის აღსადგენად, რეგიონში დაწყებულია ანტიტერორისტული ღონისძიება.” – აცხადებს თავდაცვის სამინისტრო.

განცხადებაში ნათქვამია, რომ მოქმედებების ფარგლებში, შეხების ხაზსა და სეპარატისტული ტერიტორიის სიღრმეში მდებარე სამიზნეების წინააღმდეგ იყენებენ მაღალი სიზუსტის შეიარაღებას. ასევე აზერბაიჯანის თავდაცვის სამინისტრო ხაზს უსვამს, რომ მოქმედებების შესახებ შეატყობინეს რუსეთის ფედერაციის სამშვიდობო კონტინგენტსა და თურქულ-რუსული ერთობლივი მონიტორინგის ცენტრის ხელმძღვანელობას.

“წუხელ და დღეს დილით, ყარაბაღის მეორე ომის შედეგად დეოკუპირებულ ტერიტორიებზე ოთხი ინციდენტი მოხდა, რომელმაც 11 ადამიანის სიცოცხლე შეიწირა. აზერბაიჯანის სახელმწიფო უსაფრთხოების სამსახურმა ამ ინციდენტებიდან ორი ტერორისტულ თავდასხმებად შეაფასა.” – ვკითხულობთ თავდაცვის სამინისტროს განცხადებაში.

რა მოხდა ღამით:

● ლაჩინში უბედური შემთხვევა მოხდა, რომლის დროსაც ელექტროფიკაციის კომპანიის ორი თანამშრომელი დაიღუპა.

● დაახლოებით დილის 4 საათზე ფიზულის რაიონში მომხდარ ავტოსაგზაო შემთხვევას სამი ადამიანი ემსხვერპლა, ექვსი კი დაშავდა. ყველა მათგანი პოლიციელია.

● დაახლოებით 4:30 საათზე ხოჯავენდის (მარტუნი) რაიონში ტანკსაწინააღმდეგო ნაღმზე სატვირთო მანქანის აფეთქების შედეგად ორი საგზაო თანამშრომელი დაიღუპა.

● დილით ხოჯავენდის რაიონის ახალ გვირაბში დამონტაჟებული ნაღმი აფეთქდა, რის შედეგადაც ოთხი პოლიციელი დაიღუპა.