აფხაზური ეკლესია ინაშვილის მიერ შეწირული ხატის მიღებაზე უარს ამბობს
“აფხაზეთის მართლმადიდებელი ეკლესია” უარს ამბობს “პატრიოტთა ალიანსის” ლიდერების – ირმა ინაშვილის და გიორგი ლომიას მიერ ილორის ტაძრისთვის შეწირული ხატის მიღებაზე და მას ქართულ ეკლესიას უკან უბრუნებს.
“აფხაზეთის მართლმადიდებელი ეკლესია არ იღებს ქართველი დეპუტატების მიერ, აფხაზეთის პრეზიდენტის მრჩევლის მონაწილეობით ილორის ტაძრისთვის ქართული ეკლესიისგან ნაჩუქარ ხატს და უკან უბრუნებს მას ქართულ ეკლესიას.
აღნიშნული მისია აფხაზეთის მართლმადიდებელი ეკლესიის გარეშე შედგა. მსგავსი აქციები დაუშვებელია აფხაზეთის მართლმადიდებელი ეკლესიის აღიარებამდე”, – წერია განცხადებაში.
საქართველოს პატრიოტთა ალიანსის ლიდერები – ირმა ინაშვილი და გიორგი ლომია გასაიდუმლოებული ვიზიტით აფხაზეთში 18 აგვისტოს იმყოფებოდნენ.
ისინი იქ დე ფაქტო პრეზიდენტის, ასლან ბჟანიას მრჩეველს, ლაშა საქანიას შეხვდნენ.
საქანიასა და “პატრიოტთა ალიანსის” წარმომადგენლებს შორის შეხვედრის თაობაზე ინფორმაცია ქართული მედიით გავრცელდა. თავდაპირველად ლაშა საქანიამ ქართველ პოლიტიკოსებთან შეხვედრა უარყო, მოგვიანებით კი აღიარა, რომ შეხვედრა მართლაც შედგა.
საქანიას განმარტებით, ეს ”ჰუმანიტარული აქცია” იყო, რომლის ორგანიზებაც მას რუსეთში მცხოვრებმა მეგობრებმა სთხოვეს.
ქართველი პოლიტიკოსების სოხუმში ვიზიტის გახმაურების შემდეგ აფხაზეთის პრეზიდენტის მრჩეველმა, ლაშა საქანიამ, თანამდებობა დატოვა.
