აფხაზმა ომის ვეტერანმა საჯაროდ სოლიდარობა გამოუცხადა თბილისში აქციის მონაწილეებს
საპროტესტო აქციები საქართველოში
აფხაზეთის ომის ვეტერანი და უმაღლესი სამხედრო ჯილდოს მფლობელი ლაშა ზუხბა ფეისბუქის საკუთარ გვერდზე, თბილისში მიმდინარე „უცხოური აგენტების შესახებ კანონპროექტის“ წინააღმდეგ საპროტესტო აქციებს უჭერს მხარს. ამის გამო ის დაგმო აფხაზეთის ხელისუფლების ვეტერანმა პარტიამ „ამცახარამ“, ოპოზიციამ კი პირიქით, „ამცახარას“ „შერჩევითი მიდგომის“ გამო უსაყვედურა.
„ჩემი და ჩემი თანამოაზრე ადამიანების სახელით სოლიდარობას ვუცხადებ თბილისის მომიტინგეებს, ქართულ ოპოზიციას და საქართველოს მთელ სამოქალაქო საზოგადოებას. გვახსოვს თქვენი მხარდაჭერა ბიჭვინთის შეთანხმების წინააღმდეგ ჩვენი პროტესტის მიმართ – უცხოური აგენტების შესახებ კანონის წინააღმდეგ პროტესტი ჩვენ ჯერ კიდევ წინ გვაქვს.
იმედია თქვენი ძალისხმევა არ იქნება უშედეგო და კანონი არ მიიღება. გისურვებთ სულის სიმტკიცეს და წარმატებებს მიზნის მიღწევაში“, – წერს ლაშა ზუხბა ფეისბუქზე.
სოციალური ქსელების აფხაზურ სეგმენტში ამ პოსტმა მწვავე დისკუსია გამოიწვია. ძირითადად, ლაშა ზუხბა დაგმეს ქართული პროტესტის მხარდაჭერისთვის, მაგრამ იყვნენ ისეთებიც, ვინც მას იცავდა და ვეტერანის სამხედრო ღვაწლზე იყო ორიენტირებული.
- მოსაზრება აფხაზეთიდან: ჰპირდება თუ არა კრემლი საქართველოს ტერიტორიულ მთლიანობას „უცხოური აგენტების შესახებ“ კანონის სანაცვლოდ?
- აფხაზეთის საზოგადოება აგენტების კანონის წინააღმდეგ – ვინ რა თქვა?
- „იდეოლოგიური გათიშვის დასაწყისი“ – მოსაზრება ბიჭვინთის აგარაკის რუსეთისთვის გადაცემის შედეგებზე
პროსამთავრობო ვეტერანმა პარტიამ „ამცახარამ“ მოუწოდა თავის კოლეგებს და ოპოზიციურ პოლიტიკურ ძალებს, მორალური შეფასება მისცენ ლაშა ზუხბას სიტყვებს და ადანაშაულებენ მას აფხაზეთში მსგავსი საპროტესტო აქციების მომზადებაში:
„როგორ შეიძლება აფხაზეთის მოქალაქემ და აფხაზეთის სამამულო ომის ვეტერანმა სოლიდარობა გამოუცხადოს მიხეილ სააკაშვილის მხარდამჭერებს, რომელმაც 2008 წლის ომი წამოიწყო? უკიდურესი ნაციონალიზმის იდეოლოგიის მომხრეებს, რომლებიც უარყოფენ თვით აფხაზეთის სახელმწიფოებრიობის იდეას და დამოუკიდებლობას.
მეორეც: მოქალაქე ზუხბა თავისი სახელით და თავისი თანამოაზრეების სახელით მადლობას უხდის ქართველ ნაციონალისტებს ბიჭვნთის შეთანხმების საპროტესტო აქციების მხარდაჭერისთვის.
მესამე: მოქალაქე ზუხბა აანონსებს მომავალ პროტესტს აფხაზეთის რესპუბლიკის პარლამენტის მიერ უცხოელი აგენტების შესახებ კანონის მიღების წინააღმდეგ. ნიშნავს თუ არა ეს იმას, რომ საპროტესტო აქციები თბილისში და მომავალი საპროტესტო აქციები აფხაზეთში კოორდინირებულია ერთი ცენტრიდან? და ბოლოს, შეკითხვა პირადად მოქალაქე ზუხბას: ვინ არიან თქვენი თანამოაზრეები?“
თავის მხრივ, უკვე ოპოზიციურმა ვეტერანთა ორგანიზაცია “არუამ” განაცხადა, რომ არ უჭერს მხარს ლაშა ზუხბას განცხადებას, მაგრამ, მიუხედავად ამისა, გაკვირვებულია ამცახარის ბრალდებებით და მათ ორმაგი სტანდარტების გამოვლინებად მიიჩნევს.
„არუა“ საქართველოსთან დაკავშირებული თემების ჩამონათვალს აქვეყნებს, რაზეც „ამცახარას“ არავითარი რეაქცია არ ჰქონია:
- აფხაზეთის ეკონომიკის მინისტრის ქრისტინა ოზგანის ფარული მოგზაურობა საქართველოს ტერიტორიაზე;
- საქართველოსთან სავაჭრო ურთიერთობების აკრძალვის მოხსნა;
- საქართველოს პარლამენტის დეპუტატების ჩამოსვლა აფხაზეთში და ა.შ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
