აფხაზი სტუდენტები რუსეთში სამხედრო სამსახურში არიან დარეგისტრირებული. არის თუ არა რისკი, რომ ისინი უკრაინაში საბრძოლველად გაგზვნონ?
აფხაზი სტუდენტები რუსეთში
რუსულ უნივერსიტეტებში მყოფი ახალგაზრდები აფხაზეთიდან დარეგისტრირებულნი არიან სამხედრო აღრიცხვისა და გაწვევის ოფისებში. ეს წესი ყოველთვის არსებობდა, მაგრამ მისი გამოყენება მხოლოდ ახლა დაიწყო და აფხაზ მშობლებს ეშინიათ, რომ მათი ვაჟები შესაძლოა უკრაინაში ომში გაგზავნონ. აფხაზეთის ხელისუფლება ვერაფერს აკეთებს, მაგრამ ამას არა მხოლოდ საფრთხედ, არამედ ოპტიმიზმის მიზეზადაც განიხილავენ.
ალექსანდრე კვიცინია (სახელი შეცვლილია) სტუდენტია აფხაზეთიდან, მოსკოვის ერთ-ერთ უნივერსიტეტში პროგრამირების მეორე კურსზე სწავლობს. დაახლოებით ერთი კვირის წინ ალექსანდრემ მშობლები გააოცა იმ ამბით, რომ იგი დარეგისტრირდა მოსკოვის სამხედრო აღრიცხვის ოფისში.
„რუსეთი საომარ მდგომარეობაშია. ომი უკვე რამდენიმე წელია გრძელდება. მეშინია, რომ მათ სურთ ჩვენი ბიჭების გაგზავნა იქ “, – ამბობს ალექსანდრეს დედა.
ქალის თქმით, მან შვილიც კი დაარწმუნა, რომ უნივერსიტეტი დაეტოვებინა ან აკადემიური შვებულება აეღო და სახლში დაბრუნებულიყო, რათა ფრონტზე არ წაეყვანათ.
„ალექსანდრემ თქვა, რომ მან უკვე იცის დრონების დაპროგრამება. ამაზე კი ბრძოლაში დიდი მოთხოვნაა“, – დასძენს დედა.
როგორც გაირკვა, აფხაზეთიდან ჩასულ სტუდენტებს რუსულ უნივერსიტეტებში ყოველთვის აყენებდნენ სამხედრო აღრიცხვაზე, რადგან მათ, აფხაზეთის მოქალაქეობასთან ერთად, ყველაზე ხშირად რუსეთის მოქალაქეობაც აქვთ. აქედან გამომდინარე, რუსეთის ფედერაციის კანონის თანახმად, ყველა სტუდენტი, რომელიც რუსეთის მოქალაქეა, კონტროლდება სამხედრო აღრიცხვისა და გაწვევის ოფისებში.
აფხაზეთის საგარეო საქმეთა მინისტრის, სერგეი შამბას განცხადებით, ეს ვითარება შეიქმნა იმის გამო, რომ აფხაზეთსა და რუსეთს შორის ორმაგი მოქალაქეობის შესახებ კანონი გაყინულია და ჯერ არ არის დარეგულირებული.
„მიუხედავად იმისა, რომ კანონი ორმაგი მოქალაქეობის შესახებ რატიფიცირებულია რუსეთის სახელმწიფო სათათბიროს მიერ, ის ახლა გაყინულია. სტუდენტები დარეგისტრირებულნი არიან ჯარში, მაგრამ ეს არ ნიშნავს იმას, რომ ისინი დაუყოვნებლივ გაიგზავნებიან ომში. მაგრამ სკოლის დამთავრების შემდეგ და რუსეთში დარჩენის შემთხვევაში, შესაძლოა, ისინი ჯარში გაიწვიონ“, – აცხადებს შამბა.
მისი აზრით, აქ პოზიტიური ასპექტიც შეიძლება გაჩნდეს, რადგან სტუდენტები დიპლომის მიღების შემდეგ უფრო მეტად დაბრუნდებიან აფხაზეთში.
ალექსანდრეს დედა აღიარებს, რომ თავად ოცნებობდა, რომ მისი ვაჟი აფხაზეთში დაბრუნდებულიყო, მაგრამ ამავე დროს მიხვდა, რომ მას რუსეთში მეტი პერსპექტივა აქვს:
„მინდა, კარიერა გაიკეთოს, წარმატებული იყოს, მაგრამ აფხაზეთში ეს რთულია.”
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
