აფხაზეთში ორ კვირაში ავარიის შედეგად შვიდი ადამიანი დაიღუპა

ავარიები აფხაზეთში

ავტოსაგზაო შემთხვევების შედეგად სიკვდილიანობის მხრივ აფხაზეთი პოსტსაბჭოთა სივრცეში მუდმივი ლიდერია – 250 ათასიანი მოსახლეობის აფხაზეთის გზებზე ყოველწლიურად, საშუალოდ, 69-70 ადამიანი იღუპება.

თავის წინასაარჩევნო კამპანიაში მოქმედმა პრეზიდენტმა ასლან ბჟანიამ პირობა დადო, რომ სამი წლის განმავლობაში აფხაზეთში ავტოსაგზაო შემთხვევების შედეგად დაღუპულთა რიცხვს გზებზე წესრიგის დამყარებით გაანახევრებდა, და თუ ამას ვერ შეძლებდა, ის თანამდებობას დატოვებდა.

თუმცა, დაპირებულ პერიოდში პრეზიდენტმა აფხაზეთის გზების უსაფრთხოება ვერ უზრუნველყო – გზებზე დაღუპულთა სტატისტიკა კვლავ მაღალ ნიშნულზე დარჩა. სოციალური ქსელების მომხმარებლები აქტიურად ახსენებენ ასლან ბჟანიას მის შეუსრულებელ დაპირებებს.

• აფხაზეთის ოპოზიციის ლიდერმა პრეზიდენტს რვა შეკითხვა დაუსვა და მიანიშნა, რომ მისი გადადგომის დროა
• მოსაზრება: ასლან ბჟანიას სურს გახდეს “აფხაზი პუტინი”
• დეფიციტი. ისტორია აფხაზეთის ბიუჯეტის შესახებ

თუმცა, აფხაზეთის გზებზე არსებულ ქაოსს ყველა პრეზიდენტს არ აბრალებს.

პოპულარული აფხაზი პოლიტიკოსი და ბლოგერი თენგიზ ჯოპუა ავტოსაგზაო შემთხვევების კატასტროფული მაჩვენებლების მთავარ მიზეზად ადამიანების დაუდევრობას მიიჩნევს, რომელიც უპასუხისმგებლობას შობს:

„ჩვენ უპასუხისმგებლოები ვართ, წერა-კითხვის უცოდინრები – გვაკლია ინტელექტი, რომ გავითვალისწინოთ ჩვენი ქმედებების შედეგები არა მხოლოდ სხვებთან, არამედ საკუთარ თავთან მიმართებაშიც. ჩვენ უპასუხისმგებლოდ ვეპყრობით ყველაფერს, მათ შორის სახელმწიფოს და ჩვენს საერთო მომავალს.

ეს პრობლემა წყდება ორი გზით: პირველია განათლება – თუ ადამიანს აქვს რაიმე სახის ინტელექტის ნიშნები და მეორეა მათრახი – მათთვის, ვისი ცნობიერებაც მუშაობს ექსკლუზიურად ცხოველური ინსტინქტების დონეზე. წიგნიერება და დასჯის გარდაუვალობა, ეს არის გამოსავალი.

მაგრამ ჩვენ ჩვენს ქვეყანაში დავიწყებული და მიტოვებული ბავშვებივით ვართ. ჩვენი ბედი და ჩვენი გადარჩენა არ აინტერესებს მათ, ვისაც ამის ვალდებულება აქვს. მათ მხოლოდ სტატისტიკა აინტერესებთ – ცივი და მშრალი ციფრები. მათი მატება აბნელებს მათი ღვთაებრივი მეფობის ატმოსფეროს და მცირე ხნით აფუჭებს უღრუბლო განწყობას. ასე რომ, იზრუნეთ საკუთარ თავზე, შეიკარით ღვედები და ეცადეთ იაროთ უფრო ნელა.“

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო