აფხაზეთის ხელისუფლება კვლავ ცდილობს ბინების შესახებ კანონის გატანას
კანონი ბინების შესახებ აფხაზეთში
აფხაზეთის ხელისუფლება კვლავ ცდილობს საზოგადოებაში უკიდურესად არაპოპულარული “ბინების შესახებ კანონის” მიღებას – ამჯერად “დეპრესიაში” მყოფი რეგიონების მხარდაჭერის ღონისძიებების ფარგლებში.
ასლან ბჟანია უკვე ორი წელია აქტიურად ლობირებს “ბინების შესახებ კანონის” მიღებას, რომელიც უცხოელებს (კერძოდ, რუსებს) აფხაზეთის ტერიტორიაზე ბინების აშენებისა და შეძენის საშუალებას მისცემს.
- “ეს არის საზოგადოების პროტესტი ხელისუფლების წინააღმდეგ” – პოლიტოლოგი აფხაზეთში ბინების კანონის შესახებ
- ეკონომისტის მოსაზრება: რატომ ლობირებს აფხაზეთის ხელისუფლება ბინების შესახებ კანონს?
ამ დროისთვის უცხოელებს აფხაზეთში საცხოვრებელი ფართის შეძენა ეკრძალებათ. საზოგადოების მნიშვნელოვანი ნაწილის აზრით, ამ ტაბუს მოხსნას ბევრი უარყოფითი შედეგი მოჰყვება:
- თუ რუსები აფხაზეთში „შემოიყრებიან“, აფხაზები შესაძლოა უმცირესობაში აღმოჩნდნენ,
- ქალაქგეგმარებითი კოდექსისა და მიწის კადასტრის არარსებობა გამოიწვევს სპონტანურ მშენებლობებს;
- ადგილობრივი ინვესტორები აღმოჩნდებიან უთანასწორო პირობებში და გავლენ ბაზრიდან უძრავი ქონების გაძვირების გამო;
- გაძვირების გამო აფხაზეთის მოქალაქეები საცხოვრებლის ყიდვას ან ქირაობა ვეღარ შეძლებენ;
- ადგილობრივმა მოსახლეობამ შეიძლება დაკარგოს წვდომა კომფორტულ საცხოვრებელ ადგილებზე:
- შემცირდება აფხაზეთის საკურორტო ზონების შემოსავალი;
- გაზრდილ დატვირთვას ვერ გაუძლებს აფხაზეთის ინფრასტრუქტურა.
ყველა ეს შეშფოთება აჭარბებს პრეზიდენტის არგუმენტს, რომ ბინების კანონი “აფხაზეთის ეკონომიკას გამოაცოცხლებს“. ჯერჯერობით კანონპროექტი პარლამენტში საკომიტეტო მოსმენების ფარგლებს არ გასცდენია.
ამიტომ, ახლა ბჟანია ცდილობს ამ კანონის გეოგრაფიულად შეკვეცილი ვერსიით გატანას – მხოლოდ აფხაზეთის აღმოსავლეთ ნაწილისთვის.
ბინების შესახებ კანონის განახლებული ვერსია “აფხაზეთის რესპუბლიკის ოჩამჩირის, ტყვარჩელისა და გალის რაიონების სოციალურ-ეკონომიკური განვითარების დონის ამაღლების გარკვეული ღონისძიებების შესახებ“ კანონპროექტის განუყოფელი ნაწილი გახდა.
- გალის რაიონის გამგებელი აფხაზეთში ქართველების პრობლემებზე საუბრობს. VIDEO
- მოსაზრება: შეთანხმება აფხაზეთში რუსული ინვესტიციების შესახებ – არანაირი სარგებელი, მხოლოდ ზიანი
ასლან ბჟანია ამტკიცებს, რომ ბინების აშენების ნებართვა და მათი შემდგომი მიყიდვის შესაძლებლობა უცხოელებზე მნიშვნელოვნად გააცოცხლებს აფხაზეთის ამ რეგიონების ეკონომიკას, რომლებიც დეპრესიულად ითვლება.
პრეზიდენტი ელოდება, რომ კანონს დეპუტატები პარლამენტის ზაფხულის არდადეგებზე გასვლამდე, ანუ 1 აგვისტომდე მიიღებენ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
