საფეხმავლო ხიდმა რუსეთის საზღვართან აფხაზეთი ააფორიაქა

ახალმა საფეხმავლო ხიდმა რუსეთ–აფხაზეთის საზღვარზე აფხაზეთი შეაშფოთა. ის სადავო სოფელ აიბგაში აშენდა, რომლის გამოც მოსკოვსა და სოხუმს შორის ხელშეკრულება საზღვრის დემარკაციის შესახებ ჯერ არ არის გაფორმებული.

ახლა სოფლის ერთი ნაწილი, რომელსაც მდინარე ფსოუ ჰყოფს, რუსეთს ეკუთვნის, ხოლო მეორე აფხაზეთს.

სწორედ ამ სადავო მონაკვეთის გამო რუსეთსა და აფხაზეთს შორის მოლაპარაკებები საზღვრის დემარკაციის საკითხზე ათი წლის განმავლობაში მიმდინარეობს.

• აფხაზი პოლიტიკოსი: აფხაზეთი რუსეთ-ბელარუსის საკავშირო სახელმწიფოს წევრი უნდა გახდეს
•  აფხაზეთს, ცხინვალს, დნესტრისპირეთს და დონბასს რუსეთის მიერ ანექსიისთვის ამზადებენ?

საფეხმავლო ხიდი რუსებმა აფხაზეთთან შეუთანხმებლად  ააშენეს. პროექტი სოჭის საკრებულოს დეპუტატმა სერგეი შეველევმა განახორციელა, რომელიც ამბობს, რომ ეს მისი ადგილობრივი ამომრჩევლების სურვილი იყო. სექტემბრის ბოლოს მან სამშენებლო მასალები მოზიდა და ერთი თვის შემდეგ ფსოუზე ახალი ხიდი აშენდა.

აფხაზეთის ოპოზიციურმა ორგანიზაციებმა ერთობლივი განცხადება გააკეთეს ამ საკითხთან დაკავშირებით, რომელშიც მოითხოვენ, რომ ხელისუფლებამ გააკეთოს განმარტება ამ საკითხთან დაკავშირებით, ასევე საზოგადოებას აცნობოს ამ მონაკვეთზე სახელმწიფო საზღვრის შესახებ აფხაზეთის კანონის განხორციელების ღონისძიებების თაობაზე.

”არ უნდა დაგვავიწყდეს, რომ დაყოვნება და ბუნდოვანი ფორმულირებები ნაყოფიერ ნიადაგს ქმნის იმ ძალებისთვის, რომლებიც ხელს უშლიან ძმური ურთიერთობების განმტკიცებას აფხაზეთსა და რუსეთის ფედერაციას შორის”, – ნათქვამია განცხადებაში.

აიბგასა და ზოგადად საზღვრის გარშემო ყველა ქმედება რუსეთ-აფხაზეთის საზღვრის დემარკაციის საკითხებზე მომუშავე კომნისიასთან უნდა იყოს შეთანხმებული. თუმცა, ოპოზიციის ინფორმაციით,  მოსკოვსა და სოხუმს შორის წინასწარი შეთანხმება ხიდის მშენებლობის შესახებ არ ყოფილა.

ამ ვითარებასთან დაკავშირებით 9 ნოემბერს აფხაზეთის პარლამენტში დახურული სხდომა გაიმართა.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო