აფხაზეთი: ბჟანია დეპუტატებთან არ მივიდა, რამაც მისი ოპონენტების აღშფოთება გამოიწვია
აფხაზეთში პრეზიდენტი პარლამენტში წინასწარ შეთანხმებულ შეხვედრას არ დაესწრო. ამის ნაცვლად, ის თავის ერთგულ დეპუტატებს მთავრობის საკონფერენციო დარბაზში შეხვდა. ამან ოპოზიციურად განწყობილი დეპუტატების აღშფოთება გამოიწვია. ოპოზიცია ასლან ბჟანიას გადადგომის მოთხოვნით ახალი დიდი აქციისთვის ემზადება.
იმის შესახებ, რომ პრეზიდენტი სახალხო კრებაზე მივიდოდა და დეპუტატების კითხვებს უპასუხებდა, თავდაპირველად ბჟანიას პარლამენტის თავმჯდომარე ვალერი კვარჩია შეუთანხმდა. ეს შეხვედრა ორშაბათს უნდა გამართულიყო, თუმცა მოუცლელობის გამო პრეზიდენტმა მისი ოთხშაბათისთვის, 15 დეკემბრისთვის გადადება მოითხოვა.
- აფხაზეთის შს მინისტრს, რომლის გადადგომასაც მოსახლეობა მოითხოვდა, ახალი სამსახური მოუძებნეს
- კომენტარი: ასლან ბჟანია თავდაცვით მდგომარეობაში გადავიდა
- მოსაზრება: ემოციების კრიზისი აფხაზეთში
თუმცა, დანიშნულ დღეს ასლან ბჟანია სახალხო კრების სხდომათა დარბაზში არ გამოცხადდა, რადგან დეპუტატებთან “თავის” ტერიტორიაზე – მინისტრთა კაბინეტის საკონფერენციო დარბაზში, შეხვედრის ცალმხრივი გადაწყვეტილება მიიღო.
შედეგად, ამ ღონისძიებას პრეზიდენტის ერთგული მხოლოდ 12 (სულ პარლამენტში 35 წევრია) დეპუტატი მივიდა. პარლამენტის დანარჩენი წევრები თავმჯდომარე ვალერი კვარჩიას ხელმძღვანელობით პარლამენტის შენობაში შეიკრიბნენ.
მათ გაკვირვება გამოთქვეს იმით, რომ ბოლო მომენტში სხდომის ადგილად მინისტრთა კაბინეტი აირჩიეს, რადგან სხდომაზე ბჟანია სწორედ დეპუტატებმა მიიწვიეს.
„ყველას გვესმის, რომ ჩვენს ქვეყანაში ხელისუფლების ყველა შტო დამოუკიდებელია და პრეზიდენტის აქ მოსვლა მისი კეთილი ნებაა. უბრალოდ, ვფიქრობ, რომ ამ ვითარებაში ეს, ყოველ შემთხვევაში პოლიტიკურად არაკორექტულია საკანონმდებლო ორგანოსთან მიმართებაში. უბრალოდ, ჩვენ უკვე გადავედით სხვა ფაზაში, როდესაც ჩვენი ზოგიერთი დეპუტატი – პრეზიდენტის მომხრე ხელისუფლების მხარდამჭერები – სხვა შენობაში არიან, ჩვენ კი აქ ვართ“, – განაცხადა დეპუტატმა ვალერი აგრბამ.
საპროტესტო აქციის მოლოდინში
იმავდროულად, პრეზიდენტსა და პარლამენტს შორის არსებული ძალზე დაძაბული ურთიერთობა კარგად ერგება იმ შიდა პოლიტიკურ კონტექსტს, რომელიც განვითარდა აფხაზეთში.
21 დეკემბერს გაერთიანებულმა ოპოზიციამ პრეზიდენტის სასახლესთან საპროტესტო აქცია დანიშნა, რომელზეც, სავარაუდოდ, პრეზიდენტ ასლან ბჟანიას გადადგომას მოითხოვს. მის მიმართ ერთგული დეპუტატების ნაწილთან შეხვედრაზე პრეზიდენტმა აქციის ორგანიზატორები გააკრიტიკა.
„ამ აქციის ორგანიზატორებს შორის არიან ისეთებიც, ვინც ხალხს შეიარაღებისკენ მოუწოდებდა. არიან ადამიანებიც, რომლებიც მათ შეუერთდნენ. ჩვეულებრივ, მსგავს ღონისძიებებზე სხვადასხვა კატეგორიის მოქალაქეები მონაწილეობენ. ვიღაც მოდის გულწრფელად, ვიღაცას იწვევენ, ვიღაც ცდილობს სხვები გამოიყენოს, მაგრამ მე მინდა გავაფრთხილო ჩვენი მოქალაქეები, არ მიიღონ მონაწილეობა ასეთ ღონისძიებაში… ჩვენ გვაქვს მონაცემები, რომ ზოგიერთი პოლიტიკოსი შეეცდება გამოიყენოს ახალგაზრდები რამე უკანონობის ჩასადენად.“, – განაცხადა პრეზიდენტმა ბჟანიამ.
![](https://jam-news.net/app/uploads/2021/12/266177705_1052248212221269_2717450735029389148_n-621x1024.jpeg)
იმავდროულად, ოპოზიციის განზრახვებით შეშფოთებული ხელისუფლება ემზადება სამთავრობო შენობების კომპლექსის დასაცავად, რომელშიც პრეზიდენტის სასახლეც შედის. კომპლექსის ეზოში უკვე შემოტანილია ლითონის კონსტრუქციები. აქციის წინა დღეს მათი მეშვეობით მთელი კვარტალს შემოღობვა მოხდება.