ელენე ხოშტარიას ჯანმრთელობის გაუარესების შესახებ ცნობებს პენიტენციური სამსახური "დეზინფორმაციას“ უწოდებს
ელენე ხოშტარიას ჯანმრთელობის მდგომარეობა
“კოალიცია ცვლილებებისთვის” ერთ-ერთი ლიდერის, ელენე ხოშტარიას ჯანმრთელობის მდგომარეობის გაუარესების შესახებ მისი ადვოკატის განცხადებას სპეციალური პენიტენციური სამსახური უარყოფს და აცხადებს, რომ პატიმრობაში მყოფი ოპოზიციონერი პოლიტიკოსის ჯანმრთელობის მდგომარეობა “რაიმე სახით ან ფორმით“ არ დამძიმებულა.
უწყების განმარტებით, ხოშტარია სრულად არის უზრუნველყოფილი სამედიცინო მომსახურებით, ხოლო მისი დიაგნოზების უმეტესობა პატიმრობამდე იყო დადგენილი და ქრონიკულ დაავადებებს უკავშირდება.
მანამდე ადვოკატმა შოთა თუთბერიძემ განაცხადა, რომ ციხეში ელენე ხოშტარიას ჯანმრთელობის მდგომარეობა გაუარესდა. მისი თქმით, კონსულტაციები გაიმართა თურქეთში პოლიტიკოსის მკურნალ ექიმებთან, რომელთა შეფასებითაც, სათანადო მკურნალობის არარსებობის შემთხვევაში ჯანმრთელობის მდგომარეობის გაუარესებამ შესაძლოა გამოუსწორებელი შედეგები გამოიწვიოს. ადვოკატის განცხადებით, ერთ-ერთ შესაძლო რისკად განიხილება ისიც, რომ ხოშტარიამ მომავალში დამოუკიდებლად გადაადგილების უნარი დაკარგოს და ეტლით სარგებლობა დასჭირდეს.
პენიტენციური სამსახურის განცხადებით, ელენე ხოშტარია N5 ქალთა პენიტენციურ დაწესებულებაში ყველა შესაბამისი პირობებით სარგებლობს და შეუფერხებელი წვდომა აქვს როგორც სამედიცინო, ისე სხვა სერვისებზე. უწყება აღნიშნავს, რომ მსჯავრდებული რეგულარულად გადის სპეციალისტთა კონსულტაციებს და მას არაერთი კვლევა ჩაუტარდა, მათ შორის ხერხემლისა და ზურგის ტვინის მაგნიტურ-რეზონანსული ტომოგრაფია.
განცხადების თანახმად, ხოშტარია კონსულტირებულია კარდიოლოგის, ნევროლოგის, ოფთალმოლოგის, გინეკოლოგის, ფსიქიატრისა და რევმატოლოგის მიერ. რევმატოლოგის ბოლო კონსულტაცია 2026 წლის 5 ივნისს გაიმართა, რის შემდეგაც ჩატარდა შესაბამისი კვლევები და დაინიშნა მკურნალობა მოქმედი კლინიკური გაიდლაინებისა და პროტოკოლების შესაბამისად.
პენიტენციური სამსახური ასევე აცხადებს, რომ დაწესებულებაში მოთავსების დღიდან არც თავად მსჯავრდებულს და არც მის ადვოკატს დამატებითი სამედიცინო მომსახურების ან გამოკვლევების მოთხოვნით არ მიუმართავთ. უწყების ინფორმაციით, ხოშტარიამ რევმატოლოგთან განმეორებით კონსულტაციაზე უარი განაცხადა, თუმცა მორიგი ვიზიტი 17 ივნისს არის ჩანიშნული.
უწყება ადვოკატ შოთა თუთბერიძის განცხადებას “დეზინფორმაციას“ უწოდებს და აღნიშნავს, რომ მის მიერ გავრცელებულ ინფორმაციაზე შესაბამისი რეაგირება უკვე განხორციელდა. პენიტენციური სამსახურის ცნობით, ადვოკატს დაუყოვნებლივ მიეწოდა ინფორმაცია მსჯავრდებულის ჯანმრთელობის მდგომარეობის შესახებ და მას, ისევე როგორც სხვა ბრალდებულებისა და მსჯავრდებულების დამცველებს, შეუფერხებელი კომუნიკაციის შესაძლებლობა აქვთ როგორც დაწესებულების ადმინისტრაციასთან, ისე სამედიცინო პერსონალთან.
ელენე ხოშტარიას საქმე
24 მარტს თბილისის საქალაქო სასამართლომ ოპოზიციონერ პოლიტიკოს ელენე ხოშტარიას 1 წლითა და 6 თვით თავისუფლების აღკვეთა მიუსაჯა იმის გამო, რომ მან დედაქალაქის მერის, კახა კალაძის საარჩევნო ბანერზე წარწერა “რუსული ოცნება“ გააკეთა.
განაჩენი მოსამართლე გიორგი არევაძემ გამოაცხადა. გადაწყვეტილების დასაბუთებისას მან აღნიშნა, რომ ხოშტარიას მიერ ჩადენილ ქმედებას ადასტურებს ტელევიზიით გავრცელებული ვიდეოკადრები, ასევე საქმეს ერთვის დაცვის თანამშრომლის ჩვენება.
ხოშტარია სასამართლო სხდომას არ დასწრებია და ბრალს არ აღიარებს. მისი დაკავება 2025 წლის 15 სექტემბერს მოხდა, მას შემდეგ რაც მან უარი განაცხადა 5.000 ლარიანი საპატიმრო გირაოს გადახდაზე, რომელიც სასამართლომ აღკვეთის ღონისძიების სახით შეუფარდა.
საქმე უკავშირდება ინციდენტს, რომელიც ერთი დღით ადრე, 14 სექტემბერს მოხდა. ხოშტარიამ კახა კალაძის საარჩევნო შტაბთან განთავსებულ ბანერზე მარკერით გააკეთა წარწერა “რუსული ოცნება“. შესაბამისი ვიდეო მან თავადვე გაავრცელა სოციალურ ქსელში და განაცხადა, რომ ეს იყო სოლიდარობის გამოხატვა მეგი დიასამიძის მიმართ – აქტივისტის, რომელიც ანალოგიური ქმედების გამო დააკავეს, თუმცა მოგვიანებით გირაოს სანაცვლოდ გაათავისუფლეს.
