ნიკა სიმონიშვილი: თუ პროტესტის დასაწყისში ევროპულ გზას ვიცავდით, დღეს სუვერენიტეტის შესანარჩუნებლად ვართ ქუჩაში
ნიკა სიმონიშვილის კომენტარი
იურისტი ნიკა სიმონიშვილი შეკრებასა და მანიფესტაციასთან დაკავშირებით ახალ საკანონმდებლო რეგულაციებს გამოეხმმაურა და აღნიშნა, რომ “ქართული ოცნება“ ცდილობს პროტესტის ყველა არასასურველი ფორმა აკრძალოს. მისი თქმით, თუ პროტესტის დასაწყისში ევროპულ გზას ვიცავდით, დღეს სუვერენიტეტის შესანარჩუნებლად ვართ ქუჩაში.
“ქართული ოცნების” პარლამენტმმა დაამტკიცა ცვლილებები, რომლითაც ტროტუარზე შეკრებაც იზღუდება. საკანონმდებლო ცვლილებებით, ტროტუარზე შეკრების ან მანიფესტაციის გამართვამდე 5 დღით ადრე სავალდებულო ხდება შსს-ს გაფრთხილება. თუ შსს გადაწყვეტს, უფლებამოსილება ექნება, რომ აქციის მონაწილეებს ალტერნატიული დრო და ადგილი შესთავაზოს. ამასთან, კანონპროექტით გათვალისწინებული ნორმების დარღვევის შემთხვევაში, პირველივე ჯერზე ადმინისტრაციული პატიმრობაა გათვალისწინებული, გარდა გამონაკლისი შემთხვევებისა.
ნიკა სიმონიშვილი: “ქართული ოცნება“ ყველანაირად ცდილობს მოქალაქეების პოლიტიკურ პროცესებში მონაწილეობიდან გამოთიშვას და ამ ბოლო ნაბიჯით ცდილობს პროტესტის ყველანაირი არასასურველი ფორმა აკრძალოს, არ მისცეს გამოვლენის საშუალება. რეალურად, ჩვენ ვიღებთ რა მოცემულობას – “ქართული ოცნება“ კრძალავს პოლიტიკურ პარტიებს, უკრძალავს მოქალაქეთა მნიშვნელოვან ნაწილს არჩევნებში მონაწილეობას.
დემოკრატიულ პროცესში პოლიტიკურად მონაწილეობის შესაძლებლობა მოქალაქეს აქვს ან არჩევნების გზით, ან პროტესტის მეშვეობით. არჩევნებში მონაწილეობის შესაძლებლობას არ აძლევს ემიგრანტებს, პარტიისთვის მხარდაჭერის შესაძლებლობას არ აძლევს ოპოზიციურად განწყობილ ამომრჩეველს პარტიების აკრძალვით. შენ გრჩება ერთადერთი ინსტრუმენტი ქუჩაში გამოხვიდე. ახლა პროტესტი აიკრძალა. ამის გულისთვის პატიმრობაც არის დადგენილი, მიუხედავად მისი არაკონსტიტუციურობისა და საერთაშორისო სტანდარტებთან შეუსაბამობისა.
ახლა უკვე “ქართულმა ოცნებამ“ თქვა, რომ გეკრძალება ჩემი ნებართვის გარეშე ხალხის სავალ ნაწილზე პროტესტის გამართვაც. “ქართულმა ოცნებამ“ პროტესტი დაუქვემდებარა ნებართვას, რაც ცალსახად არაკონსტიტუციურია. არ შეიძლება ნებართვა მომეთხოვებოდეს პროტესტის გამართვისთვის, მითუმეტეს არაკონსტიტუციურია ის, რომ ხალხის სავალ ნაწილზე შემოიღო შეზღუდვები.
ეს კანონი იმდენად აბსურდულია, იმდენად გაუგებარია, იმდენად არასერიოზულია, შეუძლებელია უბრალოდ თქვა, სად გადის ზღვარი კანონიერებასა და უკანონობას შორის, ფორმალურადაც კი. ფაქტობრივად, ნიშნავს იმას, რომ სადაც კი პოლიცია გეტყვის, რომ არ ჩაატარო პროტესტი, უბრალოდ არ უნდა გამართო. ეს შინაარსი აქვს ამ ბოლო საკანონმდებლო ცვლილებებს.
მე როგორც იურისტს ვერანაირი რჩევა ვერ მექნებოდა. ფაქტობრივად, ტრანსპორტისა და ხალხის სავალ ნაწილზე “ქართულმა ოცნებამ“ პროტესტი აკრძალა. ამ ქალაქში სად არის ადგილი, სადაც არც ხალხის სავალი ნაწილია და არც ტრანსპორტის სავალი ნაწილი. მთელი ქალაქი ასეთია. სახლში ვიჯდე და “ფეისბუკიდან“ ვპოსტო? თუ მტკვარზე ტივით გამოვხატო პროტესტი, სადაც ხალხის სავალი ნაწილი არ არის?!
ჩვენ პროტესტის დასაწყისში ვამბობდით ხოლმე, რომ საქართველოს ევროპული გზის დასაცავად ვართ ქუჩაში გამოსული. თუმცა დღეს მივედით რეალობამდე, რომ უბრალოდ ევროპული გზის დასაცავად კი არ ვართ ქუჩაში, ვართ ქვეყნის შესანარჩუნებლად ქუჩაში გამოსულები. იმისთვის, რომ ქვეყნის სუვერენიტეტი შევინარჩუნოთ. რეალურად დღეს პროტესტზე დგომა არ დგომის საკითხი გადის არა მხოლოდ ევროპული გზის დაბრუნებაზე, არამედ გადის ქვეყნის სუვერენიტეტის შენარჩუნებაზე.
ეს ნიშნავს იმას, რომ ქვეყნის სუვერენიტეტი იქნება ერთი ადამიანის ხელში და თუ მოინდომებს გადააბაროს ვინმეს, მარტივად გააკეთებს ამას. იმიტომ, რომ მოქალაქეებს უბრალოდ აღარ ექნებათ არც არჩევნებით, არც არჩევნების მიღმა პროტესტით არანაირ პროცესზე ზეგავლენის მოხდენის შესაძლებლობა.“
