კომენტარი: საქართველო უკვე რუსეთის მომსახურე ბაზა ხდება
საქართველო და რუსეთი
რუსული ნავთობი რომ შემოგრიალდა ყულევში, ეს ნიშნავს, რომ ამ ქვეყანას უკვე აღარავინ აღარაფერს ეკითხება, ეს ძალიან საშიში ამბავია, განსაკუთრებით ქვეყნისთვის სანქციების კონტექსტში – ამის შესახებ “სტრატეგიული ანალიზის ცენტრის“ დამფუძნებელმა, გიორგი რუხაძემ განაცხადა.
სააგენტო Reuters-ის ცნობით, რუსულმა ნავთობკომპანია “რუსნეფტმა” ამ თვეში საქართველოში ახალაშენებულ ყულევის ნავთობგადამამუშავებელს პირველი ტვირთი მიაწოდა. “რუსნეფტმა” Reuters-სთან კომენტარი არ გააკეთა. სააგენტოს განმარტებით, რუსეთი ცდილობს ნავთობის ექსპორტის დივერსიფიკაციას, რაც დასავლეთის მიერ უკრაინის ომის გამო დაწესებული სანქციების ფონზე კიდევ უფრო აქტუალური გახდა.
გიორგი რუხაძე: “ეს ხალხი ან საერთოდ გასულია მომსახურების ზონიდან და აზრი აღარ მოეკითხება, ან ისინი უკვე აღარ მართავენ სახელმწიფოს და მართავენ რუსები. რეალურად კრემლის ამოცანაა, საქართველოს მაქსიმალური იზოლაცია დასავლეთისგან.
ვხედავთ, რომ ასტრონომიული სისწრაფით ხდება წარმოუდგენელი რაღაცები. რუსული ნავთობი რომ შემოგრიალდა ყულევში, ეს ნიშნავს, რომ ამ ქვეყანას უკვე აღარავინ აღარაფერს ეკითხება, ეს ძალიან საშიში ამბავია, განსაკუთრებით ქვეყნისთვის სანქციების კონტექსტში.
რუსები უკვე აღარავის ეკითხებიან ისე მოაქვთ ნავთობი და ისე გადაგამუშავებინებენ, რომ საერთოდ არაფერს არ გკითხავენ.
ამას კიდევ დავუმატოთ ის, რომ საქართველოს ექსპორტ-იმპორტის ყველაზე დიდი წილი რა არის თუ იცით? ავტომანქანები. ყველაზე მეტი, რაც ჩამოაქვს საქართველოს მსოფლიოდან, არის ავტომანქანები და ყველაზე მეტი, რაც გააქვს, ასევე ავტომანქანებია. რა თქმა უნდა, გადის რუსეთში.
შენ ხდები უკვე რუსეთის მომსახურე ბაზა, აღარავინ აღარაფერს გეკითხება. ხოლო მთელი ენერგია, რაც აქვს დარჩენილი ივანიშვილს, მიდის იმაზე, რომ ვიღაცებს თავი გაუტეხოს და ციხეში გაუშვას, დემოკრატიის ყველა კუნძული წაშალოს ამ ქვეყანაში.“
