"განემარტა, რომ ვალდებულია არ ჩაერიოს მასპინძელი ქვეყნის შიდა საქმეებში" - საგარეოში გერმანიის ელჩი დაიბარეს
საგარეოში გერმანიის ელჩი დაიბარეს
საქართველოში გერმანიის ელჩი პეტერ ფიშერი საქართველოს საგარეო საქმეთა სამინისტროში დაიბარეს. უწყებაში შესვლამდე პიტერ ფიშერმა თქვა, რომ ეს უჩვეულო შემთხვევაა “მეგობრულ სახელმწიფოებს შორის” ურთიერთობაში. მან ასევე დასძინა, რომ იგი სამინისტროში დაგმობს საქართველოს ხელისუფლების ამჟამინდელ კურსს.
“ქართული ოცნების” საგარეო უწყების განცხადებით, შეხვედრაზე აღინიშნა, რომ ქართული მხარის შეშფოთებას იწვევს ქვეყანაში რადიკალური დღის წესრიგის წახალისების მცდელობები, რაც, თავის მხრივ, წინააღმდეგობაში მოდის დემოკრატიის პრინციპებთან და ხელს უწყობს საზოგადოებაში პოლარიზაციის გაღვივებას.
რას ამბობს საგარეო საქმეთა სამინისტრო
“24 სექტემბერს, საქართველოს საგარეო საქმეთა სამინისტროში, გაიმართა საგარეო საქმეთა მინისტრის პირველი მოადგილის, გიორგი ზურაბაშვილის შეხვედრა გერმანიის ფედერაციული რესპუბლიკის საგანგებო და სრულუფლებიან ელჩთან, პეტერ ფიშერთან.
შეხვედრაზე ელჩს განემარტა, რომ „დიპლომატიური ურთიერთობების შესახებ“ 1961 წლის ვენის კონვენციის 41-ე მუხლის პირველი პუნქტის თანახმად, დიპლომატიური წარმომადგენლობის წევრი ვალდებულია, პატივი სცეს ადგილსამყოფელი სახელმწიფოს კანონებსა და რეგულაციებს, ამასთან, აქვს ვალდებულება, არ ჩაერიოს მასპინძელი სახელმწიფოს შიდა საქმეებში.
შეხვედრაზე აღინიშნა, რომ ქართული მხარის შეშფოთებას იწვევს ქვეყანაში რადიკალური დღის წესრიგის წახალისების მცდელობები, რაც, თავის მხრივ, წინააღმდეგობაში მოდის დემოკრატიის პრინციპებთან და ხელს უწყობს საზოგადოებაში პოლარიზაციის გაღვივებას.
ასევე, შემაშფოთებელია ქვეყანაში მიმდინარე სასამართლო პროცესების პოლიტიზირების მცდელობები და ამ პროცესში ელჩების მონაწილეობა.
ქართული მხარე დაინტერესდა გერმანიის საელჩოს მიერ გამოხატული შეშფოთების საფუძვლებით, სიძულვილის ენას გაღვივებისა და დეზინფორმაციის გავრცელების ხელშეწყობასთან დაკავშირებით. აღინიშნა, რომ საელჩოს ოფიციალურად ეთხოვა, წარმოედგინა აღნიშნული შეშფოთების კონკრეტული დასაბუთება, რაც ამ დრომდე არ განხორციელებულა და შესაბამისად, ქართული მხარე მსგავს ბრალდებებს მიიჩნევს ხელისუფლების წინააღმდეგ უსაფუძვლო თავდასხმის მორიგ მცდელობად.
საქართველოს ხელისუფლება, მიუხედავად მის წინააღმდეგ განხორციელებული მიზანმიმართული კამპანიებისა, დიდ მნიშვნელობას ანიჭებს და უფრთხილდება ურთიერთობებს და მიაჩნია, რომ მსგავსი ქმედებები აზიანებს ორ ქვეყანას შორის წლების განმავლობაში ჩამოყალიბებულ პარტნიორულ ურთიერთობებს. საგარეო საქმეთა სამინისტრო იმედოვნებს, რომ დიპლომატიური წარმომადგენლების საქმიანობა მომავალში ქვეყნებს შორის ურთიერთპატივისცემაზე დაფუძნებული თანამშრომლობის პრინციპებს დაეფუძნება”.
“არ მომისმინეს” – გერმანიის ელჩის კომენტარი
“საქართველოში გერმანიის ელჩის პირველი “დაბარება”. გერმანიისთვის, დეტალურად უარვყავი ჩემს წინააღმდეგ უსაფუძვლო თავდასხმები და გერმანია-საქართველოს ურთიერთობებში ახალ დაბალ წერტილზე პასუხისმგებლობა საქართველოს მთავრობასა და “ქართული ოცნების” წარმომადგენლებს დავაკისრე, რომლებიც ქმედებებითა და რიტორიკით გამოიწვიეს ეს და ბლოკავენ ევროკავშირისკენ გზას.
არ მომისმინეს.
რადიკალი არ ვარ.
გერმანია მეგობრად რჩება.” – წერს ფიშერი.
წინაისტორია
● ბოლო პერიოდში “ქართული ოცნების” წარმომადგენლები ევროკავშირისა და სხვა პარტნიორი ქვეყნების ელჩებს ძალადობისა და ექსტრემიზმის მხარდაჭერაში ადანაშაულებენ.
● “ქართული ოცნების” პარლამენტის თავმჯდომარემ, შალვა პაპუაშვილმა 8 სექტემბერს სოციალურ ქსელში დაწერა, რომ გერმანიის ელჩისგან მხარდაჭერილი “ტიტუშკები“ თავს დაესხნენ “ქართული ოცნების“ თბილისის შტაბს.
● ამის შემდეგ, საქართველოში გერმანიის ელჩმა, პეტერ ფიშერმა სოციალურ პლატფორმა X-ზე დაწერა, რომ ევროპის საკითხებში გერმანიის სახელმწიფო მინისტრმა მის მიმართ, როგორც ელჩის მიმართ, გერმანიის მთავრობის სრული მხარდაჭერა გამოხატა.
● 10 სექტემბერს გერმანიის საგარეო საქმეთა სამინისტრომ განცხადება გაავრცელა, რომელშიც კატეგორიულად გმობს პარლამენტის თავმჯდომარის, შალვა პაპუაშვილის “უსაფუძვლო ბრალდებებს” და მოუწოდებს საქართველოს ხელისუფლებას, შეწყვიტოს ცრუ ნარატივების გავრცელება და შეცვალოს ამჟამინდელი პოლიტიკური კურსი.
● 24 სექტემბერს საქართველოში არსებულმა 27 საელჩომ ქვეყანაში დიპლომატიური მისიის როლისა და საქმიანობის შესახებ არსებულ ბრალდებებთან დაკავშირებით განცხადება გაავრცელა, რომელშიც ვკითხულობთ, რომ მსგავსი ბრალდებები ძირს უთხრის “ჩვენი დიპლომატიური მისიების მიერ მათი მოვალეობების შესრულების” შესაძლებლობას. განცხადებაში ასევე ხაზგასმულია, რომ დიპლომატების შეხვედრა როგორც მთავრობასთან, ისე ოპოზიციისა და სამოქალაქო საზოგადოების წარმომადგენლებთან, სრულიად შეესაბამება ვენის კონვენციას.
