თბილისში მარში სახელწოდებით - "სინათლე არ უნდა ჩაქრეს“ გაიმართა. ფოტო და ვიდეო
სინათლე არ უნდა ჩაქრეს
თბილისში მედიის მხარდამჭერი მარში გაიმართა.
მარშს ლოზუნგით – “სინათლე არ უნდა ჩაქრეს“ საქართველოს მეხუთე პრეზიდენტი სალომე ზურაბიშვილიც შეუერთდა.
“მედიის თავისუფლებას აქვს არსებითი მნიშვნელობა. სადაც არ არის თავისუფალი მედია, იქ არც თავისუფლებაა, არც დემოკრატია და არც თავისუფალი საზოგადოება. ინფორმაციის გარეშე არაფერი და არავინ ვართ, ამიტომ ეს უნდა შევიგნოთ და, მგონი, რომ ეს შეგნებაც ჩანს დღეს. კიდევ უფრო მეტი ხალხი გამოვა მედიის დასაცავად“, – განაცხადა სალომე ზურაბიშვილმა.
აქციის მონაწილეები ანთებული ფანრებით რესპუბლიკის მოედნიდან რუსთაველის გამზირისკენ გაემართნენ და პარლამენტის წინ აქციას შეუერთდნენ.
საქართველოს ჟურნალისტური ეთიკის ქარტიის აღმასრულებელი დირექტორის, ლია ჩახუნაშვილის განცხადებით, საქართველოში მედიაგარემო მკვეთრად გაუარესებულია და ჟურნალისტები ხშირად როგორც სიტყვიერი, ისე ფიზიკური თავდასხმის სამიზნეები ხდებიან. მისივე თქმით, ამ გამოწვევებს ახლა ფინანსური დაბრკოლებებიც დაემატა.
“ვიცი, რომ ძალიან ბევრი ჟურნალისტი უკვე 3 თვეა პრაქტიკულად უხელფასოდ მუშაობს და არც იმის პერსპექტივაა, რომ „ქართული ოცნება“ უკან დაიხევს. გადავწყვიტეთ, მივმართოთ საზოგადოებას დახმარებისთვის, რათა ონლაინმედიამ არსებობა შეძლოს და გააგრძელოს იმ საქმის კეთება, რასაც აქამდე ძალიან თავგამოდებით, თავგანწირვით და გულმოდგინებით აკეთებდა“, – განაცხადა ლია ჩახუნაშვილმა ევრონიუს ჯორჯიასთან.
ორი კვირის წინ 22 ონლაინ მედია ერთი სლოგანის ქვეშ გაერთიანდა, 21 აგვისტოს კი მხარდამჭერებთან ერთად საპროტესტო მარში გამართა.
“იქამდე, რომ ჩვენ პოლიტიკური პატიმარი, ჟურნალისტი ქალი, მზია ამაღლობელი გვიზის ციხეში, ნაბიჯ-ნაბიჯ მივდიოდით, სხვადასხვა ცვლილებებით, საკანონმდებლო ცვლილებებით, შანტაჟით, მუქარით, ფუნქციონირების აკრძალვით, დაიხურა უამრავი მედია, განსაკუთრებით რეგიონული და ახლა ჩვენ ვართ იმ მდგომარეობაში, რომ ეს ქართველი ხალხის ბრძოლა უნდა დასრულდეს გამარჯვებით.
ეს არ არის ჩვენი რეალური როლი, მეგაფონი, რომელიც ხელში მიჭირავს არ არის ის ნივთი, რომელსაც შეჩვეული ვარ, პირიქით, მირჩევნია, სცენის უკან ვიდგე და გავაშუქო მოვლენები და ადამიანებს ვუთხრა სიმართლე, მაგრამ მოგვიწია ამის კეთება და საზოგადოებისთვის იმის შეხსენება, რომ თუ არ იქნება სინათლე, ჩვენი ბრძოლა ვერ იქნება წარმატებული და სინათლეში ჩვენ ვგულისხმობთ ინფორმაციას, რომელიც დღესდღეობით ადამიანისთვის აუცილებელი იარაღია.” – განაცხადა ჟურნალისტმა ზურა ვარდიაშვილმა.
