"ქართული ოცნების" დეპუტატი: გლობალური ომის პარტია "მასონების მსგავსი ძალაა", რომელსაც მსოფლიოზე გავლენა აქვს
მარიამ ლაშხი მასონებზე
“ქართული ოცნების” დეპუტატმა, მარიამ ლაშხმა ბრიტანულ პოდკასტზე, The News Agents-ზე ისაუბრა და განაცხადა, რომ გლობალური ომის პარტია “მასონების მსგავსი ძალაა”, რომელსაც მსოფლიოზე გავლენა აქვს. ლაშხმა ასევე აღნიშნა, რომ არ იცის ამ ჯგუფის წევრები პიროვნულად ვინ არიან. მისი თქმით, მტკიცებულებები აქვთ, რომ დასავლეთის ომში ჩათრევის შეთქმულება არსებობს. პოდკასტის წამყვანები ჟურნალისტები ემილი მეიტლისი, ჯონ სოპელი და ლუის გუდალი არიან.
პოდკასტის ეპიზოდი რუსულ კანონს და საქართველოში მიმდინარე აქციებს ეხებოდა.
გუდალის თქმით, ინტერვიუს უფრო დიდი ნაწილი აღარ გააშუქეს.
“შეგვეძლო, ამ ინტერვიუდან კიდევ უფრო მეტი გვეჩვენებინა. ძალიან ბევრი გაგებით, გაოგნებული ვიყავი. მიუხედავად იმისა, სჯერა თუ არა მას იმის, რასაც ამბობს, მრავალმხრივ შემაძრწუნებელი იყო.” – განაცხადა გუდალმა.
ინტერვიუ მარიამ ლაშხთან
– თქვენმა პრემიერმინისტრმა გლობალური ომის პარტიაზე ისაუბრა. რა არის გლობალური ომის პარტია?
– ეს არის რაღაც, რაც… გჯერათ მასონების? ფრიმასონების, მაგალითად, ისინი, ვისზეც ათწლეულების განმავლობაში გვესმოდა და ვამბობდით, რომ მსოფლიო პოლიტიკაზე და ყველაფერზე გავლენა აქვთ. დღეს მე თვითონ, საგარეო ურთიერთობებში ვარ ჩართული და როცა პარტნიორებთან მაქვს საქმე, ამბობენ, რომ კარგია და კარგად მიდიხართ, მაგრამ არის კიდევ მეორე ხმაც…
– მოიცადეთ, ბოდიში, რას აკეთებენ ფრიმასონები? თქვენი აზრით, ფრიმასონები გლობალური ომით მანიპულირებენ?
– მე პირადად უბრალოდ ვადარებ მათ, ფრიმასონებს, რომლებიც ცალკე მდგომი ძალაა, რომლებსაც პიროვნულად არ ვიცნობთ.
– ესე იგი, ფრიმასონები, კიდევ ვინ არიან [გლობალურ ომის პარტიაში]? მარტო მასონები ხომ არ იქნებიან, კიდევ ვინ?
– ანუ, მასონების, რომლებსაც გავლენა აქვთ და ვაღიარებთ, რომ აქვთ გავლენა მსოფლიო პოლიტიკაზე, ამის მსგავსი ძალაა.
– გლობალური ომის პარტიის წევრები მასონების გარდა ვინ არიან?
– ნუ, არ ვიცი…
– თქვენმა პრემიერმინისტრმა ამის შესახებ ისაუბრა და თქვენმა პრემიერმინისტრმა „გლობალური ომის პარტია“ დაადანაშაულა ევროკავშირისა და აშშ-ს მანიპულირებაში…
– რომლებსაც აქვთ გავლენა, ხომ?!
პიროვნულად არ ვიცი, მაგრამ არის დამატებითი ძალა, რომელსაც ასეთი გავლენა აქვს
– მთელი პატივისცემით, თუ თქვენი პრემიერი ადამიანებს ადანაშაულებს, რომ არის ჩრდილოვანი ორგანიზაცია, რომელიც გლობალური მასშტაბით ომს ამზადებს, რომელსაც გავლენა აქვს ევროკავშირზე, ორგანიზაციაზე, რომელშიც გაწევრიანების იმედი გაქვთ, არ გგონიათ, რომ უნდა ვიცოდეთ, რას გულისხმობს?
– კი, რა თქმა უნდა და ჩვენ გვყავს მაღალჩინოსნები, რომლებიც… ესეც (რედ. – ეს ინტერვიუ) მათთან შეხმიანების გზაა.
– ვისთან?
– ანუ, მათ ვეხმიანებით, ვინც არიან…
– მაგრამ ვინ არიან? ეს შეთქმულების პოლიტიკას ჰგავს.
– დიახ, შეგვიძლია შეთქმულება დავარქვათ.
– ესე იგი, გჯერათ, რომ ამჟამად შეთქმულება არსებობს, რომლებიც გლობალური ომს ამზადებს ან დასავლეთს აიძულებს, რომ ომში ჩაერთოს?
– ჩვენ ამის მტკიცებულება ვნახეთ.
[…]
– არ არის მართალი, რომ თქვენმა პარტიამ, თქვენმა პრემიერმა და თქვენმა მილიარდერმა სპონსორმა მოამზადეთ ეს შეთქმულებები გლობალური ომის პარტიის შესახებ, რათა თქვენი ძალაუფლება გაიმყაროთ, თქვენი მოსახლეობა დააკმაყოფილოთ, უთხრათ, რომ ეს ხალხი თქვენს წინააღმდეგაა და ჩვენ მათგან დაგიცავთ? ეს ხომ ადამისდროინდელი ამბავია.
– არა.
– არც კი შეგიძლიათ, რომ დაასახელოთ ვინ არიან ეს ადამიანები. ვინ არიან ამ გლობალური ომის პარტიაში? ეს სრულიად გამოგონილს ჰგავს.
– არა, ეს არ არის გამოგონილი. ეს ფაქტებზეა. მტკიცებულებებზეა.
