მიხეილ სააკაშვილი შიმშილობას აღარ დაიწყებს. არასამთავრობოები ხელისუფლებას მიმართავენ
გაზიარება
გაზიარება
მიხეილ სააკაშვილმა შიმშილობა გამოაცხადა
მიხეილ სააკაშვილი შიმშილობას აღარ დაიწყებს, ამის მიზეზად კი ევროპარლამენტარების თხოვნა დაასახელა, რომლებიც მოუწოდებენ ექსპრეზიდენტს, არ გადადგას ეს ნაბიჯი და ისინი ყველაფერს გააკეთებენ იმისთვის, რომ უზრუნველყონ “მისი მინიმალური უფლებების დაცვა.”
ადვოკატმა ჟურნალისტებთან მიხეილ სააკაშვილის წერილი წაიკითხა.
“ახლა მივიღე გზავნილი ევროპარლამენტარებისგან, რომლებიც კატეგორიულად მთხოვენ, ამ ეტაპზე შევწყვიტო შიმშილობა, რათა საბაბი არ მივცე შესაბამის სამსახურებს, თითქოს მე თვითონ ვიყენებ ზიანს. ამავე დროს, ევროპარლამენტარები მპირდებიან მთელი დიპლომატიური მცდელობების მობილიზებას, რათა უზრუნველყონ ჩემი მინიმალური უფლებების დაცვა. მე ცუდად ვარ იმიტომ კი არა, რომ ძალით არ ვჭამდი, არამედ იმიტომ, რომ მოწამლული ვარ, რაც აისახა კიდეც ევროპარლამენტარების განხილვაში, იმიტომ რომ არასათანადო მოპყრობის მსხვერპლი ვიყავი მრავალი თვის განმავლობაში, რაც მსოფლიოს საუკეთესო ექსპერტების, მათ შორის ნობელის პრემიის ლაურეატების დადასტურებულია“, – წერია სააკაშვილის წერილში.
ექსპრეზიდენტმა მიხეილ სააკაშვილმა შიმშილობის გადაწყვეტილება სასამართლო პროცესში მისი არჩართვის შემდეგ, პროტესტის ნიშნად მიიღო. ადვოკატმა შალვა ხაჭაპურიძემ ჟურნალისტებს მიხეილ სააკაშვილის წერილი წაუკითხა, სადაც ის წერდა, რომ “იშიმშილებდა იქამდე, სანამ არ მიიღებდა მყარ გარანტიებს საკუთარ სასამართლო პროცესზე ვიდეო ლინკით მაინც ჩართვის”.
14 არასამთავრობო ორგანიზაცია კი მოუწოდებს ხელისუფლებას, ჯეროვნად გაიაზროს სახელმწიფოს ვალდებულებები ადამიანის ძირითადი უფლებების სფეროში, შეწყვიტოს გულგრილი დამოკიდებულება მიხეილ სააკაშვილის ჯანმრთელობის მძიმე მდგომარეობისადმი და “იტვირთოს პასუხისმგებლობა მისი სიცოცხლისა და ჯანმრთელობის გადასარჩენად”
საქართველოს მესამე პრეზიდენტი მიხეილ სააკაშვილი სასამართლოს დისტანციურად ვერ ჩაერთო, ამის მიზეზად კი დასახელდა ის, რომ კლინიკა “ვივამედს” შესაბამისი ტექნიკური მოწყობილობები არ აქვს {იგულისხმება სკაიპი ან სხვა ონლაინ საშუალებები].
სააკაშვილის ჯანმრთელობის მდგომარეობის გამო სასჯელისგან გათავისუფლების ან გადავადების საქმეზე მომდევნო პროცესი 22 დეკემბერს, 11 საათზე ჩაინიშნა.
“უკიდურესად აღმაშფოთებელი და ცინიკურია მმართველი პარტიის მაღალჩინოსანთა განცხადებები, რომელიც პატიმრის სიკვდილის შესაძლებლობას სრული გულგრილობით ეკიდება. კერძოდ, საქართველოს პრემიერმინისტრმა განაცხადა, რომ მიხეილ სააკაშვილის სიცოცხლე “უფალს აბარია“ და “მასზე პასუხისმგებლობას ვერ აიღებს“. მმართველი პარტია დღემდე არ აღიარებს სააკაშვილის მდგომარეობის დამძიმებას, რიგი წევრები კი სააკაშვილის სიკვდილს, შეიძლება ითქვას, სიხარულითაც ელოდებიან. მიხეილ სააკაშვილის სიცოცხლე ერთხელ უკვე დადგა კრიტიკული საფრთხის წინაშე, რისი მიზეზიც სწორედ ის იყო, რომ სახალხო დამცველის კონსილიუმის დასკვნას ხელისუფლება კვირების მანძილზე ყურადღებას არ აქცევდა.” – ნათქვამია განცხადებაში.
როგორც არასამთავრობოები განმარტავენ, ნებისმიერი პატიმრის სიცოცხლისა და ჯანმრთელობის მიმართ მსგავსი დამოკიდებულება კატეგორიულად შეუსაბამოა როგორც საქართველოსა და საერთაშორისო სამართალთან, ასევე ევროკავშირის წევრობის პოლიტიკურ მიზანთან. მათი თქმით, მიხეილ სააკაშვილის ჯანმრთელობის მდგომარეობის კიდევ უფრო დამძიმება და ლეტალური შედეგის დადგომა იქნება არამხოლოდ ადამიანის უფლებების უმძიმესი დარღვევა, არამედ პოლიტიკური კოლაფსიც, რომელიც საქართველოს რეპუტაციას გამოუსწორებელ ზიანს მიაყენებს.
12 დეკემბერს, სტრასბურგში საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით პრესკონფერენცია გაიმართა, სადაც ექსპრეზიდენტის შვილმა, ედუარდ სააკაშვილმა საქართველოს ხელისუფლებას მიმართა. მისი თქმით, “ჩვენ არ უნდა მივცეთ მამაჩემს საშუალება, გარდაიცვალოს ციხეში.”
იმავე დღეს მიხეილ სააკაშვილის პატიმრობასა და მისი ჯანმრთელობის მდგომარეობასთან დაკავშირებით, “ამერიკის ხმასთან” კომენტარი გააკეთა ამერიკის სახელმწიფო დეპარტამენტმა. მათი თქმით, მიხეილ სააკაშვილის ჯანმრთელობის დაცვა საქართველოს ხელისუფლების პასუხისმგებლობაა. ასევე, აშშ-ის საგარეო უწყების თქმით, დეპარტამენტი ძალიან ახლოდან აკვირდება საქართველოს “ყოფილი პრეზიდენტის მკურნალობას”.
სასამართლომდე ერთი დღით ადრე კი ევროპარლამენტის ევროპელი კონსერვატორებისა და რეფორმისტების ჯგუფმა (ECR) საქართველოს ხელისუფლებას მოუწოდა დაუყოვნებლივ გაათავისუფლონ მიხეილ სააკაშვილი.
6 დეკემბერს სახალხო დამცველის მიერ შექმნილმა კონსილიუმმა მიხეილ სააკაშვილის ჯანმრთელობის შესახებ დასკვნა მოამზადა. ოთხმა ექიმმა ექსპრეზიდენტი 5 დეკემბერს მოინახულა და მის ჯანმრთელობის მდგომარეობას დეტალურად გაეცნო.
კარდიოლოგ გიორგი კაჭარავას თქმით, ექსპრეზიდენტმა ჯობია, გამოიცვალოს სამკურნალო ადგილი, ხოლო ნევროლოგ თენგიზ წულაძის თქმით, მიხეილ სააკაშვილის ჯანმრთელობის მდგომარეობა აპრილთან შედარებით, “მნიშვნელოვნად” არის გაუარესებული.
ასევე, ექიმების განმარტებით, მესამე პრეზიდენტს აქვს მეოთხე დონის კახექსია, რაც გულისხმობს, რომ სიცოცხლის ხანგრძლივობა რამდენიმე თვე შეიძლება იყოს დარჩენილი.
თავად სახალხო დამცველის, ნინო ლომჯარიას შეფასებით, მიხეილ სააკაშვილის ჯანმრთელობის მდგომარეობა სასჯელი გადავადების მოთხოვნას შეესაბამება.
ასევე, 2 დეკემბერს გამოქვეყნდა ამერიკაში ჩატარებულ ტოქსიკოლოგიურ ექსპერტიზა, რომელსაც პროფესორი დეივიდ სმიტი აწერს ხელს. დასკვნაში წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
