24 თებერვალს რუსთაველზე ფართომასშტაბიანი აქცია იგეგმება
24 თებერვალს თბილისში, რუსთაველის გამზირზე უკრაინის მხარდამჭერი აქცია გაიმართება, რომლის მიზანი, როგორც ორგანიზატორები ამბობენ, ახალი ეროვნულ-განმათავისუფლებელი მოძრაობის დაწყებაა, რაც “საქართველოს დეოკუპაციით დასრულდება.”
მოძრაობა “თავისუფლებისთვის-წინააღმდეგობის ერთიანი ფრონტის”ლიდერის, აკია ბარბაქაძის თქმით, მოხდება საქართველოს გათავისუფლება კოლაბორაციონიზმისგან და მიტაცებული ხელისუფლება ხალხს დაუბრუნდება. მისივე განმარტებით, “ერთად ვდგავართ” და ისინი ბოლომდე ბრძოლას აპირებენ.
“ჩვენი აქციები იქნება ქართველი ხალხის ერთიანობის დემონსტრირებით. ის იქნება მზარდი და ჩვენ კოლაბორაციონისტებს უკან დახევას ვაიძულებთ. მათ ვაიძულებთ, რომ საქართველოს ხელისუფლების სახელით რუსული ინტერესების გატარება შეწყვიტონ და ამაზე უარი თქვან. ჩვენ ვიქნებით ხალხთან, მათი ინტერესების დასაცავად – საქართველოს სუვერენიტეტის, დამოუკიდებლობისა და დემოკრატიის სადარაჯოზე”. – განაცხადა აკია ბარბაქაძემ.
განცხადება გააკეთეს პარტია “დროას”, “გირჩი-მეტი თავისუფლების”, და “სტრატეგია აღმაშენებლის ლიდერებმაც”; ასევე საზოგადოების სხვადასხვა სფეროს წარმომადგენლებმა.
ელენე ხოშტარიას თქმით, 24 თებერვალს ქართველმა ხალხმა აქციაზე კიდევ ერთხელ უნდა აჩვენოს, რომ კრიტიკულ მომენტში ერთად დგომა შეუძლია:
“ჩვენ დღეს აქ განსხვავებული პროფესიების, სხვადასხვა ადამიანები, პარტიები და არაპარტიები შევიკრიბეთ, რომელთაც ერთი რამ გვაერთიანებს – გვაერთიანებს საქართველოს ღირსების, ევროპული პერსპექტივის, დამოუკიდებლობისა და თავისუფლების საკითხი. ამიტომ, გადავწყვიტეთ, ერთად დავდგეთ და ვთქვათ, რომ 24 თებერვალი, როცა რუსული იმპერია კიდევ ერთხელ თავს დაესხა დამოუკიდებელ და თავისუფლების მოყვარე ქვეყანას, უკრაინას, ეს არის წყალგამყოფი.”
ხოშტარიას თქმით, ეს წყალგამყოფია არა მხოლოდ უკრაინისთვის, არამედ მთელი მსოფლიოსთვის, სადაც იყოფა ცივილიზებული მომავლის ქვეყნები და ადამიანები და წარსულისა და ბოროტების რუსეთი, “რომელსაც პერსპექტივა აღარ აქვს”. ამ წყალგამყოფში საქართველოს თავისი სიტყვა აქვს სათქმელი.
“ჩვენ ვთქვით, რომ ამ ქვეყნის სრული უმრავლესობა უკრაინელების, ევროპული მომავლის, ღირსებისა და მორალის გვერდით დგას. 24 თებერვალს რუსთაველის გამზირზე კიდევ ერთხელ უნდა ვანახოთ, რომ ჩვენი კამათების, შეცდომებისა და განსხვავებების მიუხედავად, კრიტიკულ მომენტში ერთად ვდგებით და ვამბობთ – საქართველოს ევროპული განვითარების მომავალი აქვს და ჩვენი ქვეყანა წარსულში არ წავა.” – აღნიშნა “დროას” ლიდერმა.
ორ წელიწადში საქართველოში საპარლამენტო არჩევნებია. ოპოზიციის წინაშე დგას რთული ამოცანა – ხელისუფლებას უნდა ჩამოაშოროს „ქართულ ოცნება“, მმართველი გუნდი 10 წლიანი სტაჟით, რომლის დამფუძნებელი და არაფორმალური ხელმძღვანელი ქვეყნის ყველაზე მდიდარი კაცი – ბიძინა ივანიშვილია.
პარალელურად, ეს არის პერიოდი, როდესაც საქართველოსთვის მოულოდნელად გაიხსნა მნიშვნელოვანი გეოპოლიტიკური ფანჯარა – ქვეყანას აქვს შანსი, უკრაინის და მოლდოვას მსგავსად, მიიღოს ევროკავშირის წევრობის კანდიდატის სტატუსი, თუმცა ამისთვის მან ევროკავშირის რეკომენდაციების 12 პუნქტიანი გეგმა უნდა შეასრულოს.
თუმცა, ოპოზიცია, რომელიც მოვლენების ავანგარდში უნდა იყოს, ბოლო პერიოდში საკუთარი შიდა გარჩევებით უფროა დაკავებული.
ყველაზე მსხვილი პარტია, „ნაციონალური მოძრაობა“ რიგგარეშე შიდა არჩევნების გზით საკუთარი ლიდერების ხელახალ ლეგიტიმაციას ცდილობს, ხოლო სხვა პატარა პარტიები ვერც კოორდინირებულად მოქმედებენ და ვერც ცალ-ცალკე ქმნიან დღის წესრიგს.
