14 ახალი შემთხვევა, სულ 266 - კორონავირუსი საქართველოში

ბოლო 24 საათში საქართველოში კორონავირუსით ინფიცირების 14 ახალი შემთხვევა გამოვლინდა.

13 აპრილის 10:00 საათისთვის, საქართველოში კორონავირუსით ინფიცირების 266 შემთხვევაა დადასტურებული. კარანტინის რეჟიმშია 4872 ადამიანი, ხოლო სტაციონარში მეთვალყურეობის ქვეშ – 453 პირი. 

კორონავირუსით ინფიცირებულთაგან 67 გამოჯანმრთელდა და 3  გარდაიცვალა. 

უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.

პაციენტისა და ექიმის კორონავირუსით ინფიცირების გამო თბილისის ორ კერძო კლინიკაში კარანტინი გამოცხადდა.

კორონავირუსი დაუდასტურდა “თბილისის მედიცინის ინსტიტუტის” ერთ-ერთ ექიმს, რის გამოც გამოკვლევები უტარდებათ კლინიკის თანამშრომლებს და იმ პაციენტებს, რომლებიც იქ მკურნალობდნენ. კლინიკა ამჟამად დაკეტილია და იქ არავის უშვებენ.

დაიხურა ქართულ-ჰოლანდიური ჰოსპიტალიც, სადაც კორონავირუსი 72 წლის ქალს დაუდასტურდა. ის კლინიკაში  6 აპრილს, გულის მწვავე უკმარისობის დიაგნოზით გადაიყვანეს. კლინიკაში მას კორონავირუსზე სწრაფი ტესტი გაუკეთეს. ტესტმა აჩვენა, რომ ის ინფიცირებული არ იყო.

მოგვიანებით ამ ქალის ქმარს კორონავირუსი დაუდგინდა. დაავადებათა კონტროლის ეროვნულმა ცენტრმა 72 წლის ქალს განმეორებითი ანალიზი გაუკეთა ლუგარის ლაბორატორიაში. ანალიზმა აჩვენა, რომ მას კორონავირუსი ჰქონდა.

covid-19 აღმოაჩნდა ხაშურის მუნიციპალიტეტის სოფელ გომში მცხოვრებ ახალგაზრდა ქალსაც. ის პროფესიით თარჯიმანია და კონტაქტი ჰქონდა უცხოელებთან. ქალი თავის მცირეწლოვან შვილთან ერთად ამ დროისთვის საავადმყოფოშია გადაყვანილი, სოფლის მოსახლეობას კი თერმოსკრინინგი უტარდება.

ქობულეთის მუნიციპალიტეტის სოფლებში: გვარაში, მუხაესტატეში, ლეღვასა და წყავრუკაში, სადაც კარანტინია გამოცხადებული, თერმოსკრინინგი 1600-ზე მეტ ადამიანს ჩაუტარდა. მათგან 13 ადამიანს ჰქონდა სიცხე. ექიმები ახლა მათ ჯანმრთელობის მდგომარეობას აკვირდებიან.

• ახლობლები რომ მირეკავდნენ, ზოგს ეტირებოდა – რას ჰყვება კორონავირუსით ინფიცირებული სტუდენტი
• საქართველოში საყოველთაო კარანტინი ცხადდება
• საქართველოში კორონავირუსზე პაციენტის შემოწმების წესი შეიცვალა: ვის გაუკეთებენ ტესტს?
• კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა. კორონავირუსის პამდემიის გავრცელების შეჩერების მიზნით, მარნეულში, ბოლნისში, ლენტეხში და ქობულეთის მუნიციპალიტეტის სოფლებში: გვარაში, მუხაესტატეში, ლეღვასა და წყავრუკაში კარანტინი გამოცხადდა.