საქართველოში სომხეთის პრემიერ-მინისტრის ვიზიტი დაიწყო
გაზიარება
გაზიარება
საქართველოში დღეს დაიწყო სომხეთის პრემიერ-მინისტრის ნიკოლ ფაშინიანის ოფიციალური ვიზიტი.
აეროპორტიდან სომხეთის პრემიერი მთავრობის ადმინისტრაციაში მივიდა, სადაც საქართველოს პრემიერ-მინისტრთან გიორგი გახარიასთან ერთად დახვედრის ოფიციალურ ცერემონიაში მიიღო მონაწილეობა.
სომხეთის დელეგაციას თბილისის აეროპორტში საქართველოს საგარეო საქმეთა მინისტრი დავით ზალკალიანი დახვდა.
„მეზობლებს შორის ასეთი ინტენსიური ორმხრივი ვიზიტები კიდევ ერთხელ ხაზს უსვამს სომხეთისთვის საქართველოს მნიშვნელობას და საქართველოსთვის სომხეთის მნიშვნელობას“,- უთხრა ზალკალიანმა ჟურნალისტებს.
როგორც იგი აღნიშნავს, ვიზიტის ფარგლებში სომხურ-ქართული დელეგაცია ისაუბრებს ყველა ძირითად თემაზე, მათ შორის კორონავირუსის წინააღმდეგ ბრძოლის კოორდინაციაზეც.
„საუბარი შეეხება ვაჭრობას, ეკონომიკას, ენერგეტიკის სფეროში თანამშრომლობას, სატრანსპორტო კომუნიკაციას, კულტურა, ხალხთა შორის ურთიერთობას. ბუნებრივია ასევე ვისაუბრებთ რეგიონული უსაფრთხოების საკითხებზე. საქართველო და სომხეთი გახლავთ ორივე „აღმოსავლეთ პარტნიორობის“ ქვეყნები. წლევანდელი წელი ჩვენთვის მნიშვნელოვანია, რადგან „აღმოსავლეთ პარტნიორობის“ სამიტი გაიმართება. წელს მნიშვნელოვანია პოზიციების შეჯერება, შეჯამება”,- აღნიშნა საქართველოს საგარეო უწყების ხელმძღვანელმა.
მისი თქმით, სომხეთის რესპუბლიკის პრემიერ-მინისტრთან განიხილება ასევე ახალ კორონავირუსთან გასამკლავებლად საჭირო ერთობლივი ქმედებებისა და კოორდინაციის საკითხები:
“ვიზიტი მიმდინარეობს მსოფლიოში მძვინვარე კორონავირუსის ფონზე და მეზობელ ქვეყნებს შორის მნიშვნელოვანია კოორდინაცია, რომ ამ გამოწვევას ერთობლივად გავუმკლავდეთ“, – განაცხადა დავით ზალკალიანმა.
ნიკოლ ფაშინიანი პრემიერის რანგში თბილისში პირველად 2018 წლის მაისში ჩამოვიდა.
ნიკოლ ფაშინიანი ასევე შეხვდება საქართველოს პრეზიდენტს სალომე ზურაბიშვილს და პარლამენტის თავმჯდომარეს, არჩილ თალაკვაძეს. სომხეთის პრემიერ-მინისტრი პატივს მიაგებს ასევე საქართველოს ერთიანობისთვის დაღუპულ გმირთა ხსოვნას.
სომხეთის პრემიერ-მინისტრის ვიზიტი საქართველოში 4 მარტს დასრულდება.