ჟურნალისტ პაველ შერემეტის მკვლელობა კიევში
23 ივლისს ჟურნალისტ პაველ შერემეტს მინსკში დაკრძალავენ. ამის შესახებ მისმა ნათესავებმა განაცხადეს. შერმეტი ბოლო პერიოდში ცხოვრობდა კიევში, სადაც ის 20 ივლისს მოკლეს.
უკრაინაში მოკლული ჟურნალისტის პაველ შერემეტის საქმეზე გამოძება მკვლელობის 6 ვერსიას განიხილავს, – ამის შესახებ ჟურნალისტებს ტელეკომპანია “112 უკარინის” ეთერში უკრაინის უსაფრთხოების სამსახურის ხელმძღვანელის მრჩეველმა იური ტანდიტმა განუცხადა. მისი თქმით, ერთ-ერთ ვერსიად უკრაინის სახელმწიფო უსაფრთხოების წინააღმდეგ მიმართული სპეცოპერაცია სახელდება.
ასევე ერთ-ერთი ვერსიით, შერემეტი მისი პარტნიორის გაზეთ “უკრაინსკა პრავდას” რედაქტორის, ალიონა პრიტულაზე თავდასხმას შეეწირა. ამის შესახებ კიევის პროკურატურის პრესმდივანმა, ნაძეჟდა მაქსიმეცმა ისაუბრა. შერემეტი სწორედ პრიტულას მანქანაში იჯდა, როდესაც ასაფეთქებელი მოწყობილობა ამოქმედდა.
![](http://jam-news.net/Uploads/Publication/1899/ContentImages/Ka-ge/pavel-sheremet.jpg)
კიდევ ერთი მოტივი, რაზეც უკრაინულ “ინტერფაქსთან” შინაგან საქმეთა მინისტრის მრჩეველმა ზორიან შკირიაკმა ილაპარაკა, შერემეტის ჟურნალისტურ საქმიანობას უკავშირდება. მან ამ საქმეში რუსული კვალიც ახსენა.
“ნოვაია გაზეტამ” კი პაველ შერემეტის პარტნიორზე, ალიონა პრიტულაზე დაყრდნობით, გაავრცელა ინფორმაცია, რომ შერემეტს მკვლელობამდე უთვალთვალებდნენ.
პაველ შერემეტის მანქანაში ასაფეთქებელი მოწყობილობა ამოქმედდა
44 წლის ბელორუსი ჟურნალისტი პაველ შერემეტი 20 ივლისს მანქანაში აფეთქების შედეგად გარდაიცვალა. ის “უკრაინსკა პრავდაში” მუშაობდა.
შერემეტის ავტომანქანა, რომლითაც ის რადიოში გადაცემა “ვესტის” ჩასაწერად მიდიოდა, სახლიდან 500-600 მეტრში აფეთქდა. ასაფეთქებელი მოწყობილობა მძღოლის სავარძელთან იყო დამონტაჟებული. აფეთქების შედეგად მანქანას ცეცხლი წაეკიდა.
![](http://jam-news.net/Uploads/Publication/1899/ContentImages/Ka-ge/qafr17eddh4fxzmb4bzj.jpg)
უკრაინულმა “ობოზრივატელმა” ქუჩის კამერის ჩანაწერი გაავრცელა, სადაც ჩანს მანქანის აფეთქების მომენტი.
უკრაინის ეროვნული პოლიციის ძალების ხელმძღვანელის, ხატია დეკანოიძის თქმით, გამოძიებაში უკრაინის პოლიციასა და უსაფრთხოების სამსახურებთან ერთად, ამერიკული FBI-ც მონაწილეობს. გამომძიებლები ამჟამად შერემეტისა და პრიტულას სახლში მუშაობენ, რომლის ავტოსადგომზეც ეყენა მანქანა მკვლელობის წინა ღამით.
განახლებადი ინფორმაცია პაველ შერემეტის მკვლელობის შესახებ იხილეთ ვებგვერდზე – ru.hromadske.ua