აზერბაიჯანის პრეზიდენტმა დონალდ ტრამპს მოუწოდა, იერუსალიმის შესახებ გადაწყვეტილებას გადახედოს

აზერბაიჯანის პრეზიდენტმა ილჰამ ალიევმა სტამბოლში, ისლამური კონფერენციის ორგანიზაციის ქვეყნების საგაგნგებო სამიტზე აშშ–ის პრეზიდენტის ტრამპის მიერ იერუსალიმის ისრაელის დედაქალაქად აღიარების ცალმხრივი გადაწყვეტილება დაგმო.

„საერთაშორისო სამართლის პრინციპებისა და გაეროს უშიშროების საბჭოს რეზოლუციის მიუხედავად, აშშ–ის პრეზიდენტის მიერ კუდსის (იერუსალიმის) ისრაელის დედაქალაქად აღიარება და საელჩოს ამ ქალაქში გადატანის შესახებ მისი გადაწყვეტილება ჩვენს სერიოზულ შეშფოთებას იწვევს. ეს გადაწყვეტილება, შესაძლოა, უარყოფითად აისახოს პალესტინა–ისრაელის კონფლიქტის სამართლიან და ყოველმხრივ დარეგულირებაზე, და ახლო აღმოსავლეთში საშიშ შედეგებამდე მიგვიყვანოს. მიგვაჩნია, რომ აშშ–მა თავის გადაწყვეტილებას უნდა გადახედოს“, – თქვა აზერბაიჯანის პრეზიდენტმა.

ილჰამ ალიევმა თავისი გამოსვლისას დასძინა, რომ კუდსის საკითხზე საერთაშორისო კონფერენცია ჩატარდა. კონფერენციაზე აღმოსავლეთი იერუსალიმის ოკუპაციისა და ალ–აკსის მეჩეთში მორწმუნეების სიარულის შეზღუდვის დამგმობი განცხადება მიიღეს.

„ჩვენ, როგორც ყოველთვის, დღესაც პალესტინელი ხალხის გვერდით ვდგავართ. აზერბაიჯანს ისლამური სოლიდარობის საქმეში დიდი წვლილი შეაქვს“, – განაცხადა პრეზიდენტმა ალიევმა.

მან ისიც გაიხსენა, რომ 2017 წელი აზერბაიჯანში ისლამური სოლიდარობის წლად არის გამოცხადებული.