ერევანში ლუდის ყოველწლიური ფესტივალი ჩატარდა
ფოტოები: ერევნის მერია და shabat.am
ერევანში ლუდის მეოთხე ფესტივალი ჩატარდა. გედების ტბის ტერიტორიაზე ღონისძიების მონაწილეებს მხოლოდ სომხური ლუდის კი არა, ცნობილი მსოფლიო ბრენდებისა და ამ ქაფიანი სასმელისთვის შესაფერისი საჭმლის გასინჯვაც შეეძლოთ. ღონისძიებაში მონაწილეობის მისაღებად ადამიანებს ადგილზევე აჟღერებული ცოცხალი მუსიკა უხმობდა.
როგორც ამ ღონისძიების ორგანიზატორ ერევნის მერიაში განაცხადეს, ლუდის ყოველწლიური ფესტივალი მნიშვნელოვან ადგილს იკავებს დედაქალაქის მოვლენებთან დაკავშირებულ ტურიზმში. ორგანიზატორები ირწმუნებიან, რომ ფესტივალმა უკვე მოასწრო პოპულარობის მოპოვება, მისი მონაწილეების რიცხვი ყოველწლიურად მატულობს.
ამ ფესტივალის მიზანია ერევანსა და მთლიანად სომხეთში ლუდის ტრადიციის აღდგენა, და ადგილობრივებისა და ტურისტებისთვის სომხური ლუდის ქარხნების პროდუქციის გაცნობა.
ფესტივალის განმავლობაში ლუდს საბაზრო ფასზე ორჯერ ნაკლებად ყიდდნენ. უფასოდ გაუმასპინძლდნენ საგანგებო პავილიონებში ჩატარებული კონკურსების მონაწილეებს. კონკურსი სხვადასხვა კატეგორიებად იყო დაყოფილი: ვინ უფრო სწრაფად დაცლიდა კათხას, ვინ შეძლებდა საწრუპით ამის უფრო სწრაფად გაკეთებას. წელს ასევე ჩატარდა კონკურსები: ვინ უფრო სწრაფად გაფრცქვნიდა მიწის თხილს, ან შეჭამდა კიბორჩხალებს. მერიისა და ფესტივალში მონაწილე ლუდის მწარმოებელი კომპანიებისგან საჩუქრები ყველა გამარჯვებულმა მიიღო.
