ეს ინფორმაცია სომხეთის თავდაცვის მინისტრმა გაავრცელა და რუსეთის თავდაცვის მინისტრის მოადგილემ დაადასტურა " />

რუსეთი სომხეთისთვის იარაღის მიწოდებას გააგრძელებს

ეს ინფორმაცია სომხეთის თავდაცვის მინისტრმა გაავრცელა და რუსეთის თავდაცვის მინისტრის მოადგილემ დაადასტურა

რუსეთი 100 მილიონად ღირებული საკრედიტო შეთანხმების ფარგლებში იარაღის მიწოდებას გააგრძელებს. ამის შესახებ სომხეთის თავდაცვის მინისტრმა დავიდ ტონოიანმა განაცხადა:

„ 100-მილიონიანი სესხის ფარგლებში მიწოდების განხორციელება ახლა პროცესშია“. ამავდროულად ტონონიანმა აღნიშნა , რომ სომხეთი  შეიარაღებას მხოლოდ რუსეთისგან  და რუსეთის ეგიდით მოქმედი „კოლექტიური უსაფრთხოების შეთანხმების ორგანიზაციის“ წევრებისგან არ იძენს, არამედ სხვა ქვეყნებისგანაც. 

ინფორმაცია იმის შესახებ, რომ რუსეთმა, შესაძლოა, სომხეთისთვის იარაღის მიწოდება შეწყვიტოს, გაზეთ „კომერსანტში“ გაჩნდა. რესურსი თავის წყაროებს ეყრდნობოდა:

 „რუსეთის ფედერაციის  ორი საწარმოს ტოპ-მენეჯერების თქმით, კონტრაქტების მეორე პაკეტის რეალიზაცია, რომლის მიხედვითაც, სომხეთს  $100 მილიონის ოდენობის სესხი უნდა მიეღო, „ახლა დიდი კითხვის ნიშნის ქვეშაა“.

მოსკოვსა და ერევანს შორის უთანხმოება „კოლექტიური უსაფრთხოების შეთანხმების ორგანიზაციის“ გენერალური მდივნის იური ხაჩატურივის მიმართ სისხლის სამართლის საქმის აღძვრას უკავშირდებოდა.

იური ხაჩატუროვს, ისევე როგორც სომხეთის ყოფილ პრეზიდენტ რობერტ კოჩარიანს, ბრალი  2008 წლის  „1 მარტის“ საქმესთან დაკავშირებით საკონსტიტუციო წყობის დამხობაში ედებათ. მაშინ საპრეზიდენტო არჩევნების შედეგებთან დაკავშირებით ერევნის ქუჩებში  საპროტესტო აქციები მიმდინარეობდა. იმდროინდელმა ხელისუფლებამ საგანგებო მდგომარეობა გამოცხადა, და ქალაქში ჯარი შეიყვანა. დემონსტრაციის დარბევის დროს 1 მარტის ღამეს საბრძოლო იარაღი გამოიყენეს. დაიღუპა 10 ადამიანი.

 „კოლექტიური უსაფრთხოების შეთანხმების ორგანიზაციის“ გენერალური მდივნის წინააღმდეგ სისხლის სამართლის საქმე მოსკოვში არ მოეწონათ. რუსეთის საგარეო საქმეთა სამინისტროს ხელმძღვანელმა სერგეი ლავროვმა სომხეთის ხელისუფლება თავისი პოლიტიკური წინამორბედების დევნაში დაადანაშაულა. ამ ფონზე გააქტიურდა საუბრები იმის შესახებ, რომ რუსეთი საკრედიტო შეთანხმების მიხედვით, სომხეთისთვის იარაღის სრულად მიწოდებას არ აპირებს.

თუმცა, სომხეთის საგარეო საქმე თა სამინისტრო დიპლომატიურად გაწონასწორებული პასუხით გამოვიდა, რამაც, როგორც ჩანს, მოსკოვი დააწყნარა:

„ჩვენ თვალ-ყურს ვადევნებთ საერთაშორისო რეაქციას სომხეთის შიდა საქმეებში მიმდინარე პროცესებთან დაკავშირებით, რაც სამართლებრივი სახელმწიფოსა და დამოუკიდებელი სასამართლოს ჩამოყალიბებით, კორუფციასთან ბრძოლით არის განპირობებული, და რაც ხელისუფლების პრიორიტეტს წარმოადგენს. ამ პროცესებს სომხეთის საგარეო საქმეებთან კავშირი არ აქვს, და გაუგებრობის მიზეზად არ უნდა იქცეს“.

სომხეთის საგარეო საქმეთა სამინისტროს პრეს-მდივანმა ტიგრან ბალაიანმა განაცხადა, რომ სომხეთის საგარეო პოლიტიკის ერთ-ერთ პრიორიტეტს „სომხეთ-რუსეთის ურთიერთობების გაღრმავება წარმოადგენს“.

და უკვე ამის შემდეგ სომხეთში მყოფმა რუსეთის თავდაცვის მინისტრმა ალექსანდრ ფომინმა თქვა, რომ ცნობა „იარაღის მიწოდებაზე უარის თქმის შესახებ – „ეს არაკორეკტული ინფორმაციაა“, და მიწოდება გაგრძელდება.


ასევე წაიკითხეთ