საპრეზიდენტო არჩევნებამდე ხუთი დღით ადრე ივანიშვილმა ჩრდილიდან გამოსვლა გადაწყვიტა" />

რა თქვა კაცმა, რომელიც მართავს საქართველოს? ბიძინა ივანიშვილის ინტერვიუს მთავარი დეტალები

საპრეზიდენტო არჩევნებამდე ხუთი დღით ადრე ივანიშვილმა ჩრდილიდან გამოსვლა გადაწყვიტა

ბიძინა ივანიშვილი. REUTERS/Vincent Kessler

საპრეზიდენტო არჩევნებამდე ხუთი დღით ადრე საქართველოს ყოფილმა პრემიერ-მინისტრმა, მმართველი პარტიის “ქართული ოცნების” თავმჯდომარემ და ქვეყნის ყველაზე გავლენიანმა ადამიანმა ბიძინა ივანიშვილმა გადაწყვიტა ჟურნალისტებისთვის ვრცელი სატელევიზიო ინტერვიუ მიეცა.

ეს მისი პირველი ინტერვიუა საარჩევნო კამპანიის განმავლობაში.

თუ გასული წელს თვითმმართველობის არჩევნების წინასაარჩევნო პროცესში ის საერთოდ არ ჩარეულა,  ამჯერად მან პროსახელისუფლებო კანდიდატის – სალომე ზურაბიშვილის საარჩევნო კლიპშიც მიიღო მონაწილეობა და ვრცელი ინტერვიუს საჭიროებაც დაინახა. 

28 ოქტომბერს საქართველოში საპრეზიდენტო არჩევნებია. ქვეყანა რიგით მეხუთე პრეზიდენტს აირჩევს.

ივანიშვილმა ინტერვიუს ფორმატი თავად მოიფიქრა, ტელეკომპანიები და ჟურნალისტებიც თავად შეარჩია და ინტერვიუს მოდერატორიც თავადვე იყო. ინტერვიუც მხოლოდ მისი პირადი ინიციატივით შედგა.

ივანიშვილმა თავდაპირველად ინტერვიუზე სხვა ჟურნალისტები დაპატიჟა, თუმცა ისინი არ მივიდნენ.  საბოლოოდ ინტერვიუ შედგა სამი ტელეკომპანიის პოლიტიკური თოქ-შოუს წამყვანებთან – ეკა კვესიტაძესთან (რუსთავი 2), დიანა ტრაპაიძესთან (ტვ პირველი) და ირაკლი ჩიხლაძესთან (ტვ იმედი).

ინტერვიუ საღამოს 22.00 საათზე დაიწყო და ორსაათნახევარს გაგრძელდა.

როგორც ვებ-გვერდმა on.ge-მ დაითვალა, ყველაზე მეტჯერ ივანიშვილმა სიტყვები “დამელოდეთ” (91-ჯერ) და “რუსთავი 2” (40 ჯერ) ახსენა.

ივანიშვილი ასევე იყენებდა ფრაზებს “კეთილი იქონიეთ და ზრდილობას მოუხმეთ”, “ელემენტარული კულტურა იქონიეთ და პასუხი დამაცადეთ”, “ზრდილობა გამოიჩინეთ”. ამ ტერმინებით ივანიშვილი ძირითადად ჟურნალისტებს ეკა კვესიტაძეს და დიანა ტრაპაიძეს მიმართავდა.

JAMnews-მა მოკლედ შეაჯამა ყველაზე მთავარი, რაც გუშინდელ ინტერვიუში იყო.

რუსთავი 2-ზე

სოციალური ქსელების უპირობო ჰიტი ბიძინა ივანიშვილის ის ციტატა გახდა, რომელიც  ოპოზიციურ ტელეკომპანია რუსთავი 2-ს შეეხებოდა.

„დღეს რომ გამორთონ „რუსთავი 2“, ქვეყანაში აღმავლობის და აღმშენებლობის მეტს ვერაფერს ნახავთ“, – თქვა მან.

ყოფილი პრემიერი მიიჩნევს, რომ საქართველო რეგიონში ლიდერია ეკონომიკური ზრდის მიხედვით, მაგრამ მოსახლეობა ამას ვერ ამჩნევს, რადგან რუსთავი 2 საპირისპიროს ამტკიცებს.

ივანიშვილის  თქმით, რუსთავი 2-ს საზოგადოების ნაწილი მძევლად ჰყავს აყვანილი და ატყუებს, თუმცა მალე ეს ასე აღარ იქნება:

“რუსთავი 2”-ს არ ექნება საშუალება ამასაც გპირდებით, რომ მოახერხოს განსხვავებული აზრი არ შევიდეს ტელევიზიაში რომ ჩაკეტოს და მძევლად აიყვანოს საზოგადოების ძალიან დიდი ნაწილი”, – თქვა ივანიშვილმა. მისი ეს სიტყვები ტელეკომპანიამ, რომელსაც უკვე წლებია ხელისუფლება სხვადასხვა პრობლემებს უქმნის, მუქარად აღიქვა.

ამ განცხადების შემდგომ ფეისბუკი წალეკა ხუმრობებმა. წერდნენ, რომ გამორთეს თუ არა  რუსთავი 2,  ავტომატურად დასტაბილურდა ლარის კურსი და მაცივარიც სურსათით გაივსო.

ყოფილ პროკურორზე ოთარ ფარცხალაძეზე

ბიძინა ივანიშვილმა ინტერვიუს დროს დაიცვა ყოფილი მთავარი პროკურორი ოთარ ფარცხალაძე.

ფარცხალაძე ბიზნესმენ ზაზა ოქუაშვილის მიერ გამოქვეყნებულ სკანდალურ ფარულ ჩანაწერებში ფიგურირებს. ოქუაშვილი ფარცხალაძეს რეკეტსა და ასევე სპორტის ყოფილი მინისტრის – ლევან ყიფიანის გატაცებასა და ცემაში ადანაშაულებს. ფარცხალაძის მონაწილეობას ამ საქმეში  მოწმობს ფარული ჩანაწერებიც, რომელთა ავთენტურობა ბრიტანეთში გაკეთებულმა ექსპერტიზამ დაადასტურა.

“რატომ უნდა დავსაჯო ფარცხალაძე, გაუგებარია”, – თქვა ივანიშვილმა. მისი თქმით, არ არსებობს არანაირი მტკიცებულება ყოფილი პროკურორის წინააღმდეგ. ფარული ჩანაწერები კი, ივანიშვილის თქმით, ფალსიფიცირებული და დამონტაჟებულია.

ივანიშვილმა ასევე უარყო ზაზა ოქუაშვილის ბრალდება, თითქოს ბიზნესმენები “საქმის გასარჩევად” ბიძინა ივანიშვილთან დადიან. ივანიშვილმა თქვა, რომ ოქუაშვილის თამბაქოს ბიზნესს ჰქონდა პრობლემები და ის მასთან რჩევის საკითხავად მივიდა.

“ბიზნესმენთან შეხვედრა, ბიზნესმენის რანგში დანაშაულად აღიქმება? იცით მე რამდენ ბიზნესმენს ვხვდები? ძალიან კარგია, რომ ისინი დადიან ჩემთან და ასეც გაგრძელდება”,  – თქვა ივანიშვილმა და ამ “ცრუ ინფორმაციის” გავრცელებაშიც ბრალი რუსთავი 2-ს დასდო.

ასევე წაიკითხეთ: იზნესმენი ზაზა ოქუაშვილი ჰყვება, როგორ გამოსძალა მას ბიძინა ივანიშვილმა 4 მილიონი და როგორ ჩაკეტა სპორტის ყოფილი მინისტრი ყოფილმა პროკურორმა  ფარცხალაძემ სარდაფში 

ივანიშვილმა ასევე უარყო ოქუაშვილის მიერ გავრცელებულ ინფორმაცია, თითქოს ივანიშვილმა მას ბიზნეს-პრობლემების მოგვარების სანაცვლოდ ოთხი მილიონი მოსთხოვა:

“ეს კაცი ყველაფერს იწერს და რატომღაც ეს ჩანაწერი დღემდე არ ჩანს” – თქვა ივანიშვილმა.  

სესიაშვილის აუზი წყლის გარეშე  და სხვა მინისტრების და დეპუტატების სახლები

ივანიშვილს ჰკითხეს, თუ რას ფიქრობდა ის მედიით გავრცელებულ ინფორმაციაზე მინისტრებისა და პარლამენტარების უძრავ ქონებასთან დაკავშირებით.

ივანიშვილმა ამ ინფორმაციასაც “რუსთავი 2”-ის მიერ მოგონილი სიცრუე უწოდა.

ივანიშვილის თქმით, რუსთავი 2-ის მიერ ნაჩვენები არც ერთი სახლი არ აუშენებიათ ხელისუფლების წარმომადგენლებს ბოლო წლებში და ბევრი ამ სახლებიდან და მიწის ნაკვეთებიდან საერთოდაც არ ეკუთვნოდა ხელისუფლების წარმომადგენლებს.

ასევე წაიკითხეთ: როგორ მდიდრდებოდნენ ქართველი ჩინოვნიკები: დეპუტატების და მინისტრების ელიტური სახლები

განსაკუთრებით დეტალურად მან დეპუტატ ირაკლი სესიაშვილის სამსართულიან ფეშენებელურ სახლზე ისაუბრა. ივანიშვილმა პირდაპირ ეთერშივე გააკეთა კალკულაცია, თუ რა დაჯდებოდა დეპუტატის სახლი და ჟურნალისტების ყურადღება გაამახვილა იმაზე, რომ სესიაშვილის აუზში წყალი არ არის:

“სესიაშვილის სახლი 310 კვადრატული მეტრია, არის მხოლოდ შავი კარკასი აშენებული და მინებია ჩასმული – მაქსიმუმი ფასი არის 140 დოლარი, როდესაც კომპანიას არ ქირაობ, მისი აშენება შეგიძლია 100 დოლარად და 100 დოლარი რომ გავამრავლოთ 310-ზე გამოვა 31 000 დოლარი. აუზი საერთოდ „კაპიკი“ დაჯდებოდა, არ არის ეს აუზი გაშვებული და არ ფუნქციონირებს“, – განაცხადა ივანიშვილმა.

ივანიშვილის ამ კომენტარის შემდეგ ფეისბუკზე აქტიურად აზიარებდნენ ცარიელი აუზის ფოტოებს და სტატუსებს სესიაშვილის აუზზე.

ხორავას საქმეზე

ივანიშვილმა თქვა, რომ ხორავას ქუჩაზე ორი მოზარდის მკვლელობის საქმე “მთელი ქვეყნის ტრაგედიაა”, თუმცა სახელმწიფოს დანაშაული ამ საქმეში არ იკვეთება.

ყოფილი პრემიერი არ ეთანხმება შვილმკვდარი მამის, ზაზა სარალიძის ბრალდებას, რომ მაღალჩინოსნები ხელს აფარებენ მკვლელებს.

მისი თქმით, უნდა დაველოდოთ სასამართლოს გადაწვეტილებას:

„ჯერ არ დასრულებულა სასამართლო . მხოლოდ პირველი ინსტანცია დასრულდა. მეორე ინსტანცია მიდის დღეს და მერე – მესამე… არსად იკვეთება, რომ დღევანდელ სახელმწიფოს და დღევანდელ ხელისუფლებას რაიმე ინტერესი ჰქონდა ამ მკვლელობაში და საპარლამენტო კომისიამაც ვერაფერი მსგავსი ვერ აჩვენა,” – თქვა ივანიშვილმა.

მისი თქმით, ხორავას საქმის შედარება გირგვლიანის საქმესთან არის ცინიზმი, რადგან გირგვლიანის შემთხვევაში მკვლელი იყო სახელმწიფო.

ივანიშვილმა “მაღალი სტანდარტი” უწოდა ხორავას საქმის გამო ყოფილი მთავარი პროკურორის ირაკლი შოთაძის გადადგომის ფაქტს. თავად ივანიშვილი მიიჩნევს, რომ შოთაძეს ამ საქმეში ბრალი არ მიუძღვოდა.

გაფრთხილება თანაგუნდელებს

საკმაოდ მკაცრი ტონი ჰქონდა ივანიშვილს, როდესაც საკუთარ თანაგუნდელებზე საუბრობდა.

მისი საუბრიდან აშკარაა, რომ ის არ არის კმაყოფილი მმართველი ძალის მუშაობით.

მან საზოგადოებას ერთწლიანი პერიოდიც კი სთხოვა და ამ პერიოდში გუნდის “კიდევ უფრო გაძლიერებას” დაპირდა. მან თქვა, რომ ერთ წელიწადში “ყველაფერს თავისი სახელი დაერქმევა”.

“მე მოვახერხებ რომ ვერტიკალი გუნდში გავამყარო… ნიჭიერები უფრო წინ წამოვიდნენ და უფრო აქტიურები გახდნენ. უფრო მკაცრი მოთხოვნები იქნება “ქართული ოცნების” ყველა წევრის მიმართ. მაქსიმუმ ერთ წელიწადში ჩვენ საზოგადოებაში ყველას თავისი სახელი ერქმევა და ყველას თავის ადგილი ექნება”, – თქვა ივანიშვილმა.

სალომე ზურაბიშვილზე

ივანიშვილმა ბევრი ისაუბრა სახელისუფლებო გუნდის მიერ მხარდაჭერილ კანდიდატზე, სალომე ზურაბიშვილზე და მას ყველაზე ღირსეული ქალბატონი უწოდა.

მან თქვა, რომ ზურაბიშვილის მხარდაჭერა სწორი არჩევანი იყო და ამაში “ქართული ოცნების” ის წევრებიც დარწმუნდნენ, რომლებიც თავიდან ასე არ ფიქრობდნენ.

თუმცა, ივანიშვილმა აღიარა, რომ გუნდში არიან ისეთებიც, რომლებიც დღემდე “კეკლუცობენ” და ზურაბიშვილი არ მოსწონთ.

“ზოგიერთ წევრს შევახსენებ, რომ ნუ კეკლუცობენ და პარტიის პოზიციას პატივი სცენ, – მიმართა მათ ივანიშვილმა, თუმცა არ დაუკონკრეტებია, ვის გულისხმობდა.

ივანიშვილმა აღიარა ის, რაშიც არც აქამდე ეპარებოდა ვინმეს ეჭვი – სალომე ზურაბიშვილის კანდიდატურა მისი პირადი იდეა იყო. კიდევ ერთხელ გამოჩნდა, რომ ასეთ საკვანძო გადაწვეტილებებს ქვეყანაში მხოლოდ ის იღებს. 

მიუხედავად იმისა, რომ მთელი სახელისუფლებო მანქანა, თავად ივანიშვილის ჩათვლით, სალომე ზურაბიშვილის მხარდასაჭერად მუშაობს, ივანიშვილი ინტერვიუს დროს მას “დამოუკიდებელ კანდიდატად” იხსენიებდა.

ასევე წაიკითხეთ: ვინ არის სალომე ზურაბიშვილი, რატომ გახდა ის ივანიშვილის რჩეული და რითი გაანაწყენა მან ბევრი ადამიანი?

ყოფილი პრემიერის ამაყობს თავისი გადაწყვეტილებით და  ფიქრობს,რომ ხელისუფლების მხრიდან საკუთარ კანდიდატზე უარის თქმა და დამოუკიდებელი კანდიდატის მხარდაჭერა მაღალი დემოკრატიული სტანდარტის მაჩვენებელია.

მარიხუანის წარმოებაზე

კიდევ ერთი აღიარება, რომელიც გუშინ ივანიშვილისგან მოვისმინეთ, მარიხუანის თემას შეეხებოდა.

კოალიცია „ქართული ოცნების“ ლიდერი აცხადებს, რომ კოსმეტიკური და სამედიცინო დანიშნულებით მარიხუანის წარმოებაზე მსჯელობაში პირადად იყო ჩართული და ეს იდეა მის მიერ მოწონებულია.

ივანიშვილი ამბობს, რომ აჟიოტაჟის მიუხედავად, ამ თემაზე მსჯელობა არ დასრულებულა და მომავალშიც გაგრძელდება.

ასევე წაიკითხეთ: საქართველოს მთავრობა მარიხუანის წარმოებას და მის ექსპორტს გეგმავს

ყოფილი პრემიერი ამბობს, რომ მარიხუანის სამედიცინო მიზნით კულტივირების მთავარი ხიბლი ამ საქმის შემოსავლიანობაა.

“ეს არის ძალიან დიდი რენტაბელობა…  არის ძალიან დიდი ობიექტური გათვლები იმისა, რომ შეიძლება მილიარდი დოლარის ექსპორტი განხორციელდეს ერთ, ორ და სამ წელიწადში“- განაცხადა ივანიშვილმა. მან ამავე დროს დასძინა, რომ ხელისუფლება არ წავა საზოგადოების წინააღმდეგ, თუ დარწმუნდება, რომ ეს მართლაც ხიფათის შემცველია.

ამ თემაზე საუბრისას ივანიშვილმა აღნიშნა, რომ ექს-პრეზიდენტი მიხეილ სააკაშვილი და ასევე რუსთავი 2-ის დირექტორი ნიკა გვარამია ნარკოტიკებს მოიხმარენ.

ასევე წაიკითხეთ: ქართულმა ეკლესიამ მარიხუანის წარმოების შესახებ მთავრობის კანონპროექტი შეაჩერა

„ნაციონალური მოძრაობა“, არანაირი უფლება არა აქვს გაილაშქროს

მარიხუანას დათესვის და წარმოების წინააღმდეგ…  მინდა საზოგადოებას შევახსენო, რომ „ნაციონალურ მოძრაობას“ უამრავი [ნარკო] მომხმარებელი ჰყავს. ასევე, ასახელებენ თქვენი ტელევიზიის [რუსთვი2] დირექტორსაც. ასევე, მყავს თქვენი ლიდერიც [სააკაშვილი] ნანახი ტელევიზიით [ნარკოტიკების ზემოქმედების ქვეშ].

აგვისტოს ომზე

ბიძინა ივანიშვილის აზრით, წინა ხელისუფლების წინდაუხედავი და „ღალატობრივი ქმედების გარეშე“, რუსეთი ვერ აიხდენდა ოცნებას და 2008 წლის აგვისტოში ვერ დაიპყრობდა საქართველოს ტერიტორიებს.

„სწორედ სააკაშვილი და თქვენი მეუღლეც, თუ გნებავთ, შემოუძღვა რუსულ ჯარს საქართველოში“, – ასე მიმართა ივანიშვილმა ტელეკომპანია „რუსთავი 2“-ის ჟურნალისტ ეკა კვესიტაძეს [კვესიტაძის მეუღლე შოთა უტიაშვილი სააკაშვილის ხელისუფლების დროს შს მინისტრის მოადგილე იყო].

საგარეო კურსზე

ივანიშვილის თქმით, “უნდა ვეცადოთ მაქსიმალურად, მოვახერხოთ და დავალაგოთ ურთიერთობა ჩვენს დიდ მეზობელთან [რუსეთთან], მაგრამ არა ტერიტორიული მთლიანობის ხარჯზე”.

ქვეყნის საგარეო კურსზე საუბრისას, ივანიშვილმა აღნიშნა, რომ საქართველო ახერხებს, რომ იყოს აშშ-ის პარტნიორი და ამავდროულად რუსეთის მხრიდან მდგომარეობის ესკალაციასაც თავს არიდებს, რის გამოც “საქართველოსი ყველას შურს”, თქვა ივანიშვილმა.

„თუ შევხედავთ საქართველოს საგარეო კურსს, ყველას შურს დღევანდელი საქართველოს მდგომარეობის. ვისაც მე ვიცნობ, მაღალი რანგის პოლიტიკოსებს, ხუმრობით ამბობს ყველა, ნახევრად შურით და ნახევრად შექებით, როგორ ახერხებთ ამასო,” – განაცხადა ივანიშვილმა.

მისი თქმით, ასეთი ახლო ურთიერთობა აშშ-სთან საქართველოს არასოდეს ჰქონია. ასევე მან იამაყა, რომ საქართველოს დაბალანსებული ურთიერთობები აქვს ყველა მეზობელთან.

პირადი ცხოვრების ამსახველ ფარულ ჩანაწერებზე 

ჟურნალისტმა ეკა კვესიტაძემ ივანიშვილს გამოუძიებელ საქმეებზე ჰკითხა. ივანიშვილმა ვერ გაიხსენა ორი წლის წინ გავრცელებული სკანდალური ფარული ჩანაწერები, რომლებიც მისი ყოფილი თანაგუნდელების პირად ცხოვრებას ასახავდნენ.

“გეფიცებით თუ ვკეკლუცობდე, რაზე ლაპარაკობთ, მართლა არ მახსოვს”,  – თქვა მან.

2016 წლის 11 მარტს გავრცელდა, სავარაუდოდ, ერთ-ერთი პოლიტიკოსის პირადი ცხოვრების ამსახველი ფარული აუდიოჩანაწერი. 14 მარტს კიდევ ერთი ვიდეო გავრცელდა, რომელიც, პირადი ცხოვრების ამსახველ კადრებთან ერთად, შეიცავდა მუქარას და შანტაჟს კონკრეტული პოლიტიკოსებისა და ჟურნალისტისადმი, რომ თუ ისინი 31 მარტამდე არ დატოვებდნენ თანამდებობებს, მათი პირადი ცხოვრების ამსახველი ჩანაწერების გასაჯაროებაც მოხდებოდა. ეს საქმე, რომელმაც თავის დროზე შეძრა ქვეყანა და მრავალ ადამიანს მორალური და ფიზიკური ზიანი მიაყენა  დღემდე გამოუძიებელია.

 

არაფორმალურ მმართველობაზე

ბიძინა ივანიშვილი მიიჩნევს, რომ ქვეყანაში არანაირი არაფორმალური მმართველობა არ არსებობს და ესეც ჟურნალისტების და არასამთავრობო ორგანიზაციების მიერ მოგონილი მითია.

მიუხედავად იმისა, რომ უკვე ექვსი წელი ქვეყანაში მაღალი თანამდებობის პირების დანიშვნის და გათავისუფლების საკითხები და ასევე სხვა მნიშვნელოვანი თუ უმნიშვნელო ინიციატივები ბიძინა ივანიშვილის კაბინეტში წყდება, ის საკუთარ თავს ქვეყნის არაფორმალურ მმართველად არ მიიჩნევს. [ამას ირიბად და პირდაპირ აღიარებენ მისი გუნდის წევრები და თავად ივანიშვილიც]

“როცა არაფორმალურობაზე საუბრობთ, ცოტა უხერხულია,”- უპასუხა მან ჟურნალისტ დიანა ტრაპაიძის კითხვას.

ჟურნალისტმა ჰკითხა, თუ რატომ მიაჩნია ხელისუფლების ყველა წარმომადგენელს, რომ ქვეყანაში გადაწვეტილებას მხოლოდ ივანიშვილი იღებს.

ივანიშვილი არ უარყოფს, რომ მნიშვნელოვანი გადაწყვეტილებების მიღების პროცესში მონაწილეობს, თუმცა, ფიქრობს, რომ რაკი მმართველი პარტიის თავმჯდომარეა [თავმჯდომარე იგი მხოლოდ აპრილში გახდა],  მას ამის უფლება აქვს.

“მე ვარ პარტიის თავმჯდომარე. ეს არის თანამდებობა და როცა არაფორმალურობაზე საუბრობთ, ცოტა უხერხულია. ამ პარტიას პარლამენტში აქვს უმრავლესობა, მთავრობაც პარლამენტმა დაამტკიცა.. შესაბამისად, პარტიის როლი არის დიდი და მე ვარ ამ პარტიის თავმჯდომარე და რომელ არაფორმალურ მმართველობაზეა საუბარი?” – განაცხადა ივანიშვილმა.

სიღარიბეზე და ღარიბებზე

ივანიშვილმა თქვა, რომ ენდობა იუნისეფის კვლევას, სადაც აღნიშნულია, რომ ქვეყანაში სიღარიბემ მოიმატა. ქვეყანაში სიღარიბის მატება მან ყოფილ პრემიერს კვირიკაშვილს დააბრალა და თქვა, რომ კვირიკაშვილი სწორედ ამისთვის დაისაჯა და წავიდა თანამდებობიდან:

“ქვეყანაში სიღარიბის მატება გამოიწვია რიგ ფაქტორებზე ხელისუფლების რეაქციის დაგვიანებამ, – მიაჩნია ივანიშვილს.

მისი აზრით, მოსახლეობა იმან გააღარიბა, რომ ხალხი იღებდა კრედიტებს, რომელთა გადახდა უჭირდა, ხელისუფლებამ კი, თავის მხრივ, დროულად ვერ აამოქმედა რეგულაციები, რომლებიც კრედიტების გაცემას შეზღუდავდა [ეს რეგულაციები საქართველოში 1 ნოემბრიდან შემოდის].

გაღარიბების კიდევ ორ მიზეზად დასახელდა დევალვაციაც (და არა ინფლაცია)  და ასევე აქციზების ზრდაც, რაც გამოიწვია მოგების გადასახადის გაუქმებამ.

ღარიბებზე ივანიშვილმა სხვა კონტექსტშიც ისაუბრა. მან თქვა, რომ როდესაც ადამიანი ღარიბია, ის ხშირად სხვას და არა საკუთარ თავს აბრალებს ამ სიღარიბეს.

“ღარიბი და გაჭირვებული ადამიანი საკუთარ სიღარიბეს, საკუთარ პრობლემებს, როგორც წესი სხვას აბრალებს. ადამიანებს, როგორც წესი, ძალიან უჭირთ საკუთარ თავი დაადანაშაულონ,” – თქვა მან. 

Facebook Comments

ასევე წაიკითხეთ