ყოფილი ელჩები და დიპლომატები ხელისუფლებას მოუწოდებენ, გაათავისუფლონ ნიკა მელია
საქართველოს მეგობრებმა, ყოფილმა ელჩებმა, დიპლომატებმა და მაღალი თანამდებობის პირებმა ქვეყანაში შექმნილი ვითარების შესახებ ღია წერილი გამოაქვეყნეს, რომელშიც პირდაპირ მოითხოვენ ნიკა მელიას გათავისუფლებას და ამით მოუწოდებენ ხელისუფლებას, გადადგან პირველი დადებითი ნაბიჯი შექმნილი კრიზისული ვითარების განსამუხტად.
წერილის ავტორები ამბობენ (რომელთა რიცხვში ლუკ კოფი, იან კელი, მეთიუ ბრაიზა, ფრენსის ფუკუიამა და სხვები არიან), რომ ისინი საქართველოს მეგობრები არიან, რომლებიც დიდი ხნის განმავლობაში აღფრთოვანებულები იყვნენ ქართველი ხალხის გამძლეობით, შეენარჩუნებინათ საქართველოს დამოუკიდებლობა და ტერიტორიული მთლიანობა, ასევე, აღფრთოვანებას იწვევდა ქართველი ხალხის ერთგულება დემოკრატიული ღირებულებებისადმი.
ასევე, დიპლომატები მხარს უჭერენ საქართველოს მისწრაფებებს ევრო ატლანტიკურ და ევროინტეგრაციის გზაზე, და ისინი დიდი ხნის განმავლობაში მტკიცე ადვოკატირებას უწევდნენ საქართველოს სხვადასხვა საერთაშორისო ორგანიზაციასა თუ მთავრობებთან.
“შესაბამისად, ჩვენ ღრმად შეშფოთებულები ვართ ბოლოდროინდელი პოლიტიკური განვითარებით საქართველოში, მათ შორის საქართველოს მთავრობის გადაწყვეტილებით, შტურმით აეღოთ წამყვანი ოპოზიციური პარტიის ოფისი და დაეკავებინათ მისი ლიდერი“, – წერია განცხადებაში.
მათივე თქმით, ნიკა მელიას არგათავისუფლება შეუძლებელს ხდის გასული წლის არჩევნებისგან გამოწვეული ჩიხის მოგვარებას, რამაც ოპოზიციის მიერ პარლამენტის ბოიკოტი განაპირობა.
ელჩები და დიპლომატები ხას უსვამენ იმას, რომ ერთპარტიული პარლამენტი არ არის ჯანსაღი დემოკრატიის ნიშანი. საქმის ასეთი განვითარება არა მხოლოდ აფერხებს უსაფრთხოების, ეკონომიკის და გლობალური პანდემიის დროს ჯანმრთელობის მდგომარეობას, არამედ აზიანებს საქართველოს, როგორც რეგიონში დასავლეთის სტაბილური პარტნიორის საერთაშორისო იმიჯს და რეპუტაციას:
“ამით მხოლოდ მოსკოვში არიან კმაყოფილები საქართველოში განვითარებული მოვლენებით”
ისინი იმასაც აღნიშნავენ, რომ დემოკრატიას პრობლემები მათ ქვეყნებშიც დგება, თუმცა, დასავლეთში ინსტიტუტები შენარჩუნდა სამართლიანი და თავისუფალი არჩევნების, დამოუკიდებელი სასამართლო სისტემით, ძლიერი სამოქალაქო საზოგადოების და მედიის თავისუფლების წყალობით.
“ყველა მხარემ მხარი უნდა დაუჭიროს თავიანთი ქვეყნის წინსვლას პრობლემის მშვიდობიანი საშუალებებით და სამართლებრივი არხებით მოგვარებით.
მათი საერთო მიზანი იყოს, შედგეს მრავალპარტიული პარლამენტი, რომელიც გამოხატავს ყველა ამომრჩევლის ნებას და ამასთან, ექნება ქართველი ხალხის სრული ნდობა, რათა ქვეყანა წინ წავიდეს, – აღნიშნულია წერილში.
___________________________________
● ევროკავშირის საგარეო მინისტრები “მედიატორთა ჯგუფის” შექმნას აპირებენ
● შარლ მიშელის შუამავლობით ოპოზიცია და ხელისუფლება ერთმანეთს შეხვდა
● პოლიტიკური კრიზისი საქართველოში. იქნება თუ არა ვადამდელი არჩევნები?
_______________________________________
დიპლომატები ხაზს უსვამენ იმას, რომ საქართველომ გაუძლო დემოკრატიის წინა ტესტებს:
“საქართველოს ახლა მორიგი გადამწყვეტი მომენტი აქვს, რომელსაც ზოგიერთი ეგზისტენციალურსაც უწოდებს.“
მათი თქმით, მთავრობამ, როგორც ძალაუფლების მფლობელმა, უნდა გადადგას პირველი ნაბიჯი ოპოზიციის ლიდერის გათავისუფლებით. ეს ხელს შეუწყობს ევროკავშირის ძალისხმევას კომპრომისზე შუამავლობისთვის.
“როგორც საქართველოს მეგობრები, ჩვენ, რა თქმა უნდა, გამოვხატავთ რჩევის გაცემისა და მხარდაჭერის მზადყოფნას და დავეხმაროთ ფასილიტაციაში.
თუმცა, განგრძობადი შედეგები გამომდინარეობს საქართველოს მთავრობის და ოპოზიციის ლიდერების მცდელობიდან, გადაარჩინონ დემოკრატიული ინსტიტუტები“. – ნათქვამია წერილში.
განცხადებას ხელს აწერენ:
- იან ბონდი, ევროპული რეფორმების ცენტრი
- მეთიუ ბრაიზა, ყოფილი სახელმწიფო მდივნის თანაშემწის მოადგილე ევროპისა და ევრაზიის საკითხებში
- კერი კავანაუ, კენტუკის უნივერსიტეტი
- ლუკ კოფი, მემკვიდრეობის ფონდი
- სვანტე კორნელი, ცენტრალური აზია-კავკასიის ინსტიტუტი, ამერიკის საგარეო პოლიტიკის საბჭო
- უილიამ კორტნი, აშშ-ს ყოფილი ელჩი საქართველოში
- ლარი დაიმონდი, სტენფორდის უნივერსიტეტი
- პიერ ეკლუნდი, ევროკავშირის ყოფილი ელჩი საქართველოში
- ფრენსის ფუკუიამა, სტენფორდის უნივერსიტეტი
- ალექსანდრა ჰოლ ჰოლი, გაერთიანებული სამეფოს ყოფილი ელჩი საქართველოში
- გენერალ-ლეიტენანტი ბენ ჰოჯესი
- გლენ ჰოვარდი, ჯეიმსთაუნის ფონდი
- ტომას ჰენდრიკ ილვესი, ესტონეთის ყოფილი პრეზიდენტი
- ჯონათან კაცი, გერმანიის მარშალის ფონდი აშშ
- იან კელი, ჩრდილო-დასავლეთის უნივერსიტეტი; აშშ-ს ყოფილი ელჩი საქართველოში
- დევიდ ჯ. კრამერი, ფლორიდის საერთაშორისო უნივერსიტეტი; სახელმწიფო მდივნის ყოფილი თანაშემწე დემოკრატიის, ადამიანის უფლებებისა და შრომის საკითხებში
- მაიკლ მაკფოლი, სტენფორდის უნივერსიტეტი
- თომას მელია, PEN America; USAID- ის ყოფილი ასისტენტი ევროპასა და ევრაზიაში
- რიჩარდ მაილსი, აშშ-ს ყოფილი ელჩი საქართველოში
- ლორა თორნტონი, დემოკრატიისა და საარჩევნო დახმარების საერთაშორისო ინსტიტუტი; ყოფილი დირექტორი, NDI Georgia
- რენდი შონემანი, ჰალიფაქსის საერთაშორისო უსაფრთხოების ფორუმი
- კურტ ვოლკერი, ნატოში აშშ-ს ყოფილი ელჩი
- კენეტ იალოვიცი, აშშ-ს ყოფილი ელჩი საქართველოში.
![](https://jam-news.net/app/uploads/2021/03/Screen-Shot-2021-03-09-at-13.57.02-1024x767.png)
____________________________________
ნიკა მელია 23 თებერვალს, “ნაციონალური მოძრაობის” შტაბში სპეცოპერაციის შედეგად დააკავეს.
ოპოზიციის ერთ-ერთი ლიდერის დაკავებამ კიდევ უფრო გააღრმავა ქვეყანაში არსებული პოლიტიკური კრიზისი, რომელიც გასული წლის ოქტომბრის საპარლამენტო არჩევნების შემდეგ დაიწყო. ოპოზიციამ არჩევნებს გაყალბებული უწოდა და მათი შედეგები არ აღიარა, პარლამენტს კი ბოიკოტი გამოუცხადა.
მელიას დაკავებამ უპრეცედენტო რეზონანსი გამოიწვია საერთაშორისო საზოგადოებაში. პრაქტიკულად ყველა საერთაშორისო ორგანიზაციამ, რომელიც საქართველოში მუშაობს, ასევე ელჩებმა და დასავლელმა პარტნიორებმა ერთხმად დაგმეს მელიას დაკავება და მას დემოკრატიის გზაზე უკან გადადგმული ნაბიჯი უწოდეს.
დასავლელი პარტნიორები მოუწოდებდნენ ხელისუფლებას და ოპოზიციას დიალოგისკენ. ორივე მხარე გამოხატავს მზადყოფნას მოლაპარაკებების მაგიდასთან დასხდნენ, თუმცა ჯერ ეს არ მომხდარა. ოპოზიციას დიალოგისთვის თავისი პირობა აქვს – პოლიტპატიმრების გათავისუფლება.
![](https://jam-news.net/app/uploads/2021/03/155761091_10222170935196594_3684591908804941221_o-1-1024x576.jpg)