ცდომილება 2 მილიონზე მეტი ადამიანი: ვაქცინაციის უცნაური სტატისტიკა აზერბაიჯანში

აზერბაიჯანში კორონავირუსის საწინააღმდეგოდ ვაქცინირებული პირების ოფიციალური სტატისტიკა ამბობს, რომ ვაქცინის ორივე დოზით აცრილია ქვეყნის თითქმის მთელი ზრდასრული მოსახლეობა. მაგრამ პრეზიდენტის, ილჰამ ალიევის თქმით, სრულად ვაქცინირებულია 18 წელზე უფროსი ასაკის მოქალაქეთა მხოლოდ 60 პროცენტი. მონაცემების ძლიერ შეუსაბამობაზე ყურადღება ოპოზიციის ერთ-ერთმა ლიდერმა გაამახვილა.

• საქართველოში “ასტრაზენეკას” 17 ათასამდე დოზას ვადა გაუვიდა

ცდომილება 2 მილიონზე მეტი ადამიანი

„ჩვენ ახალი მსოფლიო რეკორდი გვაქვს: გუშინ აზერბაიჯანში ვაქცინირებულთა რიცხვმა 100 პროცენტს გადააჭარბა. მსოფლიოში სხვაგან არსად არ არის ასეთი მაჩვენებელი.

ცენტრალური საარჩევნო კომისიის მონაცემებით, ქვეყანაში 18 წელზე უფროსი ასაკის 5 მლნ 257 872 მოქალაქე ცხოვრობს. ოპერატიული შტაბის გუშინდელი მონაცემებით კი, თუნდაც ერთი დოზით ვაქცინირებულია 5 258 418 ადამიანი. ანუ 546 ადამიანით მეტი.

მართალია, სექტემბრიდან ორივე მშობლის თანხმობით 18 წელზე უმცროსი ასაკის ბავშვების ვაქცინაციაც მიმდინარეობს, მაგრამ ჯანდაცვის სამინისტროს ინფორმაციით, ჯერ კიდევ ორი კვირის წინ, მათი რიცხვი 357 ადამიანს შეადგენდა, შეიძლება ვივარაუდოთ, რომ ეს „ზედმეტი“ 546 ადამიანი – სწორედ ის ბავშვები არიან.

ამრიგად, აზერბაიჯანში, ოფიციალურად არ დარჩა არცერთი ადამიანი, რომელიც ვაქცინირებული არ არის. თუკი ეს სიმართლეს არ შეესაბამება, მაშინ შეცდომაა 2 მილიონზე მეტი ადამიანი ამომრჩეველთა სიაში“, – დაწერა 1 ნოემბერს Facebook-ის საკუთარ გვერდზე ოპოზიციური პარტიის, „რესპუბლიკური ალტერნატივის“ ლიდერმა, ილგარ მამედოვმა.

ოპერატიულმა შტაბმა „შეცდომა“ გამოასწორა

ოთხშაბათს, 3 ნოემბერს, აზერბაიჯანის მინისტრთა კაბინეტთან არსებულმა კორონავირუსთან ბრძოლის ოპერატიულმა შტაბმა შეცდომა „გამოასწორა“. ვაქცინირებულთა ოფიციალურ შემაჯამებელ მონაცემებში გამოჩნდა მესამე დოზით აცრილთა რაოდენობის მაჩვენებელი ხაზი – ვაქცინის „ბუსტერ“ დოზით აცრილები.

საბოლოოდ, დაახლოებით 320 ათასი ადამიანი ვაქცინის პირველი დოზით აცრილთა რიცხვიდან „ბუსტერ“ დოზით აცრილთა რიგებში „გადაიყვანეს“.

სინამდვილეში, ამას მარტივი ახსნა აქვს – ვაქცინაციის რიგის რეგისტრაციის ავტომატური სისტემა ვერ ცნობს მესამე დოზას და მას ისე იღებს, როგორც პირველს. ეს ან პროგრამირებისას დაშვებული შეცდომაა, ანკი თავიდანვე ასე იყო ჩაფიქრებული. სისტემის ასეთი ალოგიკური მუშაობა საკუთარ თავზე JAMnews-ის ერთ-ერთმა თანამშრომელმაც გამოცადა. ის მესამე დოზაზე დარეგისტრირდა, მაგრამ სისტემამ ისე ჩაწერა ეს, როგორც პირველი.

„ისინი რომც არ ჩავთვალოთ, რომლებიც მესამე დოზით აიცრნენ, გამოდის, რომ დღეისათვის ვაქცინირებულია ზრდასრული მოსახლეობის 95 (!!!) პროცენტი. ისევ მსოფლიო რეკორდი.

ყველამ იცის, რომ ეს სიმართლეს არ შეესაბამება, მაგრამ შემდეგ ჩნდება კითხვა: თუ მოსახლეობის 95 პროცენტი აცრილია, რას აკეთებს აზერბაიჯანში ტოტალური კონტროლის ინსტრუმენტი, რომელსაც QR-კოდი ეწოდება?“, – წერს უკვე 3 ნოემბერს ილგარ მამედოვი.

პრეზიდენტი განმარტავს

ხუთშაბათს, 4 ნოემბერს, ნიზამი განჯევის ფორუმზე სიტყვით გამოსვლისას, აზერბაიჯანის პრეზიდენტმა ილჰამ ალიევმა განაცხადა, რომ დღეისათვის ქვეყანაში ორივე დოზით აცრილია ზრდასრული მოსახლეობის 60 პროცენტი.

თუ ვაქცინის ორივე დოზით აცრილი 4.4 მილიონი ადამიანი შეადგენს 18 წელზე უფროსი ასაკის მოსახლეობის 60 პროცენტს, მაშინ, მარტივი მათემატიკური გამოთვლით ირკვევა: აზერბაიჯანში 18 წელზე უფროსი ასაკის 7.3 მილიონი ადამიანი ცხოვრობს.

და როგორც ილგარ მამედოვმა თავის განცხადებაში აღნიშნა, ეს ამომრჩეველთა რიცხვზე ზუსტად 2 მილიონი ადამიანით მეტია. ბოლოს ქვეყანაში ამომრჩეველთა ზუსრი რიცხვი ცენტრალურმა საარჩევნო კომისიამ საპარლამენტო არჩევნების წინ, 2020 წლის თებერვალში გამოაქვეყნა.

აღვნიშნავთ, რომ აზერბაიჯანის კონსტიტუციის თანახმად, ხმის მიცემის უფლებით სარგებლობს გამონაკლისის გარეშე ყველა მოქალაქე, რომელსაც კენჭისყრის დღემდე შეუსრულდა 18 წელი.

ჯერჯერობით ცენტრალურ საარჩევნო კომისიას არანაირი კომენტარი არ გაუკეთებია სტატისტიკურ კაზუსებზე.