საქართველოში "ასტრაზენეკას" 17 ათასამდე დოზას ვადა გაუვიდა

დაავადებათა კონტროლის ეროვნული ცენტრის (NCDC) დირექტორის, ამირან გამყრელიძის ინფორმაციით, კორონავირუსის საწინააღმდეგო „ასტრაზენეკას“ ვაქცინის 17 ათასამდე დოზას ვადა გაუვიდა და ის უნდა ჩამოწერონ.

„ასტრაზენეკა“, საერთაშორისო შეფასებით, ერთ-ერთ საუკეთესო ვაქცინად მიიჩნევა. ჩინური წარმოებისა და „ფაიზერის“ შემდეგ, ეს ბევრ ქვეყანაში ყველაზე ხშირად გამოყენებადი ვაქცინაა.

გამყრელიძის შეფასებით, სურდათ, რომ „ასტრაზენეკა“ საქართველოშიც უფრო ფართო მასშტაბით გამოეყენებინათ, მაგრამ, მოთხოვნილება დაბალი იყო.

„ამიტომ, რა თქმა უნდა, ის დოზები, რომელსაც სექტემბერში ვადა გაუვიდა და ასეთი იყო დაახლოებით 3 900 დოზა და ასევე, რომელსაც ოქტომბრის 31-ში გასდიოდა ვადა – ასეთი დარჩა 13 500 დოზა, ანუ სადღაც ერთად აღებული ეს გახლავთ 17 000-მდე დოზა – სამწუხაროდ, გამოუყენებელი გახდა და ის ჩამოიწერება“, – განაცხადა გამყრელიძემ.

ამ 17 000-დან, 15 000 დოზა  დონაციით იყო მიღებული.

ასტრაზენეკა პირველი ვაქცინა იყო, რომელიც საქართველოში შემოვიდა.  ამ ვაქცინით დაიწყო ქვეყანაში აცრები.

• ვაქცინაცია საქართველოში: ვინ რითი იცრება
• ექიმებისა და მეცნიერების მიმართვა: “საქართველოში ვაქცინაციის დონე საგანგაშოდ დაბალია”
• ეკლესია და Pfizer-ი: რატომ ჩააგდო საქართველომ ვაქცინაციის კამპანია
• საქართველოში ვაქცინაციის მოწინააღმდეგთა 37,5%-ი მიზეზად უშვილობას ან სიკვდილს ასახელებს

კორონავირუსის საწინააღმდეგო ვაქცინაცია საქართველოში 15 მარტს დაიწყო. ქვეყანაში აცრები ძირითადად ოთხი ვაქცინით მიმდინარეობს- გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.

როგორც გამყრელიძე განმარტავს, „ასტრაზენეკასა“ და „ფაიზერისგან“  განსხვავებით, ჩინური წარმოების ვაქცინებს ვადა ორიდან სამ წლამდე აქვთ. ამასთანავე, „ფაიზერმა“ ერთი თვის წინ მიიღო გადაწყვეტილება და „ფაიზერის“ ყველა ვაქცინას, რომელიც ინახება -60-90 გრადუსზე, გამოყენების ვადა სამი თვით გაუგრძელდა.

2 ნოემბრის მონაცემებით საქართველოში სულ ჩატარებულია 1 982 593 აცრა. აქედან, 1 038 193 ადამიანი (მოზრდილი მოსახლეობის 36.5 %) ერთი დოზით არის ვაქცინირებული. სრულად აცრილი კი მოზრდილი მოსახლეობის მხოლოდ 33%-ია (942 397 ადამიანი).

ეროვნული გეგმის თანახმად, ქვეყნის მიზანი წლის ბოლომდე მოსახლეობის 60%-ის აცრა იყო.  თუმცა, ბოლო დროს, ქვეყანაში ვაქცინაციის ტემპი საგრძნობლად დაეცა.

თუ აგვისტოს ბოლოს დღეში 20 ათასზე მეტი ადამიანი იცრებოდა, ბოლო პერიოდში დღეში საშუალოდ 3 ათასი დოზა ვაქცინა კეთდება. მაგალითად, გუშინ, 1 ნოემბერს, მხოლოდ 3 369 ადამიანი აიცრა.

ამირან გამყრელიძის თქმით, იმისათვის, რომ აცრების ყოველდღიურმა მაჩვენებელმა მოიმატოს, მეტი ქმედითი ღონისძიებაა საჭირო. 

„ახალ ველოსიპედს ვერ გამოვიგონებთ. თუ რაიმე ძლიერი წამახალისებელი არ იქნება, ან, რაიმე შეზღუდვა არ შემოვიღეთ, ნებაყოფლობით მეტი ადამიანი აღარ აიცრება. აცრები აღარ გაიზრდება”, – ამბობს გამყრელიძე, რომლის შეფასებით, ქვეყანაში რთული ეპიდვითარებაა.

 2 ნოემბერს საქართველოში კორონავირუსით ინფიცირების 5 553 ახალი შემთხვევა დაფიქსირდა, გარდაიცვალა კიდევ 47 ადამიანი.

ვირუსით გარდაცვლილთა საერთო რაოდენობა კი უკვე ათი ათასს გადასცდა – ვირუსის გავრცელებიდან დღემდე ქვეყანაში 10 136 ადამიანი გარდაიცვალა.