The Washington Post: თუ ივანიშვილი პუტინის მხარდაჭერას განაგრძობს, დასანქცირდება

თუ ივანიშვილი პუტინის მხარდაჭერას განაგრძობს დასანქცირდება

ბიძინა ივანიშვილმა უნდა იცოდეს, რომ თუ პუტინის მხარდაჭერას განაგრძობს, დასანქცირდება – ამის შესახებ The Washington Post–ზე გამოქვეყნებულ წერილში ვკითხულობთ, რომლის ავტორები დევნილობაში მყოფი რუსი ოპოზიციონერი, ჭადრაკის დიდოსტატი გარი კასპაროვი და პროფესორი მაიკლ მაკფოლი, აშშ-ს ყოფილი ელჩი რუსეთში და ვოლოდიმირ ზელენსკის მიერ შექმნილი რუსეთის სანქციებზე საერთაშორისო სამუშაო ჯგუფის კოორდინატორი არიან.

კასპაროვისა და მაკფოლის თქმით, სანქცირებული უნდა იყოს ყველა პირი, ვინც უკრაინაში პუტინის ომს მხარს უჭერს, თუნდაც ირიბად ან პასიურად. როგორც წერილის ავტორები განმარტავენ, სანქციები ჯერაც არა დაწესებული ათასობით რუსი ოფიციალური პირისთვის, პარტიის ლიდერებისთვის, რეგიონული მთავრობების მეთაურებისთვის, რუსეთის სახელმწიფოს მიერ კონტროლირებადი ბიზნესების საბჭოს წევრებისთვის, პროპაგანდისტებისთვისა და ომის მხარდამჭერი ცნობადი სახეებისთვის:

“დროა ისინი [სანქცირებულთა] სიაში დავამატოთ. პირები მესამე ქვეყნებიდან, რომლებიც პუტინს ეხმარებიან, როგორიცაა ყოფილი ოლიგარქი ბიძინა ივანიშვილი, საქართველოს დე ფაქტო მმართველი, ასევე უნდა იცოდნენ, რომ სანქციების წინაშე აღმოჩნდებიან, თუ პუტინის ბარბაროსული თავდასხმის მხარდაჭერას არ შეწყვეტენ. ნებისმიერმა პირმა, რომელიც, თუნდაც არაპირდაპირად ან პასიურად, მხარს უჭერს რუსეთის ომს უკრაინაში, საზღაური უნდა გადაიხადოს.”

მაკფოლი და კასპაროვი ასევე წერენ, რომ რამდენიმე ქვეყანა, მათ შორის საქართველო, რუსეთს სანქციების გვერდის ავლაში ეხმარება და მიმდინარეობს კონტრაბანდის გადატანა, რაც საერთაშორისო საზოგადოებამ უნდა აღკვეთოს. ისინი მოუწოდებენ “დემოკრატიულ მთავრობებს”, მეტი ზეწოლა განახორციელონ თავიან კომპანიებზე, რომლებსაც რუსეთი ჯერ არ დაუტოვებიათ.

“უცხოური ბიზნესები, რომლებიც პუტინის საომარ მანქანას ეხმარებიან, თუნდაც მხოლოდ გადასახადების გადახდით, სანქციების წინაშე უნდა აღმოჩნდნენ. ასევე, საერთაშორისო საზოგადოებამ ქვეყნები, როგორიცაა თურქეთი, საქართველო და ყაზახეთი, რომლებიც ახლა არსებული სანქციების გვერდის ავლაში ეხმარებიან, უნდა აიძულონ მიმდინარე კონტრაბანდის ოპერაციების შეწყვეტა”. – წერენ მაკფოლი და კასპაროვი.

● ყველა ამბობს, რომ საქართველოში არაფორმალური მმართველობაა. რაში გამოიხატება ის? მაგალითები
● აზერბაიჯანელი ჟურნალისტი საქართველოს “ჩრდილოვანი მმართველის” წინააღმდეგ
● კელი დეგნანი ივანიშვილთან შეხვედრას ადასტურებს: “არასოდეს ყოფილა საუბარი საქართველოს ომში ჩართვაზე”

აღსანიშნავია, რომ მაიკლ მაკფოლი ჯერ კიდევ ივლისის დასაწყისში ამბობდა, რომ უკრაინის პრეზიდენტის მიერ შექმნილი  საერთაშორისო სამუშაო ჯგუფის ფარგლებში, განიხილავდნენ სანქციების დაწესებას საქართველოს მოქალაქეებისთვისაც, თუმცა მაშინ მას ვინაობები არ დაუკონკრეტებია. 

8 სექტემბერს გამოქვეყნდა USAID-ის დოკუმენტი, რომელშიც ნათქვამია, რომ საქართველოში სახეზეა ქართველი ოლიგარქის მიერ სახელმწიფოს მიტაცება.

2012 წლის შემდგომ პერიოდზე USAID-ი წერს: ოლიგარქიული მმართველობის დომინირება, სახელმწიფო ინსტიტუტების მიტაცება და კორუმპირებული ჩინოსნების დაუსჯელობის სინდრომი.

ბიძინა ივანიშვილის და მისი გარემოცვის სანქცირების თემამ აქტუალობა კიდევ ერთხელ შეიძინა 5 სექტემბერს, როდესაც უკრაინულმა მხარემ “ქართული ოცნების” დამფუძნებელი და საქართველოს ყოფილი პრემიერმინისტრი ბიძინა ივანიშვილი დასანქცირების კანდიდატთა სიაში შეიყვანა. ინფორმაცია უკრაინის საგარეო საქმეთა სამინისტროსა და ანტიკორუფციული სააგენტოს სანქცირების ჯგუფის ვებგვერდზე გავრცელდა.

აღნიშნულ სიაში მოხვედრის მიზეზად რუსეთის მიერ უკრაინაში დაწყებული ომის მხარდაჭერაა დასახელებული. გარდა ამისა, აღნიშნულია, რომ კანდიდატებს რუს ოლიგარქ ევტუშენკოვთან კავშირი აერთიანებს. 12-კაციან სიაში ივანიშვილთან ერთად მოხვდა მისი ძმა, ალექსანდრე ივანიშვილიც. ჩამონათვალშია “ქართული ოცნების” დამფუძნებლის დეიდაშვილი, უჩა მამაცაშვილი და მისი ვაჟი ტიტე მამაცაშვილი.