აფხაზეთის ე.წ. ხელისუფლებაში რუსეთში დაკავებული იურისტის, ირაკლი ბჟინავას მდგომარეობის შემსუბუქებას ცდილობენ
ირაკლი ბჟინავას საქმე
აფხაზეთის ე.წ. პრეზიდენტი ბადრა გუნბა მოსკოვთან განიხილავს რუსეთის საგამოძიებო იზოლატორში მყოფი აფხაზი იურისტის, ირაკლი ბჟინავას ბედს. მის წინააღმდეგ ორი სისხლის სამართლის საქმეა აღძრული. გუნბა ხაზს უსვამს, რომ საკითხი დელიკატურ მიდგომას მოითხოვს.
საკონსულტაციო საბჭოს – პოლიტიკური პარტიებისა და საზოგადოებრივი ორგანიზაციების წარმომადგენლების – სხდომაზე პრეზიდენტმა განაცხადა, რომ აფხაზეთის ხელისუფლება ბჟინავას პატიმრობის პირობებთან დაკავშირებით რუსულ მხარესთან თანამშრომლობს. დაკავებულს საჭირო დახმარებას, მათ შორის ადვოკატების მხარდაჭერას, უწევენ საგარეო საქმეთა სამინისტრო და საკონსულო სამსახური.
„სახელმწიფო უწყებები ამ საკითხზე მუშაობენ. მე პირადად, ჩემი არხებით, ამ თემაზე ჩემს კოლეგებთან ვურთიერთობ, და შესაბამისი სამსახურებიც თანამშრომლობენ“, – განაცხადა ე.წ. პრეზიდენტმა.
მისი თქმით, საკითხი დელიკატურ მიდგომას მოითხოვს, რადგან საქმე სხვა სახელმწიფოს კანონმდებლობას ეხება. ამასთან, გუნბას განცხადებით, აფხაზური მხარე სიტუაციას არ ჩამოშორებია და საკითხზე სხვადასხვა მიმართულებით მუშაობას აგრძელებს.
აფხაზეთისა და რუსეთის ორმაგი მოქალაქეობის მქონე ბჟინავა, რომელიც რუსეთში ცხოვრობს, 2026 წლის 5 თებერვალს დააკავეს და მას შემდეგ საგამოძიებო იზოლატორში იმყოფება.
სისხლის სამართლის საქმის მასალების თანახმად, ბრალის წაყენების საფუძველი გახდა ბჟინავას მიერ 2022 წლის 23 დეკემბერს სოციალურ ქსელში გამოქვეყნებული პოსტი. პუბლიკაცია აფხაზეთში ცნობილი სახელმწიფო აგარაკის რუსეთისთვის გადაცემის შესახებ შეთანხმებას ეხებოდა. ბჟინავამ ეს შეთანხმება გააკრიტიკა და მიიჩნია, რომ ის აფხაზეთის კანონმდებლობას ეწინააღმდეგებოდა.
თავდაპირველად ბჟინავას ბრალი ედებოდა „რუსეთის ფედერაციის უსაფრთხოების წინააღმდეგ მიმართული საქმიანობის განხორციელებისკენ საჯარო მოწოდების ჩადენის განზრახვაში“, რისთვისაც მას სამ წლამდე პატიმრობა ემუქრება.
თუმცა სექტემბრის შუა რიცხვებში რუსეთის საგამოძიებო კომიტეტმა ბჟინავას წინააღმდეგ მეორე სისხლის სამართლის საქმე აღძრა – მას ინტერნეტში ტერორისტ შამილ ბასაევის „საჯარო გამართლებას“ ედავებიან. ეს ბრალდება შვიდ წლამდე თავისუფლების აღკვეთას ითვალისწინებს.
ბრალდების დამძიმების მიუხედავად, ირაკლი ბჟინავას შვიდთვიანი პატიმრობის შემდეგ პირველად მისცეს დედასთან შეხვედრის უფლება. უფლებადამცველ კადირ არგუნის თქმით, რომელიც ბჟინავას მხარდასაჭერად ხელმოწერების შეგროვებით არის დაკავებული, ეს ოჯახისთვის „უდიდესი მხარდაჭერა და რთულ პერიოდში მორალური საყრდენი“ გახდა.
ირაკლი ბჟინავას აფხაზეთში საკმაოდ ფართო მხარდაჭერა აქვს. ადგილობრივი პოლიტიკოსები და საზოგადოებრივი აქტივისტები რეგულარულად მიმართავენ ე.წ. ხელისუფლებას და მისთვის ყოვლისმომცველი დახმარების გაწევას ითხოვენ.
აფხაზეთის ომბუდსმენმა ანას ქიშმარიამ კი ოფიციალურად მიმართა თავის რუს კოლეგას, იანა ლანტრატოვას თხოვნით, ხელი შეუწყოს ბჟინავას საგამოძიებო იზოლატორში პატიმრობის პირობების გაუმჯობესებას და მისი საქმე პირად კონტროლზე აიყვანოს.
პუბლიკაციებში გამოყენებული ტოპონიმები და ტერმინოლოგია, აგრეთვე მათში გამოთქმული მოსაზრებები და შეხედულებები, ყოველთვის არ ასახავს გამომცემლის შეხედულებებსა და პოზიციას
