თბილისში ევროპული საბჭოს პრეზიდენტი ჩამოვიდა. მისგან პოლიტიკური კრიზისის განმუხტვას ელიან

საქართველოში ოფიციალური ვიზიტით ჩამოვიდა ევროპული საბჭოს პრეზიდენტი შარლ მიშელი.

თბილისში იგი უკვე შეხვდა ქვეყნის პრეზიდენტს, სალომე ზურაბიშვილს:

“ჩემი დღევანდელი შეხვედრა აქ ისევე, როგორც გუშინდელი შეხვედრა მოლდოვაში და ხვალინდელი უკრაინაში, არის პარტნიორობის მესიჯი. ევროკავშირს სურს დარჩეს საქართველოს გვერდით, დაიცვას თქვენი სუვერენიტეტი, თქვენი ტერიტორიული მთლიანობა”, – გამაცხადა მიშელმა საქართველოს პრეზიდენტ სალომე ზურაბიშვილთან პირისპირ შეხვედრის შემდეგ, ერთობლივ ბრიფინგზე.

ქვეყნის ოფიციალური პირების გარდა, ევროჩინოვნიკი შეხვდება ასევე ოპოზიციური პარტიების წარმომადგენლებს.

გავლენიანი ევროჩინოვნიკის საქართველოში ვიზიტი განსაკუთრებით მნიშვნელოვანია იმ პოლიტიკური კრიზისის ფონზე, რომელიც ქვეყანაშია შექმნილი.

“როგორც თქვენ იცით, ჩემი ვიზიტი არის პოლიტიკური კრიზისის ფონზე. ეს რა თქმა უნდა, ძალიან აშფოთებს ევროკავშირსაც და მეც პირადად. ევროკავშირი მოუწოდებს ყველა მხარეს, რომ ინტენსიურად იმუშაონ იმაზე, რომ მოხდეს სიტუაციის განეიტრალება. ოპოზიციასა და მთავრობასთან ჩემი შეხვედრის დროს პოლიტიკურ მხარეებს პასუხისმგებლიანი მოქმედებისკენ მოვუწოდებ“, – განაცხადა შარლ მიშელმა.

● პოლიტიკური კრიზისი საქართველოში. იქნება თუ არა ვადამდელი არჩევნები?

ევროჩონოვნიკი თბილისში მოლდოვიდან, აღმოსავლეთევროპული ტურნეს ფარგლებში ჩამოვიდა. საქართველოდან იგი უკრაინაში გაემგზავრება.

შეხვედრების დაანონსებული თემებია ორმხრივი ურთიერთობები ევროკავშირთან, Covid-19- ის წინააღმდეგ ბრძოლა, აღმოსავლეთ პარტნიორობის პერსპექტივები.

“შარლ მიშელის ვიზიტი ცალსახა დადასტურებაა, რომ ევროკავშირი გვერდში უდგას საქართველოს, როგორც უმნიშვნელოვანეს პარტნიორს რეგიონში,” – აღნიშნავს საქართველოს საგარეო საქმეთა მინისტრი დავით ზალკალიანი.

მინისტრი ადასტურებს, რომ შეხვედრებზე საუბარი შეეხება ქვეყანაში არსებულ პოლიტიკურ ვითარებას და მისი დაძლევის გზებს.

“საქართველოს ხელისუფლება დაინტერესებულია პოლიტიკური პროცესების კონსტრუქციულ ჩარჩოში, დიალოგის რეჟიმში გადატანით. ეს არაერთხელ გაჟღერდა ყველა დონეზე და დიალოგს და პროცესების კონსტრუქციულად განვითარებას ემხრობიან ჩვენი პარტნიორები ევროკავშირიდან”,- განაცხადა მან.

ოპოზიცია იმედოვნებს, რომ შარლ მიშელის ვიზიტი მნიშვნელოვან როლს შეასრულებს ქვეყანაში პოლიტიკური კრიზისის განმუხტვაში.

“მე იმედი მაქვს, რომ ეს ვიზიტი იქნება მნიშვნელოვანი ქვეყანაში პოლიტიკური კრიზის განმუხტვის თვალსაზრისით, თუ „ქართული ოცნება“ გამოიჩენს საკმარის პოლიტიკურ სიბრძნეს, რათა მოუსმინოს ჩვენს დასავლელ პარტნიორებს, მათ გზავნილებს, რომ ქვეყანაში პოლიტპატიმრების არსებობა, პოლიტიკური კრიზისის გამწვავება ურტყამს ჩვენი ქვეყნის სტრატეგიულ ინტერესებს“, – განაცხადა “ერთიანი ნაციონალური მოძრაობის” წარმომადგენელმა, სალომე სამადაშვილმა.

მისი თქმით, მიშელის ვიზიტი ჯერ მოლდოვაში და მერე საქართველოში “არის გზავნილი რუსეთისთვის, რომ ევროკავშირი საკუთარ სტრატეგიულ ინტერესებს ამტკიცებს რუსეთის სამეზობლოში”.

_____________________________________________________________________________

● ევროპული საბჭოს პრეზიდენტი ერთ-ერთი ყველაზე მაღალი რანგის თანამდებობაა ევროკავშირში. ის ევროკავშირის მთავარი წარმომადგენელია საერთაშორისო არენაზე.

● ბელგიელი პოლიტიკოსი შარლ მიშელი ამ თანამდებობაზე 2019 წელს დაინიშნა. მანამდე მიშელი ხუთი წლის განმავლობაში ბელგიის პრემიერ-მინისტრი იყო.

● ევროპული საბჭო (European Council) ევროკავშირის მთავარი პოლიტიკური ორგანოა. საბჭოს წევრები მხოლოდ ევროკავშირის ქვეყნების ლიდერები არიან. ევროპული საბჭო არის ის ორგანო, რომელიც განსაზღვრავს ევროკავშირის განვითარების მთავარ სტრატეგიას და პოლიტიკის გენერალურ ხაზს.