"პირადი ცხოვრების ინფორმაციის ხელყოფა" - რა ვიცით სუს-ის ყოფილი მაღალჩინოსნის დაკავებაზე
სოსო გოგაშვილის დაკავება
საქართველოს უსაფრთხოების სამსახურის უფროსის ყოფილი მოადგილის, სოსო გოგაშვილის დაკავების შესახებ სუს-ში აცხადებენ, რომ ყოფილი მაღალჩინოსანი არა ახალ, არამედ მიმდინარე გამოძიების ფარგლებში დააკავეს.
სოსო გოგაშვილის სავარაუდო ბრალდება პირადი ცხოვრების ამსახველი ინფორმაციის ან პერსონალური მონაცემების ხელყოფაა.
გოგაშვილის დაკავების შემდეგ სამართალდამცველები გონიოში მისი შვილის, ნინი გოგაშვილის სახლში გასაჩხრეკად მივიდნენ. ნინი გოგაშვილის მიერ გადაღებულ ვიდეოში გამომძიებელი მას ჩხრეკის შესახებ განჩინებას აცნობს და ეუბნება, რომ განჩინება გაცემულია სსკ-ის 157-ე მუხლის მე-4 ნაწილით მიმდინარე გამოძიების ფარგლებში.
157-ე მუხლი პირადი ცხოვრების ამსახველი ინფორმაციის ან პერსონალური მონაცემების ხელყოფას ითვალისწინებს:
1. პირადი ცხოვრების ამსახველი ინფორმაციის ან პერსონალური მონაცემების უკანონოდ მოპოვება, შენახვა, გამოყენება, გავრცელება ან ხელმისაწვდომობის სხვაგვარი უზრუნველყოფა, რამაც მნიშვნელოვანი ზიანი გამოიწვია,ისჯება ჯარიმით ანდა გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით სამ წლამდე.
2. პირადი ცხოვრების ამსახველი ინფორმაციის ან პერსონალური მონაცემების უკანონოდ გამოყენება ან/და გავრცელება ამა თუ იმ ხერხით გავრცელებული ნაწარმოების, ინტერნეტის, მათ შორის, სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით, რამაც მნიშვნელოვანი ზიანი გამოიწვია, −ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ოთხ წლამდე.
3. ამ მუხლის პირველი ან მე-2 ნაწილით გათვალისწინებული ქმედება, ჩადენილი:
ა) ანგარებით;
ბ) არაერთგზის;
ისჯება ჯარიმით ან თავისუფლების აღკვეთით ვადით ხუთ წლამდე.
4. ამ მუხლის პირველი, მე-2 ან მე-3 ნაწილით გათვალისწინებული ქმედება, ჩადენილი იმ პირის მიერ, რომელსაც სამსახურებრივი მდგომარეობის, პროფესიული საქმიანობის ან სხვა გარემოების გამო ევალებოდა ამ ინფორმაციის ან მონაცემების დაცვა ან რომელმაც აღნიშნული ქმედება ჩაიდინა სამსახურებრივი მდგომარეობის გამოყენებით,
ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
სოსო გოგაშვილის ცოლის თქმით, მისი მეუღლე 3 მუხლით არის დაკავებული და მან დაინახა, როგორ ამოდეს იარაღი ლეიბის ქვეშ:
“შევარდნენ ოთახში, ამ დროს მივყვებოდი, რას აკეთებთ-მეთქი, ჩემი თვალით დავინახე, ბიბლიაზე დავიფიცებ, პატრიარქთანაც მივალ, ლეიბის ქვეშ ამოდეს იარაღი. გამოხსნეს კარადა და კალაშნიკოვი [დადეს] როგორ ფიქრობთ, 13 გაფორმებული იარაღი აქვს ჩემს მეუღლეს და ეს 2 იარაღი უკანონო ჰქონდა?! შევეწინააღმდეგე და ღამბაშიძემ მომკიდა ხელები, დაუძახა ბიჭებს, აქ რა უნდა, რატომ ამოიყვანეთო. ხელები მტკივა.”
მისივე ინფორმაციით გოგაშვილს აქვს დაზიანება ბეჭზე, რომელიც დაკავებისას მიიღო, ასევე, “მარჯვენა ლოყა აქვს დასიებული”.
როგორც გოგაშვილის ცოლი ამტკიცებს, რატომაც მოიშორეს, ეს იყო უცხოელებთან კონტაქტი.
“ვერც წილები უნახეს, ვერც სიბინძურეები. ჩემმა მეუღლემ თქვა, სანამ პარტიარქი ცოცხალი იქნება და პატრიარქს ვინმე შეეხება უდიერად, მზად იყავი, რომ მე მის მაგივრად მივდივარ ტყვიაზეო. არა მარტო დიპლომატიურ კორპუსს, ყველას შეხვდა, არასამთავრობოებსაც. მე მინდა, სახალხო დამცველს მივმართო, ძალიან ვთხოვ, დამეხმაროს, მე არ ვიცი, ჩემი მეუღლე სად წაიყვანეს.” – ამბობს თეა მარტყოფაშვილი.
რას ამბობენ ექსპერტები
გია ხუხაშვილი, ექსპერტი:
“გოგაშვილის დაკითხვას რომ აზრი არა აქვს, გასაგებია. ყველა მისი დანაშაული ერთობლივი დანაშაულია და ისედაც კარგად იციან.ასე რომ, მას ახლა კი არ კითხავენ, საქმეს ურჩევენ. შეიძლება ჩაცუცქულებიც არიან.”
ხუხაშვილის თქმით, ქვეყნის ადგილი, სადაც დამნაშავედ ცხადდები არა სისტემურ დანაშაულში მონაწილეობის, არამედ მისი მხილებისთვის, ევრო-კავშირში არ არის.
დავით ზურაბიშვილი, პოლიტიკის კომენტატორი:
“ისე, ხომ უნდა მოახერხო მთავრობამ, რომ ნიკა გვარამიაც პოლიტიკური მოტივით გყავდეს დაპატიმრებული და სოსო გოგაშვილიც.”
თამთა მიქელაძე, სოციალური სამართლიანობის ცენტრი:
“გოგაშვილის დაკავების საქმეზე განცხადება პროკურატურას ჯერ არ გაუკეთებია. ამიტომ საქმის შინაარსზე მსჯელობა რთულია და მომავალში უფრო ბევრის თქმა იქნება შესაძლებელი.
გოგაშვილი არის ის ოდიოზური ფიგურა, რომელსაც მაჩალიკაშვილების ოჯახის უმძიმესი ტრაგედია უკავშირდება და ჩემი წარმოდგენები მასზე უკიდურესად ცუდია. ეს იყო ადამიანი, რომელიც გარდა იმისა, რომ სპეცოპერაციაში მონაწილეობდა, შემდგომ პერიოდში მაჩალიკაშვილების ოჯახის დეჰუმანიზებას ახდენდა ორგანიზებულად და ჩვენ ორგანიზაციაზეც აბსურდს და უმძიმეს ბრალდებებს ავრცელებდა, თემირლანის მშობლების დაცვის გამო.
ამის მიუხედავად, არ მაქვს განცდა, რომ ეს რაიმენაირი სამართლიანობის აღდგენა შეიძლება იყოს (მით უფრო, რომ მაღალი ალბათობით მისი დაკავება თემირლან მაჩალიკაშვილის საქმეს არ უკავშირდება). სამართლიანობის აღდგენა სამართლიან და დამოუკიდებელ მართლმსაჯულების სისტემაში ხდება შესაძლებელი, რომელიც დაცლილია პოლიტიკური დაინტერესებისგან. ახლა კი აშკარაა, რომ აქ პოლიტიკური დაინტერესება ჩანს და შეიძლება სამართლიანი მართლმსაჯულებაც ვერ მიიღოს. მისი დაკავების მანერაც მიუღებელი იყო. სხვათა შორის მისი დაკავება გუშინ პოსტ ტვ-ზე დააანონსა შალვა რამიშვილმა. მანამდე ამ კვანძის გახსნა გიორგი გაჩეჩილაძემ დაიწყო.
ყველა შემთხვევაში ეს საქმე დაკვირვებას მოითხოვს. მისი შვილი ახალ საიდუმლო ინფორმაციაზე უთითებს, რომელსაც მძიმე პოლიტიკური შინაარსი აქვს და რომელიც თითქოსდა გადაცემულია დიპლომატიური კორპუსისთვის და მედიისთვის. ყველაფერი მალე გახდება ცნობილი, როგორც ჩანს.”
გუშინ, 15 ივლისს, ღამით სოსო გოგაშვილი დააკავეს. დაკავების ამსახველი ვიდეო მისმა ცოლმა გაავრცელა – ვიდეოში ჩანს, როგორ შედის სპეცრაზმი სახლში, გოგაშვილს იატაკზე აწვენს და აკავებს.
გოგაშვილის დაკავებამდე რამდენიმე დღით ადრე, 13 ივლისს, ხელისუფლებასთან დაახლოებულმა ტელეწამყვანმა გიორგი გაჩეჩილაძემ [უცნობი] გაავრცელა “სკანდალური ჩანაწერი”, რომელიც ასახავს “მთავარი არხის” გადაცემა “პოსტ ფაქტუმის” სარედაქციო ჯგუფის საუბარს და ერთ-ერთი სიუჟეტის დაგეგმვას.
ჩანაწერის ფიგურანტი ჟურნალისტები – გიორგი გაბუნია, ლაშა კვესელაძე, გიორგი გვიშიანი და ეკა სარია – ვარაუდობენ, რომ მათი საუბარი უკანონოდ, სავარაუდოდ, სახელმწიფო უსაფრთხოების სამსახურმა ჩაიწერა.
ჩანაწერში საუბარია არჩევნების გაყალბების სქემის შესახებ, რომელზე ინფორმაციაც ჟურნალისტებს სახელმწიფო უსაფრთხოების სამსახურის უფროსის ყოფილმა მოადგილემ, სოსო გოგაშვილმა მიაწოდა.
