კომენტარი: სოხუმიდან ფრენების ფონზე თავმოყვარე ხელისუფლება საპირწონე ზომებს მიიღებდა

სოხუმიდან ფრენები

სოხუმიდან ფრენების ფონზე თავმოყვარე ხელისუფლება საპირწონე ზომებს მიიღებდა – ქვეყანას რომ ჰყავდეს პრემიერმინისტრი, მას უკვე გამოცემული ექნებოდა აქტი რუსეთიდან საქართველოში პირდაპირი ფრენების შეჩერების შესახებ, – ასე ეხმაურება სოხუმის აეროპორტიდან რუსეთში ფრენებს ორგანიზაცია “სამოქალაქო იდეის” დამფუძნებელ თინა ხიდაშელი.

32 წლის შემდეგ მოსკოვიდან სოხუმში პირველი რეგულარული ავიარეისი შესრულდა. UVT Aero-ს ავიახაზების კომერციული თვითმფრინავი ვნუკოვოს საერთაშორისო აეროპორტიდან გაემგზავრა და სოხუმში ოკუპირებული აფხაზეთის პირველი დე ფაქტო პრეზიდენტის, ვლადისლავ არძინბას სახელობის აეროპორტში დაფრინდა. 

თვითმფრინავს აეროპორტში, ოკუპირებული აფხაზეთის სხვა წარმომადგენლებთან ერთად, ე.წ. პრეზიდენტი ბადრა გუნბა, ე.წ. ვიცეპრეზიდენტი ბესლან ბიგვავა, ე.წ. პრემიერმინისტრი ვლადიმირ დელბა და რუსეთის პრეზიდენტის ადმინისტრაციის ხელმძღვანელის მოადგილე სერგეი კირიენკო დახვდნენ. 

თინა ხიდაშელი: “ტექნიკურადაც კი, ოდნავ საკუთარი თავის პატივისცემა რომ ჰქონდეს “ქართულ ოცნებას” ამ ფონზე და ამ მოვლენის კვალობაზე, ყველა პირდაპირი რეისი დღესვე გაუქმებული უნდა იყოს თბილისის აეროპორტში, ისევე, როგორც, არ ვიცი, ქუთაისში და ბათუმშიც ალბათ, დაფრინავენ რუსები პირდაპირ, მაგრამ, ნუ, გასაგებია, რომ არც სახელმწიფოებრივი თავმოყვარეობა აქვთ მათ და არც არაფერი, მათთვის მთავარი არის, რომ მათი კლანის წევრებმა ფული აკეთონ და, როგორც ჩანს, ამ ქართულ-რუსულ ურთიერთობებში ყველაზე უფრო დიდ ფულს აკეთებენ, ამიტომ აქვთ მაღალი ხარისხის ტოლერანტობა მსგავსი ტიპის მოვლენების მიმართ.

ნებისმიერი, საკუთარი თავის პატივისმცემელი ხელისუფლება აუცილებლად მიიღებდა საპირწონე ზომებსა და გადაწყვეტილებებს და ამას მარტივ ენაზე ჰქვია იმ პირდაპირი რეისების გაუქმება და აკრძალვა, რომლებიც დღეს რუსეთიდან საქართველოში მინიმუმ აეროპორტში გვაქვს.

ქვეყანას რომ ჰყავდეს პრემიერ-მინისტრი (უბრალოდ არ გვყავს, “ქართული ოცნების” თვითმარქვია ადამიანი გვყავს და თავისთავს პრემიერ-მინისტრს ეძახის), მას უკვე აქტი გამოცემული ექნებოდა პირდაპირი ფრენების შეჩერების შესახებ – ეს არის ერთადერთი ადეკვატური ზომა ასეთ დროს და მერე გააკეთონ რუსებმა არჩევანი, რა ურჩევნიათ მათ მოქალაქეებს – სოხუმში იფრინოს შვიდმა კაცმა, თუ შვიდი ათასმა საქართველოს დანარჩენი აეროპორტები გამოიყენონ იმ მიზნებისთვის, რისთვისაც იყენებენ. სრული კატასტროფაა, რაც ხდება ჩვენს აეროპორტებში რუსულ ავიაკომპანიებთან დაკავშირებით.”