შალვა შავგულიძემ, ნინო გოგუაძემ და სანდრო ბარამიძემ „თავისუფალი დემოკრატები“ დატოვეს

„თავისუფალი დემოკრატების“ ლიდერებმა – შალვა შავგულიძემ, სანდრო ბარამიძემ და ნინო გოგუაძემ პარტია დატოვეს. შავგულიძის განცხადებით, მათ პარტიის დატოვება პარტიის გამგეობაში შექმნილი არაჯანსაღი ვითარების გამო გადაწყვიტეს. “თავისუფალი დემოკრატების” ყოფილი ლიდერი აცხადებს, რომ პარტიის დატოვების შემდეგ ისინი „ევროპულ საქართველოსთან“ ითანამშრომლებენ.

განცხადებაში, რომელიც შალვა შავგულიძემ ფეისბუქზე გამოაქვეყნა, ის გამგეობაში შექმნილი ვითარებაზეც ამახვილებს ყურადღებას და წერს,  რომ პარტია და მისი გამგეობა ერთხმად უჭერდა მხარს „ევროპულ საქართველოსთან“ საარჩევნო ბლოკის შექმნას და საპარლამენტო არჩევნებში ამ სახით მონაწილეობას. ასევე შეთანხმებული იყო საარჩევნო სიაც. 

“სრულიად მოულოდნელად, დაახლოებით, 1 თვის წინ, გამგეობის უმრავლესობამ შეცვალა პოზიცია პარტიის საარჩევნო სიის თაობაზე.

კერძოდ, მათ დააყენეს საკითხი, რომ სიაში მეორე ნომრად დასახელებულიყო 2016 წლის საპარლამენტო არჩევნებში ლაგოდეხის საარჩევნო ოლქში „თავისუფალი დემოკრატების“ მაჟორიტარობის კანდიდატი ვახტან მჭედლიძე. მე არ დავეთანხმე ამ პოზიციას, ვინაიდან ვახტანგ მჭედლიძეს 2017 წლის თებერვალში გამგეობის წევრად დანიშვნის შემდეგ, მთელი 3 წლის მანძილზე არავითარი კომუნიკაცია პარტიასთან არ ჰქონია,“ – ამბობს შავგულიძე და დასძენს, რომ ვახტანგ მჭედლიძე სიაში ნინო გოგუაძის და სანდრო ბარამიძის წინ ყოფნას არ იმსახურებდა. 

შავგულიძე აცხადებს, რომ გამგეობის წევრების მიმართ გაჩნდა უნდობლობა და ეს უნდობლოა კიდევ უფრო განმტკიცდა მაშინ, როდესაც „ქართული ოცნების“ მაჟორიტარობის 30 კანდიდატის წარდგენის საზეიმო ცერემონიალს მხარდამჭერის სტატუსით დაესწრო “თავისუფალი დემოკრატების” გამგეობის წევრი და პარტიის საგარეო მდივანი, ექიმი დევი ტაბიძე. 

“სავალალო ის არის, რომ არც თავად დევი ტაბიძე და არც გამგეობის ზემოხსენებული წევრები, პრობლემას ამ გარემოებაში ვერ ხედავენ”, – ამბობს შავგულიძე. 

შავგულიძე აცხადებს, რომ ის ვეღარ იღებს პასუხისმგებლობას პარტიის გამგეობის აღნიშნული წევრების მოქმედებებზე.

ის პარტია – “თავისუფალი დემოკრატების” ნგრევაში მმართველ პარტიას  – “ქართულ ოცნებას” ადანაშაულებს: 

“ივანიშვილის ხელისუფლებამ „თავისუფალი დემოკრატების“ რიგების შერყევა თავდაპირველად 2014 წლის შემოდგომაზე, ხოლო შემდეგ 2016 წლის საპარლამენტო არჩევნების დროს მოახერხა. მსგავსმა სიმპტომებმა ამჟამად, 2020 წლის არჩევნების წინ იჩინეს თავი. მოხარული ვიქნები, თუ ჩემი შიში არ გამართლდება და „თავისუფალ დემოკრატებში“ დარჩენილი ადამიანები „ქართული ოცნების“ პრორუსული ხელისუფლების ორბიტაზე არ აღმოჩნდებიან,” – წერს შავგულიძე. 

შალვა შავგულიძე გაერთიანებული ოპოზიციის მაჟორიტარი დეპუტატობის კანდიდატია. 2020 წლის ოქტომბრის საპარლამენტო არჩევნებში ის კენჭს თბილისში, მთაწმინდა-კრწანისის ოლქში იყრის.

მე-8 მოწვევის პარლამენტში შალვა შავგულიძე ვაკის მაჟორიტარი დეპუტატი იყო კოალიცია „ქართული ოცნებიდან“. 

2019 წლის შუალედურ საპარლამენტო არჩევნებში შავგულიძე „ევროპული საქართველო-თავისუფალი დემოკრატების“ კანდიდატი იყო მთაწმინდის ოლქში, სადაც „ქართული ოცნების“ კანდიდატთან, ლადო კახაძესთან დამარცხდა.