საქართველოში უმუშევრობის დონემ 22 პროცენტს გადააჭარბა
საქსტატის მონაცემებით, 2021 წლის მეორე კვარტალში, წინა წლის ანალოგიურ პერიოდთან შედარებით, უმუშევრობის დონე 3.8 პროცენტით გაიზარდა და 22.1 პროცენტი შეადგინა.
ამასთან ერთად, ეკონომიკურად აქტიურმა მოსახლეობამ შრომისუნარიანი მოსახლეობის 51.4 პროცენტი შეადგინა.
უმუშევრობის დონე ქალებთან შედარებით ისევ მაღალია კაცებში – აღნიშნული მაჩვენებელი ქალებში გაზრდილია 1.2 პროცენტით, ხოლო კაცებში – 5.7 პროცენტით.
დასაქმების დონე, როგორც ქალებში, ასევე კაცებში შემცირებულია წინა წლის შესაბამის პერიოდთან შედარებითაც.
___________________________________________________________
● საქართველოში ხელფასი 53 ლარით გაიზარდა
● საქართველოს ყოველი მეშვიდე მოქალაქე სოციალური შემწეობის დახმარებას იღებს
● “საქსტატის” მონაცემებით 2020 წელს პროდუქტები მნიშვნელოვნად გაძვირდა
● აპრილის თვეში ჯანდაცვა 13.8 პროცენტით გაძვირდა
● საქსტატმა ახალი საარსებო მინიმუმი თვეში 178 ლარით და 10 თეთრით განსაზღვრა
_____________________________________________________________
ამ ყველაფრის ფონზე, ეკონომიკის მინისტრი ნათია თურნავა ამბობს, რომ მთავრობის პოლიტიკა მომდევნო თვეებში უმუშევრობის დონეს მნიშვნელოვნად შეამცირებს.
აღსანიშნავია ისიც, რომ უმუშევრობის მაღალი დონით საქართველო რეგიონში პირველ ადგილზეა:
- საქართველო – 22.1%
- სომხეთი – 17.1%
- თურქეთი – 13.2%
- აზერბაიჯანი – 6.2%
- რუსეთი – 4.9%
თურნავას განმარტებით, უმუშევრობის მაღალი დონე 2020 წელს დაწესებულ შეზღუდვებს უკავშირდება.
“2021 წლის მეორე კვარტალში დაფიქსირებული უმუშევრობის ზრდის ტენდენცია უკავშირდება წინა წლის მეორე კვარტალში დაწესებულ შეზღუდვებს. კერძოდ, ის პირები, რომლებმაც შარშან დაკარგეს სამსახური, უმუშევართა სტატისტიკაში მომდევნო პერიოდში აისახნენ. ეს გარემოება, დიდწილად, ხსნის მიმდინარე წლის მეორე კვარტალში უმუშევრობის ზრდას.
ჩვენი სახელმწიფო პროგრამები და ის პოლიტიკა, რომელთაც საქართველოს მთავრობა ახორციელებს, ასევე ის პოზიტიური ტენდენციები, რომლებიც ფიქსირდება ეკონომიკაში, უკვე მომდევნო თვეებში აისახება უმუშევრობის დონის მნიშვნელოვან შემცირებასა და დასაქმების ზრდაში”, – აცხადებს თურნავა.
საქსტატისვე ინფორმაციით, ისტორიული იყო ეკონომიკის ვარდნა გასულ წელს – 1994 წლის შემდეგ საქართველოს ეკონომიკა ყველაზე მეტად სწორედ 2020 წელს, 6,1 პროცენტით შემცირდა.
ვარდნის მთავარი მიზეზი პანდემია და თვეების განმავლობაში გაგრძელებული ლოქდაუნია.
ასევე, საქართველოში საარსებო შემწეობას მთლიანი მოსახლეობის 13,7% იღებს, რაც ნიშნავს იმას, რომ ყოველი მე-7 ადამიანი უკიდურესად გაჭირვებულია.
პანდემიის დაწყებიდან დღემდე ასეთი ადამიანების რიცხვი 16%-ით გაიზარდა და ამჟამად საარსებო შემწეობის მიმღები ნახევარ მილიონზე მეტი – 510 343 ადამიანია.
