საქართველოში სპორტული დარბაზები იხსნება. დღეიდან უქმდება სხვა შეზღუდვებიც

15 მარტიდან საქართველოში პანდემიის გამო დაწესებული შეზღუდვების შემსუბუქების კიდევ ერთი ეტაპი იწყება:

კერძოდ:

• მუშაობას განაახლებენ სპორტული დარბაზები;
• სასწავლო პროცესი უმაღლეს და პროფესიულ სასწავლებლებში აუდიტორიებში აღდგება;
• აღდგება სასკოლო წრეების ფუნქციონირება;
• რეპეტიციებსა და ვარჯიშს განაახლებენ თეატრები, სპორტული კლუბები, პროფესიული ანსამბლები.

ხოლო 1-ლი აპრილიდან აღდგება თეატრალური წარმოდგენები, სპორტული შეჯიბრებები მაყურებლების დასწრებით.

თუმცა ქვეყანაში 21:00-დან 05:00 საათამდე კვლავ ძალაში რჩება კომენდანტის საათი.

__________________________________

● საქართველომ AstraZeneca-ს ვაქცინის პირველი პარტია მიიღო
● კორონავირუსის მორიგი ტალღა: სომხეთში ინფიცირებულთა რიცხვი ისევ იზრდება
● ფეისბუკ-ჯგუფები, როგორც ჯანდაცვის სისტემის ალტერნატივა? VIDEO

____________________________________

ნოემბრის ბოლოს კორონავირუსის ეპიდაფეთქების გამო დაწესებული შეზღუდვების შემსუბუქება საქართველოში 25 თებერვლიდან დაიწყო და მთავრობის გადაწყვეტილებით, ეტაპობრივად მიმდინარეობს. გაიხსნა სასტუმროები სამთო კურორტებზე და აღდგა საქალაქთაშორისო ტრანსპორტის მოძრაობა.

1-ლი მარტიდან გაიხსნა კერძო და საჯარო ბაღები. უმაღლეს და პროფესიულ სასწავლებლებში კლინიკური, პრაქტიკული, ლაბორატორიული საქმიანობა აღდგა და გამოცდები არადისტანციურ ფორმატში განახლდა. მუშაობა განაახლეს მუზეუმებმა და ბიბლიოთეკებმაც. 

8 მარტიდან მთელ საქართველოში რესტორნებს შიდა სივრცეში მუშაობის უფლება მიეცათ, თუმცა შეზღუდვა შაბათ-კვირას ისევ შენარჩუნდა; სამთო კურორტებზე გაიხსნა საბაგიროები.