საქართველოში არ შემოუშვეს ლიეტუველი უფლებადამცველი, რომელიც 15 წელია აქ ცხოვრობს
გაზიარება
გაზიარება
საქართველოში არ შემოუშვეს ლიეტუველი უფლებადამცველი
საქართველოში არ შემოუშვეს ლიეტუველი უფლებადამცველი რეგინა ეგოროვა-ასკეროვა , რომელიც 15 წელია აქ, ოჯახთან ერთად ცხოვრობს. იგი ახსნა-განმარტების გარეშე გააბრუნეს უკან.
რეგინა ეგოროვა-ასკეროვა ქალთა უფლებების დამცველი შვედური ორგანიზაციის Kvinna till Kvinna-ს („ქალები ქალებისათვის“) სამხრეთ კავკასიის რეგიონული დირექტორი და ყოფილი ჟურნალისტია.
ინფორმაცია რეგინა ეგოროვა-ასკეროვამ 20 მარტს, ფეისბუქის გვერდზე გაავრცელა. პოსტს თან ერთვის მისთვის საზღვარზე გადაცემული დოკუმენტის ფოტო. ამ დოკუმენტში საქართველოს საზღვრის კვეთაზე უარის თქმის მიზეზი არ არის დაკონკრეტებული. „არ აკმაყოფილებს საქართველოს კანონმდებლობით განსაზღვრულ სხვა მოთხოვნებს”, – მონიშნულია გრაფაში.
„ეს ცხადად აჩვენებს, თუ სად იმყოფება ახლა ქვეყანა“, – წერს ასკეროვა
ბოლო რამდენიმე წელია უკვე ათობით შემთხვევაა ცნობილი, როდესაც საქართველოში არ უშვებენ უცხოელ ადამიანებს, მათ შორის, ისეთებსაც, ვინც ამ ქვეყანაში ცხოვრობს.
განსაკუთრებულად მკაცრად პუტინისა და ალიევის რეჟიმების კრიტიკოსებს ექცევიან.
მაგალითად, 2025 წლის 3 თებერვალს საქართველოში არ შემოუშვეს ცნობილი მართლმადიდებელი თეოლოგი და ფილოსოფოსი ანდრეი კურაევი. ანდრეი კურაევი მოსკოვის საპატრიარქოს პოლიტიკის ერთ-ერთი მთავარი კრიტიკოსია.
გასული წლის მარტში, ქვეყანაში შემოსუვლაზე ასევე უარი უთხრეს რუს აქტივისტს, იგორ მიგლანს, რომელიც უკრაინის მხარდამჭერ პროექტზე მუშაობს. ამ შემთხვევამდე ერთი თვით ადრე კი კიდევ ერთი რუსი აქტივისტი, მაქსიმ ივანცოვი გააბრუნეს უკან. ივანოვცი მაშინ ამბობდა, რომ მისი არშემოშვენა ბორის ნადეჟდინისთვის ხელმოწერების შეგროვებასთან იყო კავშირში.
ყველა შემთხვევა ერთმანეთის მსგავსია. ადამიანებს არ უხსნიან მიზეზს, რის გამოც, მათ საზღვრიდან უკან აბრუნებენ.
ორგანიზაციამ “სოციალური სამართლიანობის ცენტრი”, უცხოელებისთვის საქართველოში შემოსვლაზე თვითნებური უარის პრაქტიკა, საკონსტიტუციო სასამართლოში გაასაჩივრა. თუმცა, სასამართლომ სარჩელის არსებით განხილვაზე უარი თქვა.
