2023 წელს საქართველოს ტერიტორიიდან 190 უცხოელი გააძევეს. პირველ ადგილს აზერბაიჯანი იკავებს
საქართველოს ტერიტორიიდან გაძევებული უცხოელები
შინაგან საქმეთა სამინისტროს სტატისტიკური მონაცემების მიხედვით, საქართველოდან უცხო ქვეყნის მოქალაქეთა გაძევების სტატისტიკა ყოველწლიურად იზრდება. ოფიციალური ინფორმაციით, 2023 წელს, ქვეყნის ტერიტორია 190 უცხოელს დაატოვებინეს.
უწყების ცნობით, გასულ წელს საქართველოდან გაძევებულ მოქალაქეთა რაოდენობის მიხედვით, პირველ ადგილს 41 მოქალაქით, აზერბაიჯანი იკავებს. მას მოსდევს ირანი 32 ადამიანით. ქვეყნის ტერიტორია დაატოვებინეს ასევე: 27 ინდოელს, 13 რუსს, 9 ეგვიპტელს, 9 ნიგერიელს, 8 თურქს, 8 ჩინელს, 7 ბანგლადეშელს, 6 იორდანელს, 6 ერაყელს, 5 პაკისტანელს და ა.შ.
დოკუმენტიდან ირკვევა, რომ ყველაზე მეტი გაძევებული ადამიანი 16-40 წლამდე ასაკობრივ კატეგორიას მიეკუთვნება და ეს რიცხვი 85-ს შეადგენს. ამასთან, ქვეყნის ტერიტორია 27 არასრულწლოვანს დაატოვებინეს.
რაც შეეხება წინა წლებს, შინაგან საქმეთა სამინისტროს ინფორმაციით, 2022 წელს ქვეყნიდან 165 პირი გააძევეს, 2021 წელს – 77, 2020 წელს კი 49.
● ირაკლი კობახიძე: არ არსებობს აუცილებლობა, რომ რუსეთთან სავიზო რეჟიმს გადავხედოთ
● რუსეთის მოქალაქეებისთვის სავიზო რეჟიმის დაწესებას სამოქალაქო სექტორიც ითხოვს
● ალიევის რეჟიმის კრიტიკოსი აზერბაიჯანელი ჟურნალისტი საქართველოში არ შემოუშვეს
საქსტატის ცნობით, 2023 წელს საქართველოს ტერიტორიაზე საერთაშორისო არარეზიდენტი მოგზაურების 7.1 მილიონი შემოსვლა დაფიქსირდა, რაც წინა წლის მაჩვენებელთან შედარებით 30.9%-ით მეტია.
საქართველოს ყველაზე დიდი რაოდენობით – 1.2 მილიონი ვიზიტორი რუსეთის ფედერაციიდან ჰყავდა, რაც ჯამური რაოდენობის 23.2%-ია.
საქართველოს ვიზიტორებს შორის მეორე ადგილზე თურქეთია 21.4%-იანი წილით, ხოლო მესამეზე – სომხეთი 13.5%-იანი წილით.
2023 წელს ვიზიტების უმრავლესობა – 52.3% შესრულდა დასვენების, გართობისა და რეკრეაციის მიზნით.
ვიზიტების უმრავლესობა თბილისსა და აჭარაში დაფიქსირდა. თბილისში 3, ხოლო აჭარაში 2.7 მილიონი ვიზიტი.
