საქართველოს საგარეო საქმეთა სამინისტროს ცნობით, საქართველოსა და სომხეთს შორის მოქალაქეთა ორმხრივი უვიზო მიმოსვლის შესახებ შეთანხმება ძალაში შევიდა.
ამ შეთანხმების მიხედვით, საქართველოსა და სომხეთის მოქალაქეებს უფლება აქვთ ბიომეტრიული პირადობის მოწმობით იმოგზაურონ საქართველოდან სომხეთში და პირიქით, საერთაშორისო მიმოვლისათვის ნებადართული სასაზღვრო გამტარი პუნქტის გავლით.
როგორც უწყების მიერ გავრცელებულ განცხადებაში ვკითხულობთ, შეთანხმებას საქართველოსა და სომხეთი პრემიერმინისტრებმა ირაკლი ღარიბაშვილმა და ნიკოლ ფაშინიანმა ხელი ერევანში, 2023 წლის 12 იანვარს მოაწერეს და ის დღეიდან ამოქმედდა.
“შეთანხმება მიზნად ისახავს საქართველოსა და სომხეთის მოქალაქეებისათვის ურთიერთმიმოსვლის კიდევ უფრო ხელსაყრელი პირობების შემოღებას.” – წერია საგარეო საქმეთა სამინისტროს განცხადებაში.
მათივე ცნობით, შეთანხმება ანაცვლებს 1993 წლის 19 მაისს ხელმოწერილ შეთანხმებას “საქართველოს რესპუბლიკისა და სომხეთის რესპუბლიკის მოქალაქეთა მათ ტერიტორიაზე უვიზო მოძრაობის შესახებ”.
მიმდინარე წლის 12 იანვარს საქართველოსა და სომხეთის პრემიერმინისტრებმა ხელი მოაწერეს ორ ქვეყანას შორის უვიზო მიმოსვლის კიდევ უფრო გამარტივების დოკუმენტს, რომლის მიხედვით, სომხეთის რესპუბლიკის მოქალაქეებსა და საქართველოს მოქალაქეებს შეეძლებათ ID ბარათებით გადაკვეთონ ორი ქვეყნის საზღვარი.
“დღევანდელი დღის წესრიგი ძალიან ფართოა და მოიცავს სხვადასხვა სფეროებს, ტრანსპორტი, კომუნიკაციები, ტექნოლოგიები, ჯანდაცვა, სოფლის მეურნეობა და სხვა სფეროები. დარწმუნებული ვარ, რომ სხდომის ფარგლებში მიღებული შეთანხმებები სომხურ-ქართულ ურთიერთობებს ახალ შინაარსს შესძენენ.” – განაცხადა მაშინ ნიკოლ ფაშინიანმა.
სომხეთის პრემიერმა ასევე აღნიშნა, რომ 2022 წელს იანვარ-ნოემბრის პერიოდში სავაჭრო ბრუნვა დაახლოებით 70%-ით გაიზარდა.
