დავით არახამია: რუსული კომპანიები სანქციებისთვის გვერდის ასავლელად ქართულ ორგანიზაციებს იყენებენ
სანქციები რუსეთს
უკრაინის რადას ფრაქცია “ხალხის მსახურის” ლიდერი დავით არახამია ამბობს, რომ რუსული კომპანიები სანქციებისთვის გვერდის ასავლელად ქართულ ორგანიზაციებს იყენებენ.
ამის შესახებ არახამიამ ვაშინგტონში, მარშალის ფონდის ღონისძიებაზე ისაუბრა.
არახამიას თქმით, რუსეთი ინტენსიურად იყენებს ქართულ ბანკებს, საფინანსო სისტემებს, ქართულ კომპანიებს და ა.შ. რათა დასავლეთის სანქციების რეჟიმს გვერდი აუაროს:
“თუ შენ ხარ სანქცირებული რუსი, შედიხარ ინტერნეტში, ხსნი ქართულ კომპანიას, ხსნი დისტანციურად საბანკო ანგარიშს და იწყებ დამუშავებას მან ასევე მოუწოდა ვაშინგტონს, მიიღოს ზომები, რათა “სანქციებისგან თავის დაძვრენის საშუალება დახუროს”.
საქართველოს მთავრობა აცხადებს, რომ ქვეყანა არ შეუერთდება სანქციებს, რომლებიც რუსეთს უკრაინაში შეჭრის გამო დასავლეთის ქვეყნებმა დაუწესეს, რადგან ეს „ეროვნულ ინტერესებს“ ეწინააღმდეგება.
ამასთან, პრეზიდენტი და ცალკეული დეპარტამენტები საპირისპიროს ამტკიცებენ – საქართველო იცავს დასავლეთის ქვეყნების მიერ დაწესებულ ყველა სანქციას და არ დაუშვებს, რომ მისი ტერიტორია სანქციებისთვის გვერდის ასავლელად გამოიყენონ.
ფინანსური სანქციების შედეგად, გაყინულია რუსეთის ცენტრალური ბანკის აქტივები. რუსეთს არ შეუძლია 630 მლრდ დოლარის რეზერვის გამოყენება; ვეღარ ფარავს საერთაშორისო სესხებს; საერთაშორისო საკომუნიკაციო სისტემა SWIFT-დან გათიშულია რუსეთის შვიდი უმსხვილესი ბანკი, რის გამოც, შეფერხებულია თანხების გადარიცხვა.
4 აპრილს უკრაინის თავდაცვის სამინისტრომ განაცხადა, რომ რუსეთი კონტრაბანდის მარშრუტს საქართველოს ტერიტორიის გავლით აყალიბებს. მათი განმარტებით, საქართველოს პოლიტიკური ხელმძღვანელობა რუსეთთან შეთანხმებულია საკუთარი ტერიტორიის გავლით სანქცირებული პროდუქტების კონტრაბანდის სახით შეტანაზე.
საქართველოს მთავრობამ ეს ინფორმაცია უარყო და უკრაინულ მხარეს ბოდიშის მოხდისკენ მოუწოდა.
