"მე და ჩემი ნაბადის" პოლიტიკა დამთავრდა ბიძინასთან ერთად" - რა თქვა საქართველოს პრეზიდენტმა ბრიფინგზე
სალომე ზურაბიშვილის ბრიფინგი
საქართველოს პრეზიდენტმა სალომე ზურაბიშვილმა სპეციალურ ბრიფინგზე განაცხადა, რომ საქართველოში “მე და ჩემი ნაბადის” პოლიტიკა დამთავრდა “ბიძინასთან” ერთად. მისივე თქმით, ოცნება “გვეხმარება” და დღითიდღე უფრო ცხადი ხდება მათი რუსულობა.
ზურაბიშვილი ამბობს, რომ ქარტიით გათვალისწინებული რეფორმების გარეშე, რომელიც მოიცავს სასამართლოს, ანტიკორუფციულ ქმედებებს და საარჩევნო გარემოს, ქვეყანა წინ ვერ წავა.
პრეზიდენტი სალომე ზურაბიშვილი მოსახლეობას არჩევნებზე მისვლისკენ მოუწოდებს და აღნიშნავს, რომ 26 ოქტომბერს მოქალაქეებმა უნდა აირჩიონ “დამოუკიდებლობა”, “წინსვლა და ევროპა”.
სალომე ზურაბიშვილი “გახარია საქართველოსთვის” და კოალიცია “ძლიერი საქართველოს” მოლაპარაკებების ჩაშლაზეც საუბრობს და ამბობს, რომ არ აპირებს დაასახელოს ვისი ბრალია, თუმცა განმარტავს იმ ძირითად მიზეზებს, რის გამოც გახარია-ხაზარაძე ვერ გაერთიანდნენ.
პრეზიდენტის განცხადებით, მთავარი, რამაც მოლაპარაკებები ჩაშალა უნდობლობა და პოლიტიკური კულტურის არარსებობაა. დღევანდელ ბრიფინგზე სალომე ზურაბიშვილმა მკაფიოდ აღნიშნა, რომ ეს პარტიები არჩევნებში ცალ-ცალკე მიიღებენ მონაწილეობას.
რა თქვა საქართველოს პრეზიდენტმა
გახარიასა და ხაზარაძის მოლაპარაკებებზე
“მცდელობა იყო და იყო მე მგონი დროულიც იყო და აუცილებელიც. ის გამოცდილება რაც მივიღეთ დაახლოებით 30 წლის მანძილზე დიპლომატიის და რაც მთავარია, მოლაპარაკებების, მეუბნებოდა, რომ არსებობდა დაკვეთა საზოგადოებისგან, რომ “რაღაცა ქენით ყველამ ერთად, მოახერხეთ კონსოლიდაცია” და არსებობდა შანსი და ეს შანსი ძლიერდება საერთოდ, ეს წესია მოლაპარაკებებში, ძლიერდება ბოლოსკენ, როცა უკვე მეტი გასაქანი აღარ გაქვს, ამიტომ ეს მცდელობა იყო საჭირო, მცდელობა ნიშნავს, რომ გარანტირებული არასოდეს არ არის, უნდა რაღაც რისკი აიღო, რისკი ავიღე, არ გამოვიდა…
აქ არ მოვსულვარ საჭორაოდ, რომ ვისი ბრალი იყო ჩაშლა- ალბათ, ყველასი და არავისი, ამავე დროს.
უფრო იყო ბრალი მოცემულობის, იმ წარსულის, რომელიც მძიმედ აწვება ამ ქვეყანაში ყველა პოლიტიკურ მოთამაშეს და მომავალიც, რადგან ყოველთვის არის შიში, რომ “აი, მე როგორ დავიცვა ჩემი იდენტობა, ჩემი მომავალი”. ეს არის ის მოცემულობა, რომელიც ხელშემშლელი არის და იქნება ალბათ, იმიტომ, რომ არ გამოვსულვართ ამ მოცემულობიდან.
მაგრამ ორი მთავარი დამნაშავეა ერთის მხრივ, პოლიტიკური კულტურა, რომელიც ჯერ არ არის ჩამოყალიბებული, კომპრომისების ძებნის კულტურა, იმიტომ, რომ ჯერ კიდევ არის მიჩნეული სისუსტედ. [თითქოს] თუ დათმობ და რამდენსაც დათმობ და ვინც უფრო დათმობ, ის უფრო სუსტია. ნათელია, რომ წინასაარჩევნო პერიოდში ეს მძიმე დასაძლევია.
მეორე დამნაშავეა ის, რაც ჩვენ გვჭამს ყველას – უნდობლობა და ეჭვი, რომელიც გამძაფრებულია ყველანაირი კონსპირაციული თეორიებით. ეს ყველას ეხება, მეც მეხება, ყველაზე მოქმედებს, ამდენად ძალიან ძნელია გათავისუფლდე ამ ყველაფრისგან და ეს გარემო ძალიან აფერხებს ყველანაირ ძებნას იმ აუცილებელი შეთანხმების, იმ აუცილებელი დათმობების, რომელიც ქმნის საბოლოოდ მოლაპარაკებაზე შედეგს.” – განაცხადა პრეზიდენტმა.
მამუკა ხაზარაძესა და გიორგი გახარიას შორის საარჩევნო ერთობაზე მოლაპარაკებები სამი დღის განმავლობაში მიმდინარეობდა. მათ შორის, რამდენიმე შეხვედრა გაიმართა პრეზიდენტ სალომე ზურაბიშვილის სასახლეში. თუმცა, საბოლოოდ მოლაპარაკებები ჩაიშალა.
“ქართული ქარტიის” შესახებ
“ეს მომავალი თუ გინდათ დაუტოვოთ თქვენს შვილებს, ეს არჩევანი არ არის ჩემი, არ არის თქვენი, არ არის იმ პარტიების, რომლებიც ხელს აწერენ ქარტიას.
რატომ ქარტია? – რომელზედაც ცოტას ლაპარაკობენ და ახლა მე მინდა გითხრათ, რომ ამ ოთხი კვირის მანძილზე არავის მივცემ უფლებას, რომ არ ილაპარაკონ დღე და ღამე ქარტიაზე იმიტომ, რომ, რეალურად, ქარტია არის ერთობის ინსტრუმენტი. სხვა ინსტრუმენტი არ არსებობს ამ პარტიებს შორის. ქარტია არის ევროპაში დაბრუნების სამოქმედო გეგმა, იმ გზაზე, სადაც ჩვენ გაგვაჩერეს და ახლა უნდათ, რომ აქედან საერთოდ გადაგვიყვანონ და ქარტია არის ის, რაც გვაძლევს ძალიან რეალური და კონკრეტული გადაწყვეტილებების გეგმას:
ახალი პარლამენტის შეკრების პირველივე დღიდან, როცა ამ ოთხი პარტიის მიერ შექმნილი უმრავლესობა შევა პარლამენტში, ეს ნიშნავს ყველა იმ კანონის გაუქმებას, რომელიც პირდაპირ ეწინააღმდეგება არა მხოლოდ ევროპის რეკომენდაციებს, ადამიანის უფლებებს, არამედ ჩვენს მომავალ, ჩვენს ღირებულებებს და რომელიც არის სასწრაფოდ გასაუქმებელი.
გათავისუფლება ყველა იმ ადამიანის, რომელიც მონაწილეობდა მარტის აქციებში და არის ან დაკავებული ან დაჯარიმებული. ამ კუთხით სამართლიანობა სწრაფად უნდა დაბრუნდეს. მაგრამ სამართლიანობა არის ასევე სასამართლოს აღდგენა, კლანისგან გათავისუფლება იმისთვის, რომ სასამართლომ წინასაარჩევნოდ ერთ დღეში არ გადაწყვიტოს, რომ 64 მილიონს გაუუქმებს ბიუჯეტის მიმართ ვალს ერთ-ერთი დეპუტატის მამას ან სხვას. ეს არის სასამართლო და სამართლიანობა. და ეს არის ის ვალდებულება, რაც აქვს აღებული ოთხ პარტიას. სასამართლოს გარეშე, ანტიკორუფციული რეალური ზომების გარეშე და ახალი საარჩევნო გარემოს შექმნის გარეშე ეს ქვეყანა წინ ვერ წავა.
ჩვენ გვაქვს ძალიან მარტივი საერთო პროგრამა, საერთო მიზანი და ერთი მეორესთან ალბათ უკვე დაწყებული ურთიერთობების მოდელი, რომელიც უნდა შევინარჩუნოთ. თუ სადმე რამე პრობლემა იქნება, მეც იქ ვიქნები.
ყველა უნდა მივიდეთ არჩევნებზე, ყველამ უნდა დავიცვათ ჩვენი არჩევანი, მაგრამ არჩევანის დაცვა ხდება წინსწრებით, ხდება მობილიზაციით, არჩევნებზე მისვლით, აქ იქნება თუ საზღვარგარეთ და ვიცი, რომ იქ ძალიან ძნელი იქნება და ეს არის მაჩვენებელი, ხელისუფლებას თუ რამდენად ეშინია თავისი დიასპორის, იმ ადამიანების, რომლებიც ამ ქვეყანას გარედან ეხმარებიან და ამ ადამიანებს არ აძლევენ იმ ელემენტარულ უფლებას, რასაც ხმის უფლება ჰქვია.
როცა არ ხსნი უბნებს, როცა ეჭიდავები საგარეო საქმეთა სამინისტრო, როგორც ცესკო – ორივე დამნაშავეა და ეს ყველაფერი სასამართლოში უნდა გამოირკვეს. ეს არის ტოტალური დისკრიმინაცია და მიუღებელია დემოკრატიულ ქვეყანაში. ეს ყველაფერი არის ის, რაც გამოსასწორებელია.”
“ოცნება გვეხმარება, დღითიდღე უფრო ცხადი ხდება მათი რუსულობა”
“ჩვენ ვართ მართლა გარდამტეხ მომენტში. ესეც უნდა დავინახოთ. […] ამაში ძალიან გვეხმარება, სიმართლე რომ ვთქვა, თვითონ ოცნების და ივანიშვილის პოლიტიკა. დღითიდღე პრაქტიკულად, უფრო და უფრო ცხადი ხდება მათი პრორუსულობა, უკვე ეს პრო აღარ არის, ეს არის რუსულობა, დათმობა მათი მხრიდან ყველაფრის, რაც მნიშვნელოვანი არის ამ ქვეყანაში.
მათი კამპანია არ არსებობს, შეიძლება ითქვას, რომ წლის დასაწყისიდან არაფერი არ გაკეთებულა, იქ-აქ ფულის დარიგების გარდა, ხმების მოსაპოვებლად. რასაც ჰქვია წინასაარჩევნო კამპანია, რომ ვიღაცას მოეწონო, ვინმე მოხიბლო. კამპანია არის მხოლოდ ერთი – შიში, მუქარა, რევანშის დაპირება, დაჭერები.
როცა ხელისუფლება წინასაარჩევნოდ დაპირისპირებას აღვივებს, ეს იმას ნიშნავს, რომ ხმებით ვეღარ იგებს და უნდა, რომ კონფრონტაციამდე, ჯახამდე მიიყვანოს ქვეყანა.”
“შედარებით ნაკლები წონის პარტიებმა ძალიან დიდი პასუხისმგებლობა გამოიჩინეს”
“ძალიან დასაფასებელია, რომ ის პარტიები, რომლებიც არსებობენ და არიან შედარებით ნაკლები წონის პარტიები (დღეს ყოველ შემთხვევაში), ამ ძალიან რთულ საარჩევნო გარემოში მათ გამოიჩინეს ძალიან დიდი პასუხისმგებლობა, იმით, რომ მოვიდნენ, ქარტიაზე ხელი მოაწერეს, მაგრამ არ გადიან, არ მონაწილეობენ არჩევნებში, რადგან მიხვდნენ, რა იყო ის მახე, რაც მომზადებულია ხელისუფლების მიერ, რომ თუ 1%-ზე მეტი მიიღე, მაგრამ 5%-ზე ნაკლები, ეს ხმები ნაწილდება და გადადის იმ შესაძლო პირველ პარტიაზე, რომელიც დღევანდელი მოცემულობით, ჯერ კიდევ შეიძლება ოცნება იყოს.
ყოველ შემთხვევაში, ეს იყო ოცნების გათვლა და ყველა, ვისაც ჰქონდა პასუხისმგებლობის გრძნობა, იმ პარტიებიდან, რომლებიც არ იყვნენ დარწმუნებული, რომ გადალახავდნენ ბარიერს, მათ ეს ნაწილი დათმეს და უკვე ჩანს ეს დათმობის კულტურა, რომელიც შემოდის ჩვენთან და გადაწყვიტეს, ქარტიის მონაწილენი მაინც გამხდარიყვნენ, რადგან ეს ქარტია არის ის, რაც ჩვენ, ყველას გვაერთიანებს ამ ქვეყნის მომავლისთვის.”
“დღითიდღე უფრო ცხადი ხდება ოცნების პრორუსულობა, ეს უკვე პრო არაა, რუსულობაა”
“დღითიდღე უფრო და უფრო ცხადი ხდება ქართული ოცნების პრორუსულობა, ეს უკვე პრო აღარ არის, ეს რუსულობაა – დათმობა მათი მხრიდან ყველაფრის, რაც მთავარია ამ ქვეყანაში. მათი კამპანია არ არსებობს, შეეძლება ითქვას, რომ უკვე ამ წლის დასაწყისიდან არაფერი გაკეთებულა, აქა-იქ ფულის დარიგების გარდა.
არაფერი არ გაკეთებულა ხმების მოსაპოვებლად – რასაც წინასაარჩევნო კამპანია ჰქვია. კამპანია არის მხოლოდ ერთი – შიში, მუქარა, რევანშის დაპირება – დაჭერები იქნებაო [დაპირებები]. არავის არაფერს ჰპირდებიან, პირიქით იქ, სადაც უცებ ჩნდება მათ მიუხედავად ერთობა, სიხალისე საზოგადოებაში, რომელიც შეიძლება გამოიყენო, მითუმეტეს როცა ხარ ხელისუფლება, და ეს ნორმალურმა პარტიებმა იციან, გამოიყენო სათავისოდ, იმისთვის რომ შექმნა შენთვის სასარგებლო პირობები სათავისოდ – ეს იქნება სტატუსის მიღება, თუ ფეხბურთელების და ოლიმპიელების გამარჯვებები, წარმატებები – ეს ყველაფერი, იმის მაგივრად რომ იყოს გამოყენებული ჩვეულებრივად, როგორც ჩვეულებრივ ქვეყანაში, აქ იქნა გამოყენებული მხოლოდ იმისთვის რომ უფრო დაიშალოს, უფრო გაღრმავდეს დაპირისპირება ქვეყანაში, საზოგადოებაში.
რას ნიშნავს როცა ხელისუფლება წინასაარჩევნოდ დაპირისპირებას აღვივებს, ეს იმას ნიშნავს, რომ თვითონ იცის, რომ ხმებით ვეღარ იგებს არჩევნებს და უნდა კონფრონტაციით აქ მიიყვანოს ქვეყანა.
ამიტომ გვეუბნებიან, რომ გარედან უნდათ რევოლუცია, შიგნითაც “გვინდა”, აქ ყველას, ჩვენც – ეს არის თემა იმისთვის რომ მიგვიყვანონ იქამდე, რომ ძალის გამოყენება მათი მხედველობაში იქნება ლეგიტიმური – თუმცა მას ვერ გამოიყენებენ ამაში დარწმუნებული ვარ.”
“რა გახსოვს არაა საინტერესო, საინტერესოა შენი შვილები რას დაიმახსოვრებენ”
“დღეს საქართველო დგას გამოწვევის წინაშე. ვიცი, რომ ეს პარტიები, რომლებიც დგანან თქვენს წინაშე, უკვე არიან მზად იმისთვის, რომ დადგნენ ერთად – რომ გადავარჩინოთ ქვეყანა.
ეს გადარჩენა თქვენგან მოითხოვს სრულ მობილიზაციას, რომ ყველა წავიდეს არჩევნებზე. აქ იმის ლაპარაკი, რომ ის არ მომწონს, ეს არ მომწონს, იმისგან ეს მახსოვს – შენ რა გახსოვს, არ არის საინტერესო, საინტერესოა შენი შვილები რას დაიმახსოვრებენ 26 ოქტომბრიდან, რა გადაწყვეტილებას მიიღებენ 26 ოქტომბრის მერე, თუ ჩვენ იქ არ ვიდექით, სადაც უნდა ვიდგეთ. ჩვენ უნდა წავიდეთ არჩევნებზე.
დღევანდელი არჩევნები არ არის ვის ირჩევ, ის არის რას ვირჩევ – ქვეყანას, დამოუკიდებლობას, მომავალს, წარმატებას, წინსვლას, ევროპას თუ ვირჩევ უკუსვლას, და ძველ სისტემას, რომელსაც კარგად ვიცნობ, რომელსაც ოკუპირებული აქვს ქვეყნის 20 პროცენტი და ვხედავთ რა ფორმით აქვს ოკუპირებული. ეს მომავალი თუ გინდათ რომ დაუტოვოთ შვილებს – ეს არჩევანი არ არის ჩემი, არ არის ჩვენი, არ არის იმ პარტიების, რომლებიც ხელს აწერენ ქარტიას.”
