სახალხო დამცველი: დაუყოვნებლივ გადაიყვანონ სააკაშვილი სხვა საავადმყოფოში

სახალხო დამცველი მოუწოდებს იუსტიციის მინისტრსა და პენიტენციურ სამსახურს, რომ საქართველოს მესამე პრეზიდენტი მიხეილ სააკაშვილი დაუყოვნებლივ გადაიყვანონ ალტერნატიულ სამედიცინო დაწესებულებაში.

ომბუდსმენი, რომელმაც მიხეილ სააკაშვილი 8 ნოემბერს გლდანის მე-18 დაწესებულებაში მოინახულა, კიდევ ერთხელ ხაზგასმით აღნიშნავს, რომ 

მე-18 სამკურნალო დაწესებულება ვერ აკმაყოფილებს კონსილიუმის მიერ გაცემულ რეკომენდაციებს, ასევე, დაწესებულებაში მიხეილ სააკაშვილის მოთავსება ცალსახად არღვევს სახელმწიფოს მიერ ადამიანის ღირსების პატივისცემის ვალდებულებას.

რას ამბობს სახალხო დამცველი სააკაშვილის გლდანში გადაყვანის გარემოებებზე:

● მიხეილ სააკაშვილმა არ იცოდა, რომ იგი გლდანის მე-18 დაწესებულებაში მიჰყავდათ. რუსთავში მას უთხრეს, რომ კონსილიუმის გადაწყვეტილებით, იგი გადაჰყავდათ სამოქალაქო კლინიკაში, რასაც იგი დათანხმდა.

● რა ვიცით გლდანის ციხეში გადაყვანილ მიხეილ სააკაშვილზე. 8 ნოემბრის ქრონოლოგია

● თითქმის ერთი თვეა სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე

● არჩევნები დასრულდა. რას აპირებს ოპოზიცია

● სახალხო დამცველს სააკაშვილმა უთხრა, რომ უარის მიუხედავად, იგი ძალის გამოყენების შეასახლეს N18 დაწესებულებაში. ამ ფაქტთან დაკავშირებით სახალხო დამცველის აპარატმა დაუყოვნებლივ აცნობა სახელმწიფო ინსპექტორის სამსახურს, გამოძიების დაწყების მიზნით.

● სახალხო დამცველი მიუთითებს, რომ მიხეილ სააკაშვილი მოათავსეს გარემოში, რომელიც უხეშად არღვევს ადამიანის ღირსების უფლებას. კერძოდ კი, მე-8 ციხიდან, რომელიც იმავე ეზოშია, რომელშიც მე-18 ციხის საავადმყოფო, ისმის პატიმრების გინება და მუქარები სააკაშვილის მისამართით. ეს შეძახილები სააკაშვილის საკანშიც აღწევს და როგორც სახალხო დამცველი ამბობს, “ეს ცალსახად ფსიქოლოგიურ ზეწოლას წარმოადგენს”.

● სახალხო დამცველი მიუთითებს, რომ დიდი ალბათობით, მსგავსი შეძახილები იქმნება მაშინაც, როდესაც სააკაშვილთან ვიზიტორები მივლენ – მისი ადვოკატები, ოჯახის წევრები.

● სახალხო დამცველი აღნიშნავს, რომ სააკაშვილის შესახლების დღეს, მე-18 დაწესებულებაში შეიტანეს კომპიუტერული ტომოგრაფიის აპარატი. თუმცა, ეს აპარატი არ არის ჯერ დამონტაჟებული და მისი დამონტაჟება “უახლოეს პერიოდში იგეგმება”. ამასთან, მიუხედავად კონსილიუმის მოთხოვნისა, დაწესებულებაში არ ფუნქციონირებს კათეტერიზაციის ლაბორატორია და კვლავ არ არის მაგნიტო-რეზონანსული ტომოგრაფიის აპარატი.

● სახალხო დამცველის აპარატმა შეამოწმა მე-18 დაწესებულებაში პატიმართა შეყვანის შესახებ წლევანდელი დოკუმენტაცია (2021 წლის იანვრიდან დღემდე) და აღმოჩნდა, რომ ამ დაწესებულებაში ამ პერიოდში მე-12 პენიტენციური დაწესებულების არც ერთი სხვა პატიმარი, გარდა მიხეილ სააკაშვილისა, არ შეუყვანიათ. 2021 წლის იანვრამდე ინფორმაცია ჯერ-ჯერობით უცნობია ღამის საათებში სპეციალურ არქივზე ხელმისაწვდომობის შეუძლებლობის გამო.

• რატომ არ არის უსაფრთხო გლდანის ციხის საავადმყოფო?

  

  მერვე ციხე ჩვეულებრივი ციხეა – სადაც მათ შორის კრიმინალური ავტორიტეტებიც იხდიან სასჯელს. “ჩვეულებრივი” ტიპის ციხეში ყოფილი პრეზიდენტის მოთავსება კი, საშიშია, ამბობდა სახალხო დამცველის აპარატი.

  რუსთავი მე-12 ციხეში კი, სადაც სააკაშვილი აქამდე ჰყავდათ, სწორედ განსაკუთრებული კატეგორიის პატიმრებს ანთავსებენ – ისეთებს, რომელთა ყოფნა ჩვეულებრივ ციხეში, რიგით მსჯავრდებულებთან და კრიმინალურ ავტორიტეტებთან, უსაფრთხო არ არის.

  მაგალითად, რუსთავის ციხეში ჰყავთ ყოფილი პოლიციელები, პოლიტიკოსები, ჩინოვნიკები ანუ ის ხალხი, ვინც თავისუფლებაზე ყოფნის დროს სხვა კრიმინალებს ერჩოდა, აპატიმრებდა და ა.შ.

  “პატიმარი რომ ხარ, ვინც დაგიჭირა მასთან ერთად არ უნდა ჩაგსვან ერთ ციხეში და ერთ საკანში არ უნდა მოგათავსონ, ეს ხომ ორჯერ ორი ოთხია? ამას მოჰყვება დიდი არეულობა და დეზორგანიზაცია, ამიტომ ამ ციხეში მოთავსებულ პატიმარს აქვს განსაკუთრებული უსაფრთხოების საჭიროება,” – უთხრა “რადიო თავისუფლებას” სახალხო დამცველის მოადგილემ, გიორგი ბურჯანაძემ.

● ომბუდსმენი განცხადებაში აღნიშნავს, რომ სააკაშვილი კვლავ აგრძელებს შიმშილობას, არ იღებს სათანადო მედიკამენტებს, შიმშილობის პროცედურებისთვის აუცილებელ მინერალებსა და ვიტამინებს, უარს აცხადებს სამედიცინო დახმარებაზე.

________________________________________

8 ნოემბერს, იუსტიციის სამინისტროს განცხადებით “ჯანმრთელობის მდგომარეობის გაუარესების პრევენციის მიზნით და მომატებული საფრთხეებიდან გამომდინარე“ საქართველოს ყოფილი პრეზიდენტი, რომელიც დაკავების დღიდან შიმშილობს, მისი ნების საწინააღმდეგოდ, ოჯახის წევრების და ადვოკატების გაფრთხილების გარეშე, რუსთავის 12-ე დაწესებულებიდან გლდანის მე-18 დაწესებულების სამკურნალო დაწესებულებაში გადაიყვანეს.