სააკაშვილის თანამდებობაზე დანიშვნის გამო უკრაინაში საქართველოს ელჩი თბილისში გამოიძახეს

ექსპრეზიდენტ მიხეილ სააკაშვილის უკრაინის რეფორმების ეროვნული საბჭოს აღმასრულებელი კომიტეტის თავმჯდომარედ დანიშვნის გამო, უკრაინაში საქართველოს ელჩი, თეიმურაზ შარაშენიძე თბილისში კონსულტაციებზე გამოიძახეს.

“სტრატეგიული პარტნიორის მხრიდან, საქართველოს სასამართლო სისტემის მიერ მსჯავრდებული და ძებნილი ადამიანის მსგავსი დანიშვნაც კი შეკითხვებს იწვევს, რის გამოც, მიღებული იქნა გადაწყვეტილება უკრაინაში საქართველოს საგანგებო და სრულუფლებიანი ელჩის ბატონი თეიმურაზ შარაშენიძის თბილისში კონსულტაციებზე გამოძახების თაობაზე,” – ამბობს საქართველოს საგარეო საქმეთა მინისტრი, დავით ზალკალიანი.

ზალკალიანის განცხადებით, ელჩის გამოძახება დიპლომატიურ პრაქტიკაში მიღებული ნაბიჯია და ელჩ კონსულტაციებისთვის იმ შემთხვევაში იწვევენ,  როცა ორ  ქვეყანას შორის ურთიერთობებში “გარკვეული პრობლემები” იქმნება და ელჩთან კონსულტაციების ჩატარებაა საჭირო.

საგარეო საქმეთა მინისტრი განმარტავს, რომ საქართველო უკრაინასთან დიპლომატიური ურთიერთობების გაწყვეტას არ განიხილავს.  

მიხეილ სააკაშვილი უკრაინის რეფორმების აღმასრულებელი კომიტეტის თავმჯდომარედ 7 მაისს დაინიშნა. გადაწყვეტილებას ხელი პრეზიდენტმა მოაწერა.

22 აპრილს მიხეილ სააკაშვილმა განაცხადა, რომ უკრაინის პრეზიდენტმა ვოლოდიმირ ზელენსკიმ მას რეფორმების საკითხებში ვიცე-პრემიერის პოსტი შესთავაზა. ამ ინფორმაციას საქართველოს ხელისუფლების მწვავე პროტესტი მოჰყვა. 

• მოსაზრება: სააკაშვილის “მესამედ მოსვლა” უკრაინაში
• უკრაინული მიშა
• უკრაინელები ხელისუფლებას გაეხუმრნენ
• ბრიყვული და სამარცხვინო – ასე აფასებენ ექსპერტები თბილისის რეაქციას სააკაშვილის შესაძლო დანიშვნაზე უკრაინაში

პრემიერ-მინისტრმა გიორგი გახარიამ განაცხადა, რომ თუ სააკაშვილი მართლაც დაინიშნებოდა ვიცე-პრემიერად, თბილისი უკრაინიდან ელჩს  გამოიწვევდა, პარლამენტის სპიკერმა არჩილ თალაკვაძემ კი უკრაინის რადას სპიკერს დმიტრო რაზუმკოვს წერილი მისწერა, სადაც აღნიშნა, რომ სააკაშვილის დაწინაურება  საქართველოსა და უკრაინას შორის “ურთიერთნდობას შეარყევდა”.

“სამარცხვინო გადაწყვეტილება” – ასე გამოეხმაურა ქართული პოლიტიკური ოპოზიცია უკრაინიდან ელჩის გამოწვევის შესახებ საქართველოს ხელისუფლების გადაწყვეტილებას.  

“ამ გადაწყვეტილების ფონზე კიდევ უფრო სამარცხვინოდ წარმოჩინდა ის სრული ისტერიკა, რომელიც სჭირდათ „ქართული ოცნების“ წარმომადგენლებს. ვის დანიშნავენ, რომელ თანამდებობაზე, რა წესით და პროცედურით ეს არის ჩვენი მეგობარი უკრაინის საქმე,” – აცხადებს ევროპული საქართველოს წევრი, ოთარ კახიძე.

“საქართველოს ხელისუფლება საქართველოს ინტერესების საწინააღმდეგოდ მოქმედებს, როცა უკრაინას თითს უქნევს”, – ამბობს “რესპუბლიკელების” ლიდერი,  დავით ბერძენიშვილი. 

“გადაამლაშეს, როდესაც ულტიმატუმის ენაზე დაიწყეს საუბარი მეგობარ ქვეყანასთან და ფეხების ბაკუნი. ამან უკურეაქცია გამოიწვია, გაღიზიანება უკრაინაში და ეს სამწუხარო მომენტია. უხერხულობები იქნება,”  – აცხადებს გია ხუხაშვილი.