NGO-ები: ევროკავშირში გაწევრების პროცესის გაყინვის საფრთხე რეალურია

რუსული კანონი

23 ორგანიზაცია საქართველოს ხელისუფლებას ერთობლივი განცხადებით მიმართავს და მოუწოდებს, გაიწვიოს რუსული კანონი და ის საკანონმდებლო ინიციატივები, რომლებიც ევროკავშირის ღირებულებებს ეწინააღმდეგება.

არასამთავრობო ორგანიზაციები მიმართავენ ხელისუფლებას, არ აღუდგნენ წინ საქართველოს მოქალაქეების უდიდესი უმრავლესობის ნებას, გახდეს ევროპული ოჯახის წევრი.

ასევე, გაუფრთხილდეს ევროინტეგრაციის გზაზე მიღწეულ თითოეულ მონაპოვარს და შეასრულოს ევროკომისიის მიერ განსაზღვრული 9 ნაბიჯი.

“ევროპულმა საბჭომ საქართველოს ხელისუფლებას მოუწოდა, სიცხადე შეიტანოს თავის განზრახვებში აღებული კურსის შეცვლის გზით, რაკი ეს საფრთხის წინაშე აყენებს საქართველოს ევროკავშირისკენ მიმავალ გზას და „გაწევრიანების პროცესის დე ფაქტო შეჩერებას გამოიწვევს”. ამასთან, ევროპულმა საბჭომ ხელისუფლებას მოუწოდა, 2024 წლის შემოდგომაზე უზრუნველყოს თავისუფალი და სამართლიანი არჩევნების ჩატარება და დაასრულოს სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების მიმართ წარმოებული ფიზიკური თავდასხმები, დაშინებები და მუქარა”, – ნათქვამია განცხადებაში.

განცხადების ავტორები აღნიშნავენ, რომ ევროკომისია შემოდგომაზე წარმოადგენს გაფართოების მორიგ ანგარიშს, რომელშიც სხვა საკითხებთან ერთად შეფასებული იქნება საქართველოს მიერ ევროკომისიის მხრიდან განსაზღვრული 9 ნაბიჯის შესრულება”

“საქართველოს ევროკავშირში გაწევრიანების პროცესის გაყინვის საფრთხე რეალურია, რასაც ასევე ადასტურებს ევროკავშირისა და მისი წევრი-სახელმწიფოების მაღალი თანამდებობის პირთა მიერ გაკეთებული განცხადებები. აღნიშნულის შემთხვევაში, ევროპული კავშირის ამ გადაწყვეტილებაზე პასუხისმგებლობა სრულად ეკისრება საქართველოს ხელისუფლებას“, -ვკითხულობთ ორგანიზაციების განცხადებაში.

ამ განცხადებით არასამთავრობო ორგანიზაციები გამოეხმაურნენ ევროპული საბჭოს 27 ივნისს გამართულ სხდომას. ევროპულმა საბჭომ, რომელიც ევროკავშირის 27 წევრი ქვეყნის ლიდერს აერთიანებს, საქართველოში ბოლო პერიოდში განვითარებულ მოვლენებსა და დემოკრატიულ რეგრესზე სერიოზული წუხილი გამოხატა.

განცხადებას ხელს აწერენ:

1. საქართველოს რეფორმების ასოციაცია (GRASS)
2. აღმოსავლეთევროპული ცენტრი მრავალპარტიული დემოკრატიისთვის
3. დემოკრატიის კვლევის ინსტიტუტი (DRI)
4. დემოკრატიის მცველები
5. ეკონომიკური პოლიტიკის კვლევის ცენტრი
6. თბილისი პრაიდი
7. ინფორმაციის თავისუფლების განვითარების ინსტიტუტი
8. მწვანე ალტერნატივა
9. სამართლიანი არჩევნები (ISFED)
10. სამოქალაქო საზოგადოების ფონდი
11. სასამართლოს გუშაგი
12. საფარი
13. საქართველოს ახალგაზრდა იურისტთა ასოციაცია (საია)
14. საქართველოს დემოკრატიული ინიციატივა (GDI)
15. საქართველოს ევროპული ორბიტა
16. საქართველოს მომავლის აკადემია
17. სოციალური სამართლიანობის ცენტრი
18. ტოლერანტობისა და მრავალფეროვნების ინსტიტუტი
19. უფლებები საქართველო
20. ქალთა ინიციატივების მხარდამჭერი ჯგუფი
21. წამების მსხვერპლთა ფსიქოსოციალური და სამედიცინო რეაბილიტაციის ცენტრი
22. საბჭოთა წარსულის კვლევის ლაბორატორია
23. საერთაშორისო გამჭვირვალობა – საქართველო

რუსული კანონი