რუსეთის საგარეო დაზვერვა ამტკიცებს, რომ აშშ საქართველოში გადატრიალებას გეგმავს. რას პასუხობს ვაშინგტონი

რუსეთის საგარეო დაზვერვის განცხადება

რუსეთის საგარეო დაზვერვის სამსახური (СВР) აცხადებს, რომ აშშ საქართველოში მთავრობის ცვლილებას გადატრიალების გზით გეგმავს. განცხადება СВР-მა საკუთარ გვერდზე გამოაქვეყნა და ის დიდწილად ოპოზიციისა და პრეზიდენტ სალომე ზურაბიშვილის დისკრედიტაციას ემსახურება. ასევე აღსანიშნავია, რომ ტექსტი ოფიციალური განცხადებისთვის ზედმეტად მხატვრული ენითაა დაწერილი.

აშშ-ის სახელმწიფო დეპარტამენტის პრესსპიკერმა, მეთიუ მილერმა განაცხადა, რომ რუსეთის ბრალდებები სრული სიცრუე და აბსურდია.

ლავროვის მოადგილე: დასავლეთს საქართველოში მაიდნის სცენარის განმეორება სურს

“დასავლეთი სუვერენულ სახელმწიფოზე ზეწოლას ცდილობს”

რა წერია განცხადებაში

“რუსეთის ფედერაციის საგარეო დაზვერვის პრესბიურო იტყობინება, რომ СВР-ში შემოსული მონაცემები მოწმობს ვაშინგტონის გადაწყვეტილებაზე, მიაღწიონ საქართველოში ხელისუფლების ცვლილებას 26 ოქტომბრის საპარლამენტო არჩევნების შედეგების შემდეგ. ჯო ბაიდენის ადმინისტრაციაში შემუშავებულია მასშტაბური საინფორმაციო კამპანია მმართველი პარტია ქართული ოცნების დისკრედიტაციისთვის.

ცნობილი გახდა “ჰოლივუდის საუკეთესო ტრადიციებით” შეთხზული სცენარის მთავარი სიუჟეტური ხაზები. თეთრი სახლის თანდაყოლილი ანტირუსული ენთუზიაზმით, დაგეგმილია პროპაგანდისტული კამპანია “სენსაციური გამოაშკარავებებით”: საქართველოს ყველა უბედურებაში დამნაშავეა რუსეთი.

ამასთან ერთად, აქცენტი გაკეთდება ქართული ოცნებისადმი “პოლიტიკური დამოუკიდებლობის არქონის” ბრალდებებზე, რომელიც “ხომალდ ჯორჯიას” ალისფერი იალქნებით ევროპის სანაპიროდან დაშორებით ემუქრება.

ანტისამთავრობო განწყობის გამწვავებაში გადამწყვეტი როლი უნდა ითამაშოს საქართველოს პრეზიდენტმა, სალომე ზურაბიშვილმა. როგორც “ვაშინგტონელმა რეჟისორებმა” ჩაიფიქრეს, სახელმწიფოს მეთაური ინტერვიუს მისცემს ერთ-ერთ ამერიკულ მედიას, რომელშიც საქართველოს ხელისუფლებას დაადანაშაულებს თბილისის ევროკავშირში გაწევრიანების მოლაპარაკებების პროცესის დეგრადაციაში, გააფრთხილებს “ფართო საზოგადოებას” “მოსკოვთან დაახლოების კატასტროფულ შედეგებსა” და რუსეთიდან გადაბარგებულთა მიერ საქართველოსთვის მიყენებულ ზიანზე. 

ამავდროულად, ვაშინგტონი, ზურაბიშვილის მეშვეობით, აპირებს ამომრჩევლები “ოპოზიციის მხრიდან ქართული ოცნებისთვის გარკვეული პოლიტიკური სიურპრიზისთვის” მოამზადოს, რაც საბოლოო ჯამში შესაძლოა მორიგი “ფერადი რევოლუცია” აღმოჩნდეს.

ამერიკელმა “კურატორებმა” უკვე მისცეს ბრძანება საქართველოს ოპოზიციურ ძალებს, შეუდგნენ ქვეყანაში საპროტესტო აქციების დაგეგმვას არჩევნების დროისთვის. ხელისუფლების სტრუქტურების საწინააღმდეგოდ “ტარანი” უნდა გახდეს თბილისის მოსახლეობა, რომელიც ამ წლის გაზაფხულზე “უცხოელი აგენტების” კანონთან დაკავშირებული ანტისახელისუფლებო აქციებით “შეახურეს”. 

განიხილება “საკრალური მსხვერპლი” პროტესტების მონაწილეებიდან, რათა ძალოვნებზე “ხალხი განრისხდეს”.

პროვოკაციების ამერიკელ ოსტატებს შესაბამისი დიდი გამოცდილება გააჩნიათ. საკმარისია გავიხსენოთ კიევის “მაიდანი” ათი წლის წინ, სადაც “დემოკრატიის საკურთხეველზე” ასობით ადამიანი გაწირეს, მათ შორის, ისინიც, ვინც ქართველმა დაქირავებულმა სნაიპერებმა დახვრიტეს.” – ვკითხულობთ განცხადებაში.

● რუსული კანონის გამო, ევროკავშირმა შეაჩერა 30 მლნ ევროს დახმარება საქართველოსთვის. ჰერჩინსკის თქმით, იქნება სხვა ზომებიც
● მარია ზახაროვა: რუსეთი ემხრობა საქართველოსთან დიპლომატიური ურთიერთობების აღდგენას 

სახელმწიფო დეპარტამენტის პასუხი

“ვფიქრობ აშკარაა, რომ ეს არის სრულიად მცდარი. არ არის პირველი შემთხვევა, როდესაც რუსეთი აკეთებს მსგავს ბრალდებებს აშშ-ის ჩართულობასთან დაკავშირებით საქართველოსა და მსოფლიოს სხვა ქვეყნებში, რაც სრულად მცდარი, აბსურდია.

და მე უბრალოდ აღვნიშნავ იმ ქვეყნის – რუსეთის – ირონიას, რომელიც უკანონოდ ახდენს საქართველოს 20%-ის ოკუპაციას და ამ აბსურდულ ბრალდებებს სხვა ქვეყნის მიმართ აყენებს.“

განაცხადა აშშ-ის სახელმწიფო დეპარტამენტის პრესსპიკერმა, მეთიუ მილერმა ბრიფინგზე.

ე.წ. გადატრიალების საქმის ქართული ვერსია 2023 წელს

დაახლოებით მსაგვსი შინაარსის განცხადება 2023 წლის სექტემბერში საქართველოს უსაფრთხოების სამსახურმაც გაავრცელა. მაშინაც საუბარი იყო “ევრომაიდანზე” და “გარედან მომავალ საფრთხეებზე”, გადატრიალების კონკრეტულ ორგანიზატორებად კი დასახელებული იყვნენ უკრაინის ხელისუფლებაში მომუშავე და უკრაინაში მყოფ ეთნიკურ ქართველები:

გეგმის ავტორად დასახელდა უკრაინის სამხედრო დაზვერვის ხელმძღვანელის მოადგილე გიორგი ლორთქიფანიძე, რომელიც სააკაშვილის ხელისუფლების დროს შინაგან საქმეთა მინისტრის, ვანო მერაბიშვილის მოადგილე იყო;

ექს-პრეზიდენტ მიხეილ სააკაშვილის დაცვის ყოფილი წევრი მიხეილ ბატურინი;

სააკაშვილის ახლო გარემოცვის წევრი, უკრაინაში მოქმედი „ქართული ლეგიონის“ მეთაური მამუკა მამულაშვილი.

სუს-ი ამტკიცებდა, რომ პოლონეთის საზღვართან მიმდინარეობდა იმ ახალგაზრდების გაწვრთნა, რომლებსაც არეულობის მოწყობაში ჩართავდნენ. ასევე სუს-ი ასახელებდა რამდენიმე უკრაინულ ორგანიზაციას, რომლებიც უსაფრთხოების სამსახურის ინფორმაციით, ასევე ჩართულები არიან პროცესში.

“რევოლუციური სცენარისთვის გამოსაყენებელი ახალგაზრდული ჯგუფების მომზადების მიზნით გამოიყენება ორგანიზაცია „კანვასი“, რომლის ბირთვსაც შეადგენს ორგანიზაცია „ოტპორი,” – აღნიშნულია წერილში და ნათქვამია, რომ ამ ორგანიზაციებმა წარსულში უკვე მიიღეს გამოცდილება სამოქალაქო არეულობების მოწყობაში სერბეთში.

რაც შეეხება სცენარს, სუს-ის ინფორმაციით, განიხილებოდა მოვლენათა განვითარების რამდენიმე სცენარი – მათ შორის, ე.წ. „კარვების ქალაქის“ მოწყობა, ცენტრალურ გამზირებსა და სტრატეგიულ ობიექტებთან ბარიკადების აღმართვა, სამთავრობო შენობების დაკავება-ბარიკადირება.

განცხადებაში ხაზგასმულია, რომ აღნიშნული გეგმის განხორციელება იგეგმება უცხო ქვეყნების კოორდინაციითა და ფინანსური მხარდაჭერით.