რატომ სჭირდება რუსეთს საკონსულო ხანკენდში? კომენტარი ბაქოდან
რუსეთს ხანკენდში საკონსულოს გახსნა სურს
რუსეთს 2024 წელს ხანკენდში გენერალური საკონსულოს გახსნა სურს. ამის შესახებ რუსეთის ფედერაციის საბჭოს საერთაშორისო ურთიერთობათა კომიტეტის ხელმძღვანელმა გრიგორი კარასინმა აზერბაიჯანის პარლამენტის საერთაშორისო და საპარლამენტთაშორისო ურთიერთობების კომიტეტის თავმჯდომარე სამედ სეიდოვთან შეხვედრაზე განაცხადა.
ამჟამად რუსეთი აზერბაიჯანში დიპლომატიურ დონეზე მხოლოდ საელჩოთია წარმოდგენილი ბაქოში. რუსეთის საკონსულოები ქვეყნის სხვა ქალაქებში არ არის.
თავის მხრივ, აზერბაიჯანს აქვს სამი საკონსულო რუსეთის ფედერაციაში – მოსკოვში, სანკტ-პეტერბურგსა და ეკატერინბურგში.
JAMnews-ის აზერბაიჯანულმა რედაქციამ ამ საკითხზე კომენტარისთვის პოლიტიკურ დამკვირვებელს, ჰაჯი ნამაზოვს მიმართა.
ექსპერტის აზრით, ყარაბაღში რუსეთის საკონსულო არ არის საჭირო.
„ყარაბაღში რუსეთის მოქალაქეები არ არიან. რუსული მხარის სურვილი კი მხოლოდ იმ თვალსაზრისით შეიძლება შეფასდეს, რომ რუსეთს არ სურს პოზიციების დაკარგვა აზერბაიჯანის ამ ნაწილში სამშვიდობო ძალების გაყვანის შემდეგ. მაგრამ სჭირდება თუ არა აზერბაიჯანს ეს? საკითხავი აი ეს არის. ვფიქრობ რომ არა.
ბოლო 30-ზე მეტი წლის განმავლობაში, რუსეთი აწარმოებს კულისებიდან ბრძოლას იმის გამო, რომ აზერბაიჯან თურქეთთან კარგ ურთიერთობაშია. მაგრამ მან რუსეთმა ეს ბრძოლა წააგო.
ნახეთ: თურქეთს აქვს სამი საკონსულო აზერბაიჯანში. ისინი განლაგებულია ბაქოში, განჯასა და ნახჩევანში. აქ ყველაფერი ლოგიკურზე მეტია, რადგან… თურქეთის მოქალაქეები ცხოვრობენ და მუშაობენ აზერბაიჯანში. განჯა მდებარეობს ქვეყნის დასავლეთ ნაწილში, ლოგისტიკური თვალსაზრისით, გამართლებულია იქ ცალკე საკონსულოს არსებობა, მაგრამ ნახიჩევანს ჯერ არ აქვს პირდაპირი სახმელეთო კავშირი დანარჩენ ქვეყნებთან და აქ ყველაფერი ნათელია.
ქვეყანაში რუსული სკოლები და ლიცეუმები არ არის. მაგრამ თურქული საკმარისზე მეტია.
გასულ წელს რუსეთმა ბაქოში რუსული სკოლების გახსნის სურვილი გამოთქვა, მაგრამ ჯერჯერობით საქმე წინ არ წასულა.
მართალი გითხრათ, ეს სრულად შეესაბამება აზერბაიჯანულ საზოგადოებაში არსებულ განწყობას. იმიტომ, რომ აზერბაიჯანს აქვს დიამეტრალურად საპირისპირო დამოკიდებულება რუსეთისა და თურქეთის მიმართ, და ეს ყველასთვის ცხადია“.
