პრეზიდენტის ვეტო დაძლეულია. რუსული კანონი მიღებული

პარლამენტმა პრეზიდენტის ვეტო დაძლია

84 ხმა, 4-ის წინააღმდეგ – ასე უყარა კენჭი საქართველოს პარლამენტმა პრეზიდენტის მოტივირებულ შენიშვნებს “აგენტების კანონთან” დაკავშირებით. 4 წინააღმდეგ მიცემული ხმა – ოპოზიციონერი დეპუტატების იყო. “ქართულმა ოცნებამ” კანონს კვლავ ერთსულოვნად – 84 დეპუტატით დაუჭირა მხარი.

პარლამენტის სხდომის პარალელურად, დილიდან პარლამენტის შენობასთან საპროტესტო აქცია იმართება. კენჭისყრის დაწყებამდე რამდენიმე წუთით ადრე, პარლამენტთან სამართალდამცავების რაოდენობა გაზარდეს და მომიტინგეები პარლამენტის უკანა შესასვლელთან შეავიწროვეს, რათა დეპუტატების მანქანებისთვის კორდონი გაეკეთებინათ.

დეპუტატებმა შენობა სტვენისა და “მონებო”, “რუსებო”, “მოღალატეებო” შეძახილების ფონზე დატოვეს.

კანონის მიღების შემდეგ პარლამენტთან ხალხის რაოდენობა კიდევ უფრო იმატებს. ისინი აცხადებენ, რომ პროტესტი კიდევ უფრო მასშტაბური და პერმანენტული იქნება.

“უცხოური გავლენის გამჭვირვალობის შესახებ“ კანონპროექტი პრეზიდენტს ხელმოსაწერად კიდევ ერთხელ გაეგზავნება. კანონი პრეზიდენტს სამი დღის ვადაში უნდა გადაეცეს. იმისთვის, რომ კანონი ძალაში შევიდეს საჭიროა მას 5 დღის ვადაში პრეზიდენტმა მოაწეროს ხელი. პრეზიდენტმა უკვე თქვა, რომ ამას არ გააკეთებს. ამიტომ, “რუსული კანონი” პარლამენტის თავმჯდომარის ხელმოწერით გამოქვეყნდება და ამის მერე შევა ძალაში.

“რუსული კანონი” – ასე უწოდებენ აგენტების კანონს საქართველოში, რადგან იგი რუსულის ანალოგია. კანონის თანახმად, უცხოური ძალის ინტერესების გამტარებელ ორგანიზაციად გამოცხადდება ის არასამთავრობო და მედიაორგანიზაციები, რომელთა შემოსავლის 20 პროცენტზე მეტი უცხოური ფონდებნის მიერაა დაფინანსებული. მედია და არასამთავრობო ორგანიზაციების უდიდესი უმრავლესობა საქართველოში სწორედ ასეთია.

ორგანიზაცია სპეციალურ რეესტრში თავად უნდა დარეგისტრირდეს აგენტად. თუ ამას არ გააკეთებს, მას 25 ათასი ლარით დააჯარიმებენ.

კანონის გამოქვეყნების შემდეგ 60 დღე ექნებათ იუსტიციის სამინისტროსა და საჯარო რეესტრის ეროვნულ სააგენტოს „უცხოური ძალის ინტერესების გამტარებელ ორგანიზაციათა“ რეესტრის შესაქმნელად. როცა ეს ეტაპიც დასრულდება, „უცხოელი აგენტების“ რეესტრში რეგისტრაცია სავალდებულო გახდება.